Border News Agency
မန္တလေး၊ ဧပြီ ၁၂။
မန္တလေးမြို့မှာပေါ်တာဆွဲခံရပြီး စစ်သားအဖြစ်အဓမ္မစုဆောင်းတာခံခဲ့ရတဲ့ တပ်သားကျော်မိုးဝင်းဟာ စစ်ကော်မရှင်တပ်အတွင်းကနေ စွန့်ခွာပြီး အာရက္ခတပ်တော် (AA) ဆီကို ဧပြီလ ၁၁ ရက်နေ့က အလင်းဝင်ရောက်လာပါတယ်။
အဲဒီကိုကျော်မိုးဝင်းဟာ ပြီးခဲ့တဲ့ ၂၀၂၅ ခုနှစ်၊ အောက်တိုဘာ ၁ ရက်၊ညပိုင်းက သူငယ်ချင်းဖြစ်သူနဲ့အတူ ဘီယာသောက်ပြီး အပြန်လမ်းခရီးမှာ အရပ်ဝတ်လူ ၄ ဦးရဲ့ အဓမ္မဖမ်းဆီးတာကို ခံခဲ့ရတာဖြစ်ပါတယ်။
အဲဒီလို အဓမ္မဖမ်းဆီးခံရပြီးနောက် မကွေးစုဆောင်းရေးကတဆင့် ရှမ်းပြည်၊ ရပ်စောက်မြို့က စစ်သင်တန်းကျောင်းကို ပို့ဆောင်ခံခဲ့ရတယ်လို့ဆိုပါတယ်။
”ကျွန်တော့်မှာမိန်းမနဲ့ ကလေးငယ်ရှိလို့ စစ်ထဲမဝင်နိုင်ဘူးလို့ပြောတာကို သူတို့ကရိုက်နှက်တယ်။အဲဒီနောက် ရပ်စောက်က အမှတ် ၁ သင်တန်းကျောင်းမှာပြည်သူ့စစ်မှုထမ်းသင်တန်း အပတ်စဉ် ၁၈ ကို ၁၂ ပတ်ကြာတက်ခဲ့ရပါတယ်။”လို့ ကိုကျော်မိုးဝင်းက သူ့ရဲ့ကိုယ်တွေ့ကို ပြောပြပါတယ်။
သင်တန်းဆင်းပြီးနောက် တောင်ငူရှိပို့ဆောင်ရေးတပ်နဲ့ ကပစ ၁၆ မှာ တာဝန်ထမ်းဆောင်ခဲ့ရပြီး ပင်ပန်းဆင်းရဲမှုနဲ့အန္တရာယ်များတာတွေကြောင့် သူငယ်ချင်း ၃ ဦးနဲ့အတူထွက်ပြေးဖို့ ကြိုးပမ်းခဲ့ပေမယ့် ကပစ ၁၆ မှာ ပြန်လည်ဖမ်းဆီးတာခံခဲ့ရတယ်လို့ ဆိုပါတယ်။
အဲဒီလိုဖမ်းဆီးခံရပြီးနောက် စစ်ကော်မရှင်တပ်ဗျူဟာမှူးကိုယ်တိုင်က သူတို့ကိုနောက်ထပ်ထပ်မပြေးနိုင်စေဖို့နဲ့ မြို့ပေါ်မှာနေထိုင်လို့မရစေဖို့အတွက် နဖူးမှာတပ်ရင်းအမှတ်အသားတွေကို တက်တူးအတင်းအဓမ္မ ထိုးပေးခဲ့တယ်လို့ ဆိုပါတယ်။
”ဗျူဟာမှူးကကျွန်တော်တို့ နဖူးတွေမှာ ခမရ ၃၆၆ ဆိုပြီး တက်တူးတွေထိုးပေးတယ်။တချို့ဆို စစ်ပြေးလို့တောင် ထိုးခံရတယ်။ ဒါဟာ ကျွန်တော်တို့ ဘယ်မှာမှနေလို့မရအောင်၊အလွယ်တကူ ပြန်ဖမ်းလို့ရအောင် လုပ်တာပါ။” လို့ သူက သူ့ရဲ့နဖူးကတက်တူးကို ပြသရင်းရင်ဖွင့်ပါတယ်။
အခုဖြစ်ရပ်ဟာ စစ်ကော်မရှင်တပ်အတွင်း တရားမျှတမှုကင်းမဲ့တာ၊ အဓမ္မစေခိုင်းတာနဲ့ လူသားဂုဏ်သိက္ခာကို အောက်တန်းကျစွာညှိုးနွမ်းစေတဲ့လုပ်ရပ်တွေရှိနေတာကို ပြသနေတဲ့သက်သေတခုပဲဖြစ်ပါတယ်။
အဲဒီကိုကျော်မိုးဝင်းဟာ စစ်ကော်မရှင်တပ်အတွင်းကနေစွန့်ခွာပြီး အာရက္ခတပ်တော်ဆီအလင်းဝင်ရောက်ခိုလှုံနေပြီဖြစ်ပါတယ်။
စစ်ကော်မရှင်တပ်အတွင်းမှာ အဓမ္မစုဆောင်းခံရတာတွေ၊ အထက်အရာရှိတွေရဲ့ ဖိနှိပ်မှုတွေနဲ့ တရားမျှတမှုကင်းမဲ့တဲ့လုပ်ရပ်တွေကြောင့် စစ်ကော်မရှင်တပ်သားတွေဟာ အာရက္ခတပ်တော်နဲ့ တော်လှန်ရေးတပ်တွေဆီကို နေ့တိုင်းလိုလို အလင်းဝင်လာနေကြတာ ဖြစ်ပါတယ်။
