Border News Agency
မလေးရှား၊ဇွန် ၂၆။
မလေးရှားနိုင်ငံ၊လူဝင်မှုကြီးကြပ်ရေးထိန်းသိမ်းရေးစခန်းတွေမှာ အကြောင်းအမျိုးမျိုးကြောင့် ဖမ်းဆီးခံထားရပြီး နေရပ်ပြန်ဖို့ စောင့်ဆိုင်းနေတဲ့ မြန်မာနိုင်ငံသား ၈၀၀ နီးပါးကို ဇွန်လအတွင်း မြန်မာနိုင်ငံသို့ပြန်လည်ပို့ဆောင်ပေးခဲ့တယ်လို့ ကွာလာလမ်ပူမြို့ရှိ မြန်မာသံရုံးက ထုတ်ပြန်ပါတယ်။
မြန်မာသံရုံးဟာ နေရပ်ပြန်မယ့်သူတွေရဲ့ အမည်စာရင်း၊ ပြန်ပို့မယ့်ရက်နဲ့ လေယာဉ်အချိန်တွေကို ဇွန်လ ၄ ရက်နေ့ကစတင်ပြီး လူမှုကွန်ရက်စာမျက်နှာကနေတဆင့် အသိပေးထုတ်ပြန်ခဲ့တာ ဖြစ်ပါတယ်။
ဇွန်လ ၉ ရက်နေ့ကနေ ၂၄ ရက်နေ့အထိ Bidor၊ Bukit Jalil၊ Belantik၊ Kemayan၊ Lenggeng၊ Tanah Merah၊ Ajil၊ Beranang၊ KLIA၊ Langkap၊ Pekan Nenas၊ Perlis နဲ့ Melaka စတဲ့ စခန်းအသီးသီးက မြန်မာနိုင်ငံသားတွေကို လေကြောင်းလိုင်းတွေနဲ့ အသုတ်လိုက် ခွဲပြီး ပြန်လည်ပို့ဆောင်ခဲ့တာ ဖြစ်ပါတယ်။
အဲဒီ နေရပ်ပြန်ကြသူတွေရဲ့ လေယာဉ်လက်မှတ် ကုန်ကျစရိတ်တွေကိုတော့ အများအားဖြင့် သူတို့မိသားစုဝင်တွေရဲ့ ထောက်ပံ့ငွေနဲ့ ကျခံခဲ့ကြရပြီး လိုအပ်တဲ့ အချို့ကိစ္စရပ်တွေမှာတော့ မြန်မာသံရုံးက ကူညီညှိနှိုင်း ဆောင်ရွက်ပေးခဲ့တယ်လို့ဆိုပါတယ်။
အခုလို နေရပ်ပြန်ပို့ခံရတဲ့ မြန်မာနိုင်ငံသားအားလုံးကို မလေးရှားလူဝင်မှုကြီးကြပ်ရေးဌာနရဲ့ နာမည်ပျက်စာရင်း (Blacklist) ထဲ ထည့်သွင်းထားမှာဖြစ်လို့ သတ်မှတ်ကာလအတွင်း မလေးရှားနိုင်ငံထဲကို ပြန်လည်ဝင်ရောက်ခွင့် ရရှိတော့မှာ မဟုတ်ပါဘူး။
မလေးရှားနိုင်ငံအတွင်း အဖမ်းဆီးခံရသူ အများစုဟာ တရားဝင်အထောက်အထားမရှိဘဲ နေထိုင်တာ၊အလုပ်လုပ်ကိုင်တာတွေကြောင့် ဖြစ်ပြီး အချို့ကတော့ မူးယစ်ဆေးဝါးနဲ့ အခြားဥပဒေချိုးဖောက်မှုတွေကြောင့် ထိန်းသိမ်းခံခဲ့ရတာဖြစ်တယ်လို့ သိရပါတယ်။
