Border News Agency
ကျိန္တလီ၊ ဇွန် ၃၀။
အာရက္ခတပ်တော်(AA)ထိန်းချုပ်ထားတဲ့ ကျိန္တလီမြို့နဲ့ရေကျော်ရွာကို ဇွန်လ ၂၆ရက်နေ့က လေကြောင်းတိုက်ခိုက်ခံမှုမှာ ဒဏ်ရာရသူထဲက ကလေးငယ်တဦးသေဆုံးသွားခဲ့ပါတယ်။
အဲဒီသေဆုံးသွားသူဟာဂွမြို့နယ်၊ ရေကျော်ရွာမှ အသက်ဆယ်နှစ်အရွယ် မောင်ထက်မြတ်သူဖြစ်ပါတယ်။
အဲဒီရေကျော်ရွာဘုန်းကြီးကျောင်းကို ဇွန်လ ၂၆ ရက်၊ ညနေ ၃ နာရီခွဲအချိန်က အာဏာသိမ်းစစ်တပ်မှ ပေါင် ၅၀၀ ဗုံးနဲ့တိုက်ခိုက်ခဲ့ပြီး ကျိန္တလီမြို့၊ အမှတ် ၂ ရပ်ကွက်ကိုလည်း လေကြောင်းတိုက်ခိုက်ခဲ့ပါတယ်။
အဲဒီတိုက်ခိုက်မှုအတွင်း ဦးဝေရာမင်းမှာ ဒဏ်ရာပြင်းထန်လို့ ဆေးကုသမှုခံယူနေစဉ် အဲဒီနေ့ ညနေ ၄ နာရီ ၄၅ မိနစ်အချိန်ခန့်မှာ သေဆုံးသွားခဲ့ပြီး မောင်ထက်မြတ်သူအပါအဝင် ၅ ဦးမှာ ဒဏ်ရာရရှိကာ အရေးပေါ် ဆေးကုသမှုခံယူခဲ့ရပါတယ်။
အဲဒီလိုဆေးကုသမှုခံယူနေစဉ် ညာပေါင်နဲ့ ညာလက်ပြတ်ထွက်ခဲ့လို့ဒဏ်ရာပြင်းထန်တာကြောင့်မောင်ထက်မြတ်သူဟာဇွန်လ၂၈ ရက်၊ နေ့လည် ၁ နာရီအချိန်ခန့်မှာ သေဆုံးသွားခဲ့တာဖြစ်ပါတယ်။
အာဏာသိမ်းစစ်တပ်ဟာ အာရက္ခတပ်တော်ထိန်းချုပ်ထားတဲ့ မြို့တွေကို စစ်သင်္ဘောတွေက လက်နက်ကြီး၊လေယာဉ်တွေနဲ့ဆက်တိုက်ပစ်ခတ်နေလို့ ပြည်သူတွေအတွက် အန္တရာယ်အမြင့်ဆုံးဖြစ်နေတယ်လို့ အာရက္ခတပ်တော်က ဆိုပါတယ်။
လူနေထူထပ်တဲ့ အရပ်သားပြည်သူတွေနေထိုင်ရာနေရာ၊စာသင်ကျောင်း၊ဆေးရုံ၊ဆေးခန်းနဲ့ သာသနိကအဆောက်အအုံတွေကို အာဏာသိမ်းစစ်တပ်က ရည်ရွယ်ချက်ရှိရှိရေကြောင်း၊လေကြောင်းက တိုက်ခိုက်မှု ပြုလုပ်နေတယ်လို့ ဆိုပါတယ်။
အဲဒါကြောင့် ပင်လယ်ကမ်းနီးမြို့၊ ရွာတွေက မိဘပြည်သူတွေဟာ အာဏာသိမ်းစစ်တပ်ရေကြောင်း၊လေကြောင်းတိုက်ခိုက်မှုအန္တရာယ်ကို အထူးသတိထားကြပြီး စစ်ရေးသတိရှိဖို့အသိပေးထားပါတယ်။
