Border News Agency
မြောက်ဦး၊ ဧပြီ ၁၀။
အာရက္ခတပ်တော် (AA) ရဲ့ ၁၇ နှစ်ပြည့် တပ်မွေးနေ့မှာ ပြည်သူ့လွတ်မြောက်ရေးတပ်မတော် (PLA) က ဂုဏ်ပြုသဝဏ်လွှာ ပေးပို့လိုက်ပါတယ်။
စစ်အာဏာရှင်စနစ် အပြီးတိုင်ချုပ်ငြိမ်းဖို့အတွက် AA နဲ့အတူ အဆုံးအထိ လက်တွဲတိုက်ပွဲဝင်သွားမယ်လို့လည်း ကတိပြုလိုက်တာပါ။
AA ဟာ အခက်အခဲပေါင်းများစွာကြားကနေ ရခိုင်ဒေသနဲ့ ပြည်သူတွေကို စစ်အာဏာရှင်လက်အောက်ကနေ လွတ်မြောက်အောင်စွမ်းဆောင်နိုင်ခဲ့တာဟာ တကယ်ကို လေးစားဖို့ကောင်းတယ်လို့ သဝဏ်လွှာမှာ ဖော်ပြထားပါတယ်။
အာရက္ခပြည်သူတွေအတွက်တင်မကဘဲ တနိုင်ငံလုံးက ဖိနှိပ်ခံပြည်သူတွေ လွတ်မြောက်ဖို့ပါ AA က အားတက်သရော ကူညီကြိုးပမ်းနေတာကို ဝမ်းမြောက်ဂုဏ်ယူမိတယ်လို့လည်း PLA က ဆိုပါတယ်။
ဘုံရန်သူဖြစ်တဲ့ စစ်အာဏာရှင်စနစ်ကို အမြစ်ဖြတ်ရာမှာ AA အပါအဝင်မဟာမိတ်အဖွဲ့အစည်းတွေအားလုံးနဲ့ အတူတကွ လက်တွဲသွားဖို့ မျှော်လင့်တယ်လို့လည်းဆိုပါတယ်။
အာရက္ခအိပ်မက်တွေအမြန်ဆုံးအောင်မြင်ပါစေကြောင်း ဆုတောင်းပေးထားပြီး တော်လှန်ရေးခရီးလမ်းမှာ အသက်ပေးလှူသွားကြတဲ့ အာရက္ခအာဇာနည်စစ်သည်တော်တွေကိုလည်း အလေးအမြတ်ပြု ဂုဏ်ပြုဦးညွှတ်ထားပါတယ်။
