Border News Agency
အီရန်၊ ဧပြီ ၃၀။
အီရန်နိုင်ငံရဲ့ နျူကလီးယား အစီအစဉ်နဲ့ ပတ်သက်ပြီး သဘောတူညီချက်ရဖို့ ဆွေးနွေးမှုတွေ ကြန့်ကြာနေချိန်မှာ အမေရိကန်သမ္မတ ဒေါ်နယ်ထရန့်က အီရန်အနေနဲ့ အမြန်ဆုံး နိုးကြားလာဖို့ဧပြီလ၂၉ ရက်နေ့မှာ သတိပေးလိုက်ပါတယ်။
အီရန်ဘက်က တင်ပြထားတဲ့ စစ်ပွဲရပ်တန့်ရေးနဲ့ ဟော်မုဇ်ရေလက်ကြားပြန်ဖွင့်ရေး အဆိုပြုချက်ကို ဝါရှင်တန်ဘက်က လက်ခံဖို့ တွန့်ဆုတ်နေတာပါ။
အမေရိကန်နဲ့ အီရန်ကြား အပစ်အခတ်ရပ်စဲရေးဟာ မရေမရာ ဖြစ်နေပြီး သမ္မတ ထရန့်ကတော့ အီရန်ဘက်က နျူကလီးယားကိစ္စကို အလေးအနက် မထားဘူးလို့ ဝေဖန်နေပါတယ်။
အမေရိကန် အစိုးရအနေနဲ့ အီရန်ကို နျူကလီးယားလက်နက်ပိုင်ဆိုင်ခွင့် လုံးဝပေးမှာမဟုတ်ကြောင်းနဲ့ အကျိုးမရှိတဲ့ သဘောတူညီချက်မျိုးကို အလောတကြီး လက်မှတ်ထိုးမှာမဟုတ်ဘူးလို့ အိမ်ဖြူတော်က ပြောပါတယ်။
တဖက်မှာလည်း အမေရိကန် ဘဏ္ဍာရေးဝန်ကြီးဌာနက အီရန်ရဲ့ လျှို့ဝှက်ဘဏ်စနစ်တွေ၊ ခရစ်ပတိုငွေကြေး အသုံးပြုမှုတွေနဲ့ လက်နက်ဝယ်ယူရေး ကွန်ရက်တွေကို ပစ်မှတ်ထားပြီး စီးပွားရေးအရ ထပ်မံဖိအားပေးလိုက်ပါတယ်။
ဒီလိုပိတ်ဆို့မှုတွေကြောင့် အီရန်ရဲ့ ရီယယ် ငွေကြေးတန်ဖိုးဟာ စံချိန်တင် အနိမ့်ဆုံးအထိ ထိုးကျသွားခဲ့တယ်လို့ သိရပါတယ်။
အဲဒီဆွေးနွေးပွဲတွေ ရပ်တန့်နေတဲ့ကာလအတွင်း အီရန်အာဏာပိုင်တွေက ကန့်ကွက်ဆန္ဒပြသူတွေနဲ့ အတိုက်အခံတွေကို ပိုမိုဖမ်းဆီးနှိမ်နင်းလာပါတယ်။
စစ်ပွဲစတင်ချိန်ကစပြီး အနည်းဆုံး လူ ၂၁ ဦး ကွပ်မျက်ခံခဲ့ရသလို လူ ၄,၀၀၀ ကျော် ဖမ်းဆီးခံထားရတယ်လို့ ကုလသမဂ္ဂ လူ့အခွင့်အရေးဆိုင်ရာ အကြီးအကဲက ထုတ်ဖော်ပြောကြားပါတယ်။
အမေရိကန်ရဲ့ ရေတပ်ပိတ်ဆို့မှုတွေကြောင့် ဟော်မုဇ်ရေလက်ကြားကနေ ကုန်သွယ်မှုတွေ ရပ်တန့်နေပြီး အီရန်ပြည်သူတွေဟာ စီးပွားရေးအရ အခက်အခဲများစွာနဲ့ ရင်ဆိုင်နေရပါတယ်။
