Border News Agency
အမေရိကန်၊ ဧပြီ ၁၉။
အမေရိကန်ဘက်က အီရန်ဆိပ်ကမ်းတွေကို ပိတ်ဆို့ထားတာကို မရပ်မချင်း အရေးပါတဲ့ ဟော်မုဇ်ရေလက်ကြားကို ပြန်ဖွင့်ပေးမှာမဟုတ်ဘူးလို့ အီရန်ဘက်က ဧပြီလ ၁၉ ရက်၊ ဒီနေ့မှာ ထပ်ပြီးအတည်ပြုလိုက်ပါတယ်။
အီရန်တော်လှန်ရေးအစောင့်တပ် (IRGC) ကလည်း သူတို့ခွင့်ပြုချက်မရှိဘဲ ရေလက်ကြားကို ဖြတ်သန်းဖို့ကြိုးစားတဲ့ ဘယ်သင်္ဘောကိုမဆို ရန်သူလို့သတ်မှတ်ပြီး တိုက်ခိုက်သွားမယ်လို့ သတိပေးထားပါတယ်။
အီရန်သမ္မတ မာဆုဒ် ပီဇက်ရှ်ကီယန်ကတော့ အီရန်ရဲ့ နျူကလီးယားဆိုင်ရာ အခွင့်အရေးတွေကို ပိတ်ပင်ဖို့ သမ္မတ ထရန့်မှာ ဘာအကြောင်းပြချက်မှမရှိဘူးလို့ ပြောဆိုထားသလို အီရန်ရဲ့ အမြင့်ဆုံးခေါင်းဆောင်ကလည်း ရန်သူတွေကို ခါးသီးတဲ့ရှုံးနိမ့်မှုတွေပေးဖို့ သူတို့ရေတပ်က အသင့်ပဲလို့ ဆိုပါတယ်။
လက်ရှိမှာ နှစ်ဖက်ကြားဆွေးနွေးမှုတချို့ တိုးတက်မှုရှိတယ်ဆိုပေမယ့် နောက်ဆုံးသဘောတူညီချက်ရဖို့ကတော့ အလှမ်းဝေးနေဆဲပဲလို့ အီရန်လွှတ်တော်ဥက္ကဋ္ဌက ပြောပါတယ်။
အမေရိကန်ဘက်ကတော့ အီရန်က သူတို့ကို ခြိမ်းခြောက်ဖို့ ကြိုးစားနေတယ်လို့ စွပ်စွဲထားပြီး ဝါရှင်တန်အနေနဲ့ ပြတ်ပြတ်သားသား ရပ်တည်သွားမယ်လို့ သမ္မတ ထရန့်က ပြောပါတယ်။
အမေရိကန်စစ်တပ်ဟာ အီရန်ဆိပ်ကမ်းတွေကို ပိတ်ဆို့ထားဆဲဖြစ်ပြီး အခုချိန်ထိ သင်္ဘော ၂၃ စီးကို လှည့်ပြန်ခိုင်းထားတယ်လို့ သိရပါတယ်။
လက်ရှိအပစ်ရပ်ထားတဲ့ကာလဟာ လာမယ့် ဧပြီလ ၂၂ ရက်နေ့မှာ ကုန်ဆုံးတော့မှာဖြစ်လို့ အခြေအနေတွေက ပိုပြီးတင်းမာနေပါတယ်။
အစ္စရေးဘက်မှာလည်း လက်ဘနွန်တောင်ပိုင်း တိုက်ပွဲတွေအတွင်း စစ်သားတဦး ထပ်မံသေဆုံးခဲ့သလို အီရန်နဲ့စစ်ပွဲကြောင့် တယ်လ်အဗစ်မြို့က အိမ်ခြေ ၁,၀၀၀ ကျော်ဟာ နေထိုင်လို့မရတော့တဲ့အထိ ပျက်စီးသွားတယ်လို့ မြို့တော်ဝန်က ဆိုပါတယ်။
တဖက်မှာလည်း ကုလသမဂ္ဂအတွင်းရေးမှူးချုပ်က လက်ဘနွန်မှာရှိတဲ့ ငြိမ်းချမ်းရေးထိန်းသိမ်းမှုတပ်ဖွဲ့ဝင် ပြင်သစ်စစ်သားတဦး သေဆုံးခဲ့တဲ့ တိုက်ခိုက်မှုကို ပြင်းပြင်းထန်ထန် ကန့်ကွက်ရှုတ်ချထားပါတယ်။
အခုချိန်မှာ အီရန်ပြည်သူတွေကြားမှာ စစ်ပွဲရဲ့အရိပ်အယောင်တွေကြောင့် စိုးရိမ်မှုတွေရှိနေပြီး ကျောင်းတွေကိုလည်း လူကိုယ်တိုင်တက်ရောက်ရတဲ့ ပညာရေးစနစ် ပြန်မဖွင့်သေးဘူးလို့ သိရပါတယ်။
ပါကစ္စတန်နဲ့ အီဂျစ်နိုင်ငံတွေကတော့ နောက်ထပ်ဆွေးနွေးပွဲတွေကတဆင့် ရက်ပိုင်းအတွင်းမှာ နောက်ဆုံးသဘောတူညီချက်တခု ရနိုင်ဖို့ မျှော်လင့်ချက်နဲ့ ကြားဝင်ညှိနှိုင်းပေးနေပါတယ်။
