Border News Agency
ဂါဇာ၊ဧပြီ ၁၅။
ဂါဇာကမ်းမြောင်ဒေသမှာ ၂၀၂၅ ခုနှစ်၊ အောက်တိုဘာ ၁၀ ရက်နေ့ကစပြီး အပစ်အခတ်ရပ်စဲရေးကြေညာထားပေမယ့် အစ္စရေးဘက်က သဘောတူညီချက်ကို အကြိမ်ပေါင်း ၂,၄၀၀ ကျော် ချိုးဖောက်ခဲ့တယ်လို့ ဂါဇာအစိုးရပြန်ကြားရေးရုံးက ထုတ်ပြန်ပါတယ်။
အဲဒီအပစ်ရပ်ထားတဲ့ ရက်ပေါင်း ၁၈၇ ရက်ထဲမှာ ၁၆၅ ရက်က တိုက်ခိုက်မှုတွေရှိနေခဲ့တာပါ။
ဒီတိုက်ခိုက်မှုတွေကြောင့် ပါလက်စတိုင်းပြည်သူ အနည်းဆုံး ၇၅၇ ဦး သေဆုံးပြီး ၂,၁၁၁ ဦး ဒဏ်ရာရရှိခဲ့ပါတယ်။
အောက်တိုဘာ ၁၉ ရက်နဲ့ ၂၉ ရက်နေ့တွေဟာ အသေအပျောက်အများဆုံးနေ့တွေဖြစ်ခဲ့ပြီး လေကြောင်းကနေဗုံးကြဲတာ၊ လက်နက်ကြီးနဲ့ ပစ်ခတ်တာတွေကြောင့် ကလေးငယ် ၅၀ ကျော် အပါအဝင် လူပေါင်း ၁၅၀ ကျော် သေဆုံးခဲ့ပါတယ်။
သဘောတူညီချက်အရ ဂါဇာထဲကို လူသားချင်းစာနာမှုဆိုင်ရာ အကူအညီတွေ အပြည့်အဝပေးပို့ရမှာဖြစ်ပေမယ့် အစ္စရေးဘက်က စစ်ဆေးမှုတွေ ကြန့်ကြာအောင်လုပ်နေလို့ လိုအပ်တဲ့အကူအညီ ၃၇ ရာခိုင်နှုန်းလောက်ပဲ ဝင်ရောက်နိုင်ပါသေးတယ်။
ဒါ့အပြင် အသား၊ နို့ထွက်ပစ္စည်းနဲ့ ဟင်းသီးဟင်းရွက်လို အာဟာရဖြစ်မယ့် အစားအစာတွေကို အစ္စရေးက ပိတ်ပင်ထားပြီး အာဟာရမဖြစ်တဲ့ မုန့်နဲ့ အချိုရည်တွေကိုပဲ အဓိကပေးသွင်းခွင့်ပြုနေတယ်လို့ သိရပါတယ်။
ဟားမတ်စ်ဘက်ကတော့ သဘောတူညီချက်အရ ဖမ်းဆီးထားတဲ့ အစ္စရေးဓားစာခံအားလုံးကို ပြန်လွှတ်ပေးခဲ့သလို သေဆုံးသွားသူတွေရဲ့ ရုပ်အလောင်းတွေကိုလည်း ဒီဇင်ဘာလကုန်မှာ အကုန်ပြန်ပေးခဲ့ပြီးဖြစ်ပါတယ်။
