Border News Agency
ကျင်ဒွေး၊ ဧပြီ ၃၀။
ချင်းပြည်၊ ကျင်ဒွေးမြို့ရှိ ကျင်ဒွေးတံတားကို စစ်ကော်မရှင်တပ်လေကြောင်းတိုက်ခိုက်လို့ အရပ်သား ၉ ဦးသေဆုံး၊၄ ဦးဒဏ်ရာရသွားခဲ့တယ်လို့ ချင်းပြည်သူ့အစည်းအရုံး (CPO)ကဧပြီလ ၂၉ ရက်၊ မနေ့ကထုတ်ပြန်ပါတယ်။
အဲဒီကျင်ဒွေးတံတားကို ဧပြီလ ၂၉ရက်၊ မနက် ၁၀ နာရီ ၁၅ မိနစ်အချိန်ခန့်က စစ်ကော်မရှင်တပ်လေကြောင်းတိုက်ခိုက်လို့ တံတားပြုပြင်ရေးအလုပ်သမားတွေသေဆုံးသွားတယ်လို့ ဆိုပါတယ်။
အဲဒီသေဆုံးသွားသူတွေဟာ အသက်၃၇ နှစ်အရွယ် ဦးထိန်လင်း ၊ အသက်၃၀ နှစ်အရွယ် ဦးသောင်းဖေ၊ အသက်၅၅နှစ်အရွယ်ဦးပြည့်ဖြိုးအောင်၊ အသက်၅၀ နှစ်အရွယ် ဒေါ်မထွေး ၊ အသက်၄၄ နှစ်အရွယ် ဦးမောင်လုံး၊ အသက် ၃၇ နှစ်အရွယ် ဦးဌေးအောင် အသက်၃၈နှစ်အရွယ် ဦးခင်အောင် ၊ အသက်၃၇ နှစ်အရွယ် ဦးကိုထုံနဲ့ အသက်၃၇ နှစ်အရွယ်ဦးပြည့်ဖြိုးအောင်တို့ ဖြစ်ပါတယ်။
အဲဒီအပြင် ဖုံးသွေးကျင်းအုပ်ချုပ်ရေးမှူး အသက် ၃၀နှစ်အရွယ် ဦးအောင်ခိုင်အပါအဝင် အမျိုးသား ၄ ဦးမှာလည်း ဦးခေါင်းနဲ့ ခန္ဓာကိုယ်မှာ ဗုံးစထိမှန်ကာဒဏ်ရာရသွားခဲ့တယ်လို့ ဆိုပါတယ်။
အဲဒီဒဏ်ရာရသွားသူတွေဟာ အသက်၂၅ နှစ်အရွယ် ဦးနေထွန်းအောင်၊ အသက် ၃၇နှစ်အရွယ် ဦးအောင်ဝင်းနဲ့ ဦးကျော်ဟိန်းတို့ပြင်းထန်ဒဏ်ရာရသွားခဲ့ကြတာပါ။
စစ်ကော်မရှင်တပ်မှလေကြောင်းတိုက်ခိုက်ခဲ့တာကြောင့် တံတားပြုပြင်ရေးမှာအသုံးပြုနေတဲ့ JCB စက်ယန္တရားတစီး၊ Dayan ကားတစီးနဲ့ ဆိုင်ကယ်လေးစီးလည်း ပျက်စီးသွားတယ်လို့ ဆိုပါတယ်။
စစ်ကော်မရှင်တပ်ဟာ အရပ်သားပြည်သူတွေကို ပစ်မှတ်ထားလေကြောင်းတိုက်ခိုက်တာတွေပြုလုပ်လာနေတာကြောင့် ပြည်သူတွေအနေနဲ့ ဗုံးခိုကျင်းတွေပြင်ဆင်ထားကြဖို့နဲ့ လေကြောင်းအန္တရာယ်ကို အထူးသတိပြုကြဖို့ ချင်းပြည်သူ့အစည်းအရုံးကတိုက်တွန်းထားပါတယ်။
