Border News Agency
ဗင်နိီဇွဲလား၊ဇွန် ၂၇။
ဗင်နီဇွဲလားနိုင်ငံမြို့တော်ကရာကတ်စ်အနီးမှာ ဇွန်လ ၂၄ ရက်နေ့ကလှုပ်ခတ်ခဲ့တဲ့ အင်အားပြင်း မြေငလျင်နှစ်ခုကြောင့် လက်ရှိအချိန်အထိ သေဆုံးသူအရေအတွက်ဟာ ၅၈၉ ဦးအထိ ရှိလာပြီလို့ ယာယီသမ္မတ ဒယ်လ်စီရိုဒရီဂွက်ဇ်က တရားဝင် အတည်ပြုထုတ်ပြန်လိုက်ပါတယ်။
မြေငလျင်ဒဏ်ကြောင့် ပြိုကျပျက်စီးသွားတဲ့ အဆောက်အအုံ အပျက်အစီးပုံတွေအောက်မှာ လူပေါင်းထောင်နဲ့ချီပြီး ပျောက်ဆုံးနေဆဲဖြစ်တာကြောင့် ရှာဖွေကယ်ဆယ်ရေးလုပ်ငန်းတွေ ဆက်လက်လုပ်ဆောင်နေချိန်မှာ သေဆုံးသူစာရင်းဟာ ဒီထက်မက ထပ်မံမြင့်တက်လာနိုင်တယ်လို့ အာဏာပိုင်တွေက သတိပေးထားပါတယ်။
ငလျင်ဗဟိုချက်ဟာ ကရာကတ်စ်မြို့ရဲ့ အနောက်ဘက် ကမ်းရိုးတန်းမြို့ဖြစ်တဲ့ မိုရွန်မြို့အနီးမှာ ဖြစ်ပေါ်ခဲ့တာဖြစ်ပြီး မြေငလျင်ကြောင့် အဆိုးရွားဆုံး ပျက်စီးဆုံးရှုံးခဲ့ရတဲ့ လာဂွိုင်ရာ ပြည်နယ်ကို ဘေးအန္တရာယ်ဇုန်အဖြစ် သတ်မှတ်ကာ နိုင်ငံတဝှမ်းအရေးပေါ်အခြေအနေ ကြေညာထားရပါတယ်။
မြို့တော်အတွင်းမှာလည်း ၂၂ ထပ် အဆောက်အအုံကြီးတွေအပါအဝင်အဆောက်အအုံ ဒါဇင်ပေါင်းများစွာ ပြိုကျပျက်စီးခဲ့ရပြီး လေဆိပ်နဲ့ မြေအောက်ရထားပြေးဆွဲမှုတွေ ဆိုင်းငံ့ထားရသလို လျှပ်စစ်မီးနဲ့ ဖုန်းလိုင်းတွေလည်း နေရာအနှံ့အပြားမှာ ပြတ်တောက်နေဆဲ ဖြစ်ပါတယ်။
လက်ရှိမှာတော့ နိုင်ငံတကာက ကူညီကယ်ဆယ်ရေးအဖွဲ့တွေနဲ့အတူ ဒေသခံအာဏာပိုင်တွေပူးပေါင်းပြီး အပျက်အစီးများကြားက ပိတ်မိနေသူတွေကို အချိန်နဲ့တပြေးညီကယ်ထုတ်နိုင်ဖို့အတွက် ရှာဖွေကယ်ဆယ်ရေးလုပ်ငန်းတွေကို အရှိန်အဟုန်မြှင့် ဆက်လက်လုပ်ဆောင်နေကြပါတယ်။
