Border News Agency
ထိုင်း၊ဇွန် ၃၀။
ထိုင်းနိုင်ငံ၊ ချင်းမိုင်ခရိုင်၊ချင်းဒေါင်မြို့နယ်၊ မိန်းဏပြည်နယ်ခွဲရှိ ထိုင်း-မြန်မာနယ်စပ် နောင်ကလန် ၁လမ်းကြောင်းအနီးမှာ အကောက်ခွန်မဲ့စီးကရက်တွေသိမ်းဆည်းရမိခဲ့တယ်လို့ ထိုင်းတော်ဝင်ကြည်းတပ်က ဇွန်လ ၃၀ ရက်၊ဒီနေ့ထုတ်ပြန်ပါတယ်။
အဲဒီ ထိုင်း- မြန်မာနယ်စပ် နောင်ကလန် ၁လမ်းကြောင်းအနီးမှာ ဇွန်လ ၂၉ ရက်နေ့က ကင်းလှည့်နေတဲ့ ထိုင်းတော်ဝင်ကြည်းတပ် ဟာ သံသယဖြစ်ဖွယ် အမျိုးသား ၂ ဦးကို စစ်ဆေးဖို့ ကြိုးပမ်းခဲ့တယ်လို့ဆိုပါတယ်။
အဲဒီ အမျိုးသား ၂ ဦးဟာ ကျောပိုးအိတ်ကြီးတွေကိုယ်စီ သယ်ဆောင်လာတာဖြစ်ပြီး ထိုင်းစစ်တပ်က တားဆီးစစ်ဆေးဖို့လုပ်ချိန် ဒေသမြေပြင်ကျွမ်းကျင်မှုကို အသုံးချကာ ထွက်ပြေးလွတ်မြောက်သွားခဲ့ကြတယ်လို့ဆိုပါတယ်။
သူတို့ ထွက်ပြေးသွားပြီးနောက် အခင်းဖြစ်ပွားရာ နယ်စပ်လမ်းကြောင်းတလျှောက်ကို ထိုင်းစစ်တပ်ကလိုက်လံရှာဖွေရာ ကုန်ပစ္စည်းသယ်ဆောင်ရာမှာ အသုံးပြုတဲ့ ကျောပိုးအိတ် ၂ လုံးကို တွေ့ရှိခဲ့တယ်လို့ဆိုပါတယ်။
အဲဒီ ကျောပိုးအိတ်များအတွင်းကနေ အကောက်ခွန်မဲ့ သယ်ဆောင်လာတဲ့ မှောင်ခိုစီးကရက် အာရပ် ၂၃၇ ကတ်တန်ကို သိမ်းဆည်းရမိခဲ့ပြီး ဥပဒေအရ ဆက်လက်အရေးယူနိုင်ဖို့ ချင်းဒေါင်မြို့နယ် အကောက်ခွန်ဌာနသို့ လွှဲပြောင်းထားတယ်လို့ဆိုပါတယ်။
