Border News Agency
မင်းပြား၊ ဧပြီ ၁၉။
မင်းပြားမြို့နယ်၊ ကုလားမတောင်ရွာမှာ အရက်မူးပြီးကိုယ့်အိမ်ကိုယ် မီးရှို့ခဲ့သူတဦးကို အာရက္ခပြည်သူ့တော်လှန်ရေးအစိုးရရဲ့တရားဥပဒေစိုးမိုးရေးနဲ့ပြည်သူ့လုံခြုံရေးဌာနက ဖမ်းဆီးအရေးယူထားတယ်လို့ သိရပါတယ်။
အဲဒီကုလားမတောင်ရွာမှ အသက် ၅၈ နှစ်အရွယ် ဦးဦးကျော်လှဟာ ဧပြီလ ၁၂ ရက်နေ့၊ နေ့လည်ပိုင်းက အရက်သောက်မူးယစ်ပြီး သူ့နေအိမ်ကို မီးရှို့ခဲ့တာကြောင့် အိမ်တဆောင်လုံး မီးလောင်ပြာကျခဲ့တာ ဖြစ်ပါတယ်။
အဲဒီမီးလောင်မှုကြောင့် ကာလတန်ဖိုး ငွေကျပ် ၃၉ သိန်းကျော်ဖိုးခန့် ဆုံးရှုံးခဲ့ရတယ်လို့ ဆိုပါတယ်။
အဲဒီမီးရှို့မှုနဲ့ပတ်သက်ပြီး ကျူးလွန်သူကို အရေးယူပေးဖို့ တိုင်တန်းချက်အရ သက်ဆိုင်ရာ ဒီလပ်စခန်းက ဧပြီ ၁၃ ရက်နေ့မှာ ဖမ်းဆီးခဲ့တာပါ။
အဲဒီဦးဦးကျော်လှကို ရာဇသတ်ကြီးပုဒ်မ ၄၃၆ နဲ့ အမှုဖွင့်ထားပြီး တရားစွဲဆိုနိုင်ဖို့ လုပ်ထုံးလုပ်နည်းတွေနဲ့အညီ ဆောင်ရွက်နေတယ်လို့ သိရပါတယ်။
ရာဇသတ်ကြီးပုဒ်မ ၄၃၆ အရနေအိမ် ဒါမှမဟုတ် အဆောက်အအုံတွေကို ဖျက်ဆီးဖို့ ကြံရွယ်ပြီး မီးရှို့ရင် ထောင်ဒဏ် တသက်တကျွန်းဖြစ်စေ၊ ထောင်ဒဏ် ၁၀ နှစ်အထိဖြစ်စေချမှတ်ခံရမယ့်အပြင် ငွေဒဏ်လည်း ကျခံရနိုင်ပါတယ်။
ရာသီဥတု ပူပြင်းခြောက်သွေ့နေတာကြောင့် မီးဘေးအန္တရာယ်ကို အထူးသတိထားကြဖို့နဲ့ သက်ဆိုင်ရာက ထုတ်ပြန်ထားတဲ့ မီးဘေးကာကွယ်ရေး ညွှန်ကြားချက်တွေကို တိတိကျကျ လိုက်နာကြဖို့ကိုလည်း ဒီလပ်ဌာနက ပြည်သူတွေကို တိုက်တွန်းနှိုးဆော်ထားပါတယ်။
