Border News Agency
အမေရိကန်၊ ဩဂုတ် ၂၀။
အမေရိကန်နဲ့အီရန်ကြားဖြစ်ပွားနေတဲ့ စစ်ပွဲကိုအဆုံးသတ်ဖို့ ဆွေးနွေးပွဲတွေလမ်းစပျောက်နေချိန်မှာ အမေရိကန်သမ္မတဒေါ်နယ်ထရမ့်က အီရန်နိုင်ငံအပေါ်သမိုင်းမှာ အပြင်းထန်းဆုံးစီးပွားရေးစစ်ဆင်ရေးနဲ့ ပိတ်ဆို့မှုတွေ ပြုလုပ်သွားမယ်လို့ ထုတ်ဖော်ကြေညာလိုက်ပါတယ်။
ဒေါ်နယ်ထရမ့်က အီရန်အနေနဲ့ သဘောတူညီချက်ရယူဖို့ အခွင့်အရေးကိုလက်လွှတ်ခဲ့တာကြောင့် သမိုင်းမှာမကြုံဖူးတဲ့ စီးပွားရေးအရ သီးခြားခွဲထုတ်မှုတွေနဲ့ကြုံတွေ့ရမှာဖြစ်တယ်လို့ သူ့ရဲ့ Truth Social လူမှုကွန်ရက်မှာ ရေးသားထားတာပါ။
အဲဒီအပြင် အီရန်နိုင်ငံနဲ့ဘဏ္ဍာရေး၊စီးပွားရေးနဲ့ ရေနံမှောင်ခိုကူးမှုအပါအဝင် ဘယ်ပုံစံနဲ့မဆိုဆက်ဆံဆောင်ရွက်နေတဲ့ မဟာမိတ်နိုင်ငံတွေအပါအဝင် ဘယ်နိုင်ငံမဆို အမေရိကန်ရဲ့ ပြင်းထန်တဲ့စီးပွားရေး ပိတ်ဆို့ဒဏ်ခတ်မှုတွေကို ခုလိုရင်ဆိုင်ရမယ်လို့လည်း ထရမ့်ကခြိမ်းခြောက်ပြောဆိုခဲ့ပါတယ်။
အဲဒီကြေညာချက်နဲ့ပတ်သက်လို့ အီရန်အစိုးရဘက်က ထူးခြားတဲ့တုံ့ပြန်မှုမရှိသေးဘဲ အီရန်နိုင်ငံပိုင် မီဒီယာတွေကတော့ အမေရိကန်အနေနဲ့ အီရန်ကို စီးပွားရေးအရပိတ်ဆို့ဖို့ နှစ်ပေါင်းများစွာကြိုးစားခဲ့ပေမယ့် အီရန်ဘက်က ပိတ်ဆို့မှုတွေကိုကျော်လွှားနိုင်ခဲ့ပြီးဖြစ်တာကြောင့် ဒါဟာအသစ်အဆန်းမဟုတ်ဘူးလို့ တုံ့ပြန်ထားပါတယ်။
အဲဒီအပြင် အမေရိကန်သမ္မတရဲ့ အခုလိုကြေညာချက်ဟာ လွန်ခဲ့တဲ့ငါးလကျော်ကတည်းကစတင်ခဲ့တဲ့ နှစ်နိုင်ငံစစ်ပွဲမှာ စစ်ရေးအရအသာစီးမရဘဲ အကျပ်ရိုက်နေမှုကိုပြသနေတာဖြစ်တယ်လို့ နိုင်ငံရေးလေ့လာသူတွေက သုံးသပ်ထားပါတယ်။
