Border News Agency
မကွေး၊မေ ၉။
မကွေးတိုင်း၊ဂန့်ဂေါမြို့နယ်တောင်ပိုင်းတိုက်နယ်အတွင်းမှာရှိတဲ့ အသက် ၁၈ နှစ်ကနေ ၃၅ နှစ်ကြားလူငယ်တွေအနေနဲ့ ကျန်းမာရေးကိစ္စကလွဲလို့ ခရီးမသွားကြဖို့ မြို့နယ်အုပ်ချုပ်ရေး၊ကာကွယ်ရေးနဲ့ လုံခြုံရေးအဖွဲ့တွေက သတိပေးထားပါတယ်။
အဲဒီအသက်အရွယ်သတ်မှတ်ချက်အတွင်းမှာရှိတဲ့ အမျိုးသား၊အမျိုးသမီးတွေဟာ ကျန်းမာရေးကြောင့် ခရီးသွားဖို့လိုလာရင် မိမိတို့ကျေးရွာကနေ ထောက်ခံချက်တောင်းရမယ်လို့ဆိုပါတယ်။
အဲဒီအပြင် ခရီးသွားပြီးရင် အမှန်တကယ် ပြန်လာပါမယ်ဆိုတဲ့ ဝန်ခံကတိပြုချက်ကိုပါ ပေးရမှာဖြစ်တယ်လို့လည်းဆိုပါတယ်။
တကယ်လို့သတ်မှတ်ထားတဲ့ တလအတွင်း ပြန်မရောက်လာတာမျိုး ဒါမှမဟုတ် ကျန်းမာရေးကိစ္စမဟုတ်ဘဲ လိမ်လည်ပြီး ထောက်ခံချက်ပေးတဲ့ တာဝန်ခံတွေရှိရင်လည်း ထိထိရောက်ရောက် အရေးယူသွားမယ်လို့လည်းဆိုပါတယ်။
မှောင်ခိုလမ်းက ခိုးထွက်တာ ဒါမှမဟုတ် ဘာသာရေးအကြောင်းပြပြီး ခရီးသွားဖို့ ကြိုးစားတာမျိုးတွေ ရှိလာရင်လည်း ကျန်ရစ်တဲ့ မိသားစုဝင်တွေကို တာဝန်ယူခိုင်းပြီး အရေးယူဆောင်ရွက်သွားမယ်လို့ ဆိုပါတယ်။
တပ်ရင်းတပ်ဖွဲ့ဝင်တွေရဲ့ မိသားစုဝင်တွေ ခရီးသွားချင်တယ်ဆိုရင်လည်း သက်ဆိုင်ရာ တာဝန်ရှိသူတွေဆီက ထောက်ခံချက်အစစ်အမှန် ပါရမှာဖြစ်ပြီး ရပ်ကျေးတာဝန်ခံတွေက သေချာစိစစ်ပြီးမှ ခရီးသွားခွင့် ပေးမယ်လို့လည်းဆိုပါတယ်။
