Border News Agency
ကျိန္တလီ၊ ဇွန် ၂၇။
အာရက္ခတပ်တော်(AA)ထိန်းချုပ်ထားတဲ့၊ ဂွမြို့နယ်၊ကျိန္တလီမြို့နဲ့ရေကျော်ရွာကို အာဏာသိမ်းစစ်တပ်လေကြောင်းတိုက်ခိုက်လို့ အရပ်သား ၆ ဦးဒဏ်ရာရသွားခဲ့တယ်လို့ ဒေသခံတွေကဆိုကြပါတယ်။
အဲဒီ ကျိန္တလီမြို့နဲ့ရေကျော်ရွာကို ဇွန်လ ၂၆ ရက်၊ညနေ ၃နာရီအချိန်ခန့်က အာဏာသိမ်းစစ်တပ်လေကြောင်းတိုက်ခဲ့တာလို့ ဒေသခံတွေကဆိုပါတယ်။
အဲဒီလိုတိုက်ခိုက်ခဲ့တာကြောင့် ရေကျော်ရွာမှ အသက်၁၀နှစ်အရွယ်မောင်ထက်မြတ်သူ၊ အ
သက်၃၅ နှစ်အရွယ် ဦးဆန်းမင်း၊အသက် ၇၅ နှစ်အရွယ် ဦးဖိုးနီ၊အသက် ၁၃ နှစ်အရွယ်မဆုမြတ်မွန်၊ အသက်၄၅ နှစ်အရွယ်မောင်ဝေရာမင်းနဲ့ ကျိန္တလီမြို့ အမှတ် ၂ ရပ်ကွက်က အသက်၁၈နှစ်အရွယ် မဆောင်းဟေမာန်ခင်ဒဏ်ရာရသွားခဲ့တာပါ။
အဲဒီ ဂွမြို့နယ်၊ကံ့ကော်တောင်ရွာကို ဇွန်လ ၂၄ ရက်နေ့ကလည်း အာဏာသိမ်းစစ်တပ်လေကြောင်းတိုက်ခိုက်မှုနှစ်ကြိမ်ပြုလုပ်ခဲ့လို့အရပ်သား ၄ ဦးဒဏ်ရာရသွားခဲ့ပါတယ်။
အဲဒီအပြင် ကျိန္တလီမြို့ ၊အမှတ်၂ ရပ်ကွက်၊ သိပ္ပံလမ်းနဲ့ကိန္နရီလမ်းကို ဇွန်လ ၂၀ ရက်နေ့ကလည်းပေါင် ၅၀၀ဗုံးနှစ်လုံးနဲ့တိုက်ခိုက်ခဲ့လို့ ဒေသခံ ၂ ဦးဒဏ်ရာရသွားခဲ့ပါသေးတယ်။
အာဏာသိမ်းစစ်တပ်ဟာ အာရက္ခတပ်တော်ထိန်းချုပ်ထားတဲ့ မြို့တွေကို စစ်သင်္ဘောတွေက လက်နက်ကြီး၊လေယာဉ်တွေနဲ့ဆက်တိုက်ပစ်ခတ်နေလို့ ပြည်သူတွေအတွက် အန္တရာယ်အမြင့်ဆုံးဖြစ်နေတယ်လို့ အာရက္ခတပ်တော်က ဆိုပါတယ်။
လူနေထူထပ်တဲ့ အရပ်သားပြည်သူတွေနေထိုင်ရာနေရာ၊စာသင်ကျောင်း၊ဆေးရုံ၊ဆေးခန်းနဲ့ သာသနိကအဆောက်အအုံတွေကို အာဏာသိမ်းစစ်တပ်က ရည်ရွယ်ချက်ရှိရှိရေကြောင်း၊လေကြောင်းက တိုက်ခိုက်မှု ပြုလုပ်နေတယ်လို့ ဆိုပါတယ်။
အဲဒါကြောင့် ပင်လယ်ကမ်းနီးမြို့၊ ရွာတွေက မိဘပြည်သူတွေဟာ အာဏာသိမ်းစစ်တပ်ရေကြောင်း၊လေကြောင်းတိုက်ခိုက်မှုအန္တရာယ်ကို အထူးသတိထားကြပြီး စစ်ရေးသတိရှိဖို့အသိပေးထားပါတယ်။
