Border News Agency
အမေရိကန်၊ဧပြီ ၃၀။
အမေရိကန်-အစ္စရေးနဲ့ အီရန်ကြား စစ်ပွဲဖြစ်ပွားနေချိန်မှာ အီရန်နဲ့ ဆက်နွှယ်နေတဲ့ ခရစ်ပတိုပိုက်ဆံအိတ်တွေထဲက အမေရိကန်ဒေါ်လာ ၃၄၄ သန်း တန်ဖိုးရှိတဲ့ ပိုင်ဆိုင်မှုတွေကို အမေရိကန်အစိုးရက ဧပြီလ ၂၉ ရက်နေ့မှာထပ်မံပိတ်ဆို့လိုက်ပါတယ်။
အီရန်အာဏာပိုင်တွေဟာ စီးပွားရေးပိတ်ဆို့မှုတွေကို ကျော်လွှားဖို့ ခရစ်ပတိုကို အသုံးပြုပြီး လက်နက်ဝယ်ယူတာနဲ့ ရေနံရောင်းချတာတွေ လုပ်ဆောင်နေတာကြောင့် အမေရိကန်က အခုလို ငွေကြေးလမ်းကြောင်းတွေကို လိုက်လံဖြတ်တောက်နေတာပါ။
အီရန်တော်လှန်ရေး အစောင့်တပ်ဖွဲ့ (IRGC) ဟာ နိုင်ငံတွင်း ခရစ်ပတိုအသုံးပြုမှုရဲ့ ထက်ဝက်ခန့်ကို ထိန်းချုပ်ထားပြီး ဟော်မုဇ်ရေလက်ကြား ဖြတ်သန်းခတွေကိုတောင် ခရစ်ပတိုနဲ့ ပေးဆောင်ဖို့ တောင်းဆိုထားတယ်လို့ Al Jazeera သတင်းမှာ ဖော်ပြထားပါတယ်။
တဖက်မှာလည်း အီရန်ပြည်သူတွေဟာ ငွေကြေးတန်ဖိုး ကျဆင်းမှုဒဏ်ကနေ ကာကွယ်ဖို့ ခရစ်ပတိုကို အားကိုးနေကြရပေမယ့် အမေရိကန်ရဲ့ ပိတ်ဆို့မှုတွေနဲ့ ဆိုင်ဘာတိုက်ခိုက်မှုတွေကြောင့် သာမန်ပြည်သူတွေရဲ့ စုဆောင်းငွေတွေပါ ဆုံးရှုံးနိုင်တဲ့ အန္တရာယ်ရှိနေပါတယ်။
