Border News Agency
ပေါက်ခေါင်း၊ဇွန် ၃၀။
ပဲခူးတိုင်းဒေသ၊ပြည်ခရိုင်၊ပေါက်ခေါင်းမြို့နယ်မှာတော်လှန်ရေးတပ်တွေတိုက်ခိုက်လို့ အာဏာသိမ်းစစ်တပ်တပ်ဖွဲ့ဝင်သုံးဦးသေဆုံးပြီး နှစ်ဦးဒဏ်ရာရသွားတယ်လို့ ရွှေတောင်မြို့နယ်ပြည်သူ့ကာကွယ်ရေးအဖွဲ့ ဇွန်လ ၃၀ရက်၊ ဒီနေ့ထုတ်ပြန်ပါတယ်။
အဲဒီပေါက်ခေါင်းမြို့နယ်၊တောင်လည်ကျေးရွာ တောင်လည်တာဝါတိုင်အထိုင်စခန်းမှ ပေါက်ခေါင်းမြို့ဘက်ခြမ်းကို ထွက်ခွာလာတဲ့ စစ်တပ်စစ်ကြောင်းကို ဇွန်လ ၂၅ရက်၊ညနေ ၃ နာရီ ၃၀မိနစ်အချိန်ခန့်က တော်လှန်ရေးတပ်တွေမှ ပေါက်ခေါင်းမြို့နယ်အရှေ့ကြို့ကုန်းရွာနဲ့ မုံညှင်းကွင်းအရောက်မှာ ကြားဖြတ်တိုက်ခိုက်ခဲ့တာလို့ ဆိုပါတယ်။
အဲဒီလိုကြားဖြတ်တိုက်ခိုက်ခဲ့တာကြောင့် အာဏာသိမ်းစစ်တပ်တပ်ဖွဲ့ဝင်သုံးဦးသေဆုံးပြီး နှစ်ဦးဒဏ်ရာရသွားခဲ့ကာ တော်လှန်ရေးတပ်ဖွဲ့ဝင်တွေဘက်မှ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ ဆိုပါတယ်။
တိုက်ခိုက်မှုကို ရွှေတောင်မြို့နယ်ပကဖတိုက်ခိုက်ရေးအဖွဲ့၊ ပြည်ခရိုင်အမှတ် ၂ တပ်ရင်း၊ တပ်ခွဲ၄ တို့မှ ပူးပေါင်းလုပ်ဆောင်ခဲ့တာလို့ဆိုပါတယ်။
ဒေသခံပြည်သူတွေအနေနဲ့လည်း လေကြောင်းနဲ့လက်နက်ကြီးအန္တရာယ်ကို အထူးသတိပြုနေထိုင်ကြဖို့နဲ့ အာဏာသိမ်းစစ်တပ်နဲ့ပက်သက်ဆက်စပ်တဲ့နေရာတွေကို သွားလာတာတွေမပြုလုပ်ကြဖို့ကိုလည်း ရွှေတောင်မြို့နယ်ပြည်သူ့ကာကွယ်ရေးအဖွဲ့မှအသိပေးထားပါတယ်။
