Border News Agency
ကျောက်တော်၊ဇွန် ၂၇။
အာရက္ခပြည်သူ့တော်လှန်ရေးအစိုးရဟာ တရားဥပဒေစိုးမိုးရေးနဲ့ ပြည်သူ့လုံခြုံရေး (DLEPS)တပ်ဖွဲ့ဝင်တွေကို အရည်အချင်းနဲ့စွမ်းရည်တိုးမြှင့်ပေးတာတွေလုပ်နေပါတယ်။
အဲဒီတပ်ဖွဲ့ဝင်တွေဟာ သတ်မှတ်ထားတဲ့ အရည်အချင်းအလိုက် သင်တန်းတွေ တက်ရောက်ပြီး တရားဥပဒေစိုးမိုးရေးလုပ်ငန်းတွေကို ပိုမိုထိရောက်အောင် လုပ်ဆောင်လာနိုင်ကြတယ်လို့ ဆိုကြပါတယ်။
”ပြီးခဲ့တဲ့၂၀၂၅ ခုနှစ်အလယ်ပိုင်းလောက်ကတည်းက တပ်ဖွဲ့ဝင်တွေကို သင်တန်းတွေ ဆက်တိုက်ခေါ်ပြီး စွမ်းရည်မြှင့်ပေးနေတာပါ။အရာရှိသင်တန်းတွေဖြစ်တဲ့ ဒုတိယဒီလပ်အုပ် (ဒုရဲအုပ်) သင်တန်း၊ အမှုစစ်စွမ်းရည်မြှင့်သင်တန်း၊ နယ်ထိန်းခေါင်းဆောင်သင်တန်းနဲ့ တခြားလုပ်ငန်းစွမ်းရည်မြှင့်သင်တန်းတွေကို အဓိကပေးနေတာ ဖြစ်ပါတယ်။”လို့ ဌာနနဲ့ နီးစပ်သူတဦးက Border News Agency ကိုပြောပါတယ်။
အာရက္ခပြည်သူ့တော်လှန်ရေးအစိုးရဟာ တရားဥပဒေစိုးမိုးရေးနဲ့ ပြည်သူ့လုံခြုံရေးဌာနကို ပြီးခဲ့တဲ့ ၂၀၂၁ ခုနှစ်မှာ စတင်ဖွဲ့စည်းခဲ့တာဖြစ်ပြီး ၂၀၂၄ ခုနှစ် ရောက်မှသာ ဒီလပ်လုပ်ငန်းတွေကို တနိုင်ငံလုံးအတိုင်းအတာနဲ့ ပိုပြီးတွင်တွင်ကျယ်ကျယ် လုပ်ဆောင်နိုင်ခဲ့တာပါ။
အဲဒီဌာနမှာ လိုအပ်တဲ့တပ်ဖွဲ့ဝင်အင် အားမပြည့်စုံသေးပေမယ့် ပြည်သူတွေအားကိုးရပြီးဂုဏ်သိက္ခာရှိတဲ့ဌာနတခုဖြစ်လာဖို့ အလေးထားဆောင်ရွက်နေတယ်လို့ ဆိုကြပါတယ်။
”ဝန်ထမ်းအင်အား မပြည့်သေးပေမယ့် ဂုဏ်သိက္ခာရှိတဲ့ ရဲတပ်ဖွဲ့ဖြစ်ဖို့က အဓိကမို့လို့ စည်းကမ်းပိုင်းကို သေချာကိုင်တွယ်ပါတယ်။ DLEPS စည်းကမ်းထိန်းသိမ်းရေးဥပဒေနဲ့အညီ စည်းကမ်းချိုးဖောက်တဲ့ တပ်ဖွဲ့ဝင်တွေရှိလာရင်လည်း ထိရောက်တဲ့ အပြစ်ပေးအရေးယူတာတွေ လုပ်နေပါတယ်။” လို့ သူကဆက်ပြောပါတယ်။
အာရက္ခပြည်သူ့တော်လှန်ရေးအစိုးရဟာ ဒေသတွင်းတရားဥပဒေစိုးမိုးရေး ပိုမိုခိုင်မာလာစေဖို့အတွက်ဒီလပ်ရဲ့ ကဏ္ဍစုံစွမ်းရည်မြှင့်တင်ရေးကို အရှိန်အဟုန်မြှင့် ဆက်လုပ်နေတယ်လို့ ဆိုပါတယ်။
