Border News Agency
အမေရိကန်၊မေ ၉။
အမေရိကန်စစ်တပ်ဟာ အီရန်ဆိပ်ကမ်းတွေကို ပိတ်ဆို့ထားတဲ့ကြားက တိုးထွက်ဖို့ ကြိုးစားတဲ့ ဆီတင်သင်္ဘောတွေကို မေလ ၈ ရက်နေ့မှာ လေကြောင်းကနေ ထပ်မံဗုံးကြဲတိုက်ခိုက်လိုက်ပါတယ်။
ဟောမုဇ်ရေလက်ကြားအတွင်း အီရန်ကို ပြန်ဝင်ဖို့ ကြိုးစားနေတဲ့ အလွတ်လိုက် ဆီတင်သင်္ဘောအုပ်စုကို ပစ်မှတ်ထားတိုက်ခိုက်ခဲ့တာ ဖြစ်ပါတယ်။
အမေရိကန်ဦးဆောင်တဲ့ အင်အားစုတွေဟာ အီရန်ဆိပ်ကမ်းတွေထဲ အဝင်အထွက်လုပ်မယ့် ဆီတင်သင်္ဘော ၇၀ ကျော်ကို ပိတ်ဆို့တားဆီးထားပါတယ်။
အဲဒီသင်္ဘောတွေဟာ အမေရိကန်ဒေါ်လာ ၁၃ ဘီလီယံကျော် တန်ဖိုးရှိတဲ့ အီရန်ရေနံတွေကို တင်ဆောင်နိုင်တဲ့ စွမ်းအားရှိတာကြောင့် အခုလို ပိတ်ဆို့ဖြတ်တောက်နေတာလို့ အမေရိကန်အလယ်ပိုင်းစစ်ဌာနချုပ်က ဆိုပါတယ်။
အခုတိုက်ခိုက်မှုနဲ့ ပတ်သက်ပြီး အမေရိကန်သမ္မတ ဒေါ်နယ်ထရမ့်ကတော့ အပစ်အခတ်ရပ်စဲရေး ပျက်ပြားသွားတာမျိုး မဟုတ်ဘဲ “အချစ်လက်ဆောင် (love taps)အဆင့်လောက်ပဲ ရှိတယ်လို့ ပေါ့ပေါ့ပါးပါးပဲ တုံ့ပြန်ပြောဆိုထားပါတယ်။
ပြီးခဲ့တဲ့ ကြာသပတေးနေ့ညက အမေရိကန်ရေတပ်သင်္ဘောတွေ တိုက်ခိုက်ခံရမှု ရှိခဲ့ပေမယ့် အပစ်အခတ်ရပ်စဲရေးကတော့ ဆက်ရှိနေဆဲလို့ သူက ဆိုပါတယ်။
ဒါပေမယ့် နိုင်ငံတကာစစ်ရေးလေ့လာသူတွေကတော့ အခုလို ပိတ်ဆို့မှုတွေနဲ့ ခဏခဏ ဖြစ်နေတဲ့ ထိတွေ့တိုက်ခိုက်မှုတွေကြောင့် မတော်တဆ စစ်ပွဲကြီးတခုဆီကို ဦးတည်သွားမှာကို စိုးရိမ်နေကြပါတယ်။
အမေရိကန်ဟာ ပြီးခဲ့တဲ့ဧပြီလ ၁၃ ရက်နေ့ကတည်းက စစ်သည်အင်အား ၁၅,၀၀၀ ကျော်သုံးပြီး ဒီပိတ်ဆို့မှုကို လုပ်ဆောင်နေတာပါ။
အီရန်ဘက်ကတော့ ဒီပိတ်ဆို့မှုကို ဖောက်ထွက်ဖို့ ကြိုးစားနေသလို အမေရိကန်ရဲ့ တိုက်ခိုက်မှုတွေကြောင့် အခြေအနေက ပိုပြီး တင်းမာလာနေပါတယ်။
တကယ်လို့ သဘောတူညီချက် မရရှိဘူးဆိုရင် အရင်ကထက် ပိုပြင်းထန်တဲ့ ဗုံးကြဲမှုတွေ ကြုံရမယ်လို့လည်း ထရမ့်က သတိပေးထားပါတယ်။
