Border News Agency
နေပြည်တော်၊ဧပြီ ၃၀။
စစ်ရာဇဝတ်မှုတွေ ကျူးလွန်နေတဲ့ စစ်ကော်မရှင်တပ်ဆီ စစ်လက်နက်ပစ္စည်းတွေ၊ လောင်စာဆီနဲ့ နည်းပညာတွေ စီးဆင်းနေမှုကို ဖြတ်တောက်ပေးကြဖို့ ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းက ဧပြီလ ၂၉ ရက်နေ့မှာ အဖွဲ့ဝင်နိုင်ငံအားလုံးကိုတိုက်တွန်းလိုက်ပါတယ်။
အဲဒီ နျူကလီးယားလက်နက် မပြန့်ပွားရေးစာချုပ် (NPT) ညီလာခံမှာ သံအမတ်ကြီးက ထည့်သွင်းပြောဆိုခဲ့တာဖြစ်ပြီး စစ်ကော်မရှင်ဆီက နျူကလီးယားစွမ်းအင်ကို ငြိမ်းချမ်းတဲ့ ရည်ရွယ်ချက်နဲ့ အသုံးပြုမယ်ဆိုတာဟာ မယုံကြည်ရဘူးလို့ သတိပေးခဲ့ပါတယ်။
အတိတ်မှာ ဓာတုလက်နက် အစီအစဉ်တွေကို ဖုံးကွယ်ခဲ့ဖူးတာကြောင့် ပွင့်လင်းမြင်သာမှုရှိမှာ မဟုတ်ဘူးလို့လည်း ဆိုပါတယ်။
ဒါ့အပြင် စစ်ကော်မရှင်တပ်ဟာ အာဆီယံဘုံသဘောတူညီချက်နဲ့ ကုလသမဂ္ဂ ဆုံးဖြတ်ချက်တွေကို ချိုးဖောက်နေတာကြောင့် အပြည်ပြည်ဆိုင်ရာအဏုမြူစွမ်းအင်အေဂျင်စီ (IAEA) ရဲ့ လမ်းညွှန်ချက်တွေကို လိုက်နာမှာမဟုတ်ဘူးလို့ ထောက်ပြပါတယ်။
မြန်မာနိုင်ငံမှာ ဒီမိုကရေစီ ပြန်လည်ရရှိချိန်မှသာ နျူကလီးယားဆိုင်ရာ ပူးပေါင်းဆောင်ရွက်မှုတွေ ပေးသင့်တယ်လို့လည်း အကြံပြုခဲ့ပါတယ်။
မြန်မာပြည်သူတွေနဲ့ အနာဂတ်ကို ကယ်တင်နိုင်ဖို့အတွက် စစ်ကော်မရှင်တပ်ဆီအဘက်ဘက်က အထောက်အပံ့တွေ စီးဆင်းနေတာကို ဖြတ်တောက်ဖို့ တောင်းဆိုခဲ့သလို စစ်တပ်ဟာ အရပ်သားအစိုးရရဲ့ ထိန်းချုပ်မှုအောက် ရောက်ရှိမှသာ နိုင်ငံတကာနဲ့ ပူးပေါင်းဆောင်ရွက်သင့်တယ်လို့လည်းဆိုပါတယ်။
