Border News Agency
ထိုင်း၊ဇွန် ၂၆။
ထိုင်းနိုင်ငံ၊မယ်ဆိုင်မြို့ ထိုင်း-မြန်မာချစ်ကြည်ရေးတံတားအမှတ် ၁ ပေါ်မှာဂျပ်ဖာပုံးတွေထဲထည့်ပြီး ဘတ် ၂၃ သန်းကျော်သယ်ဆောင်လာတဲ့ အသက် ၃၁ နှစ်အရွယ် မြန်မာအမျိုးသားတဦးကို ထိုင်းအကောက်ခွန်အရာရှိတွေက ဖမ်းဆီးလိုက်ပါတယ်။
ထိုင်းဘက်ခြမ်းကနေ မြန်မာနိုင်ငံ၊ တာချီလိတ်မြို့ဘက်ကို မောင်းနှင်မယ့် မြန်မာလိုင်စင်ပါ ကိုယ်ပိုင်ကားတစီးကို ဇွန်လ ၂၃ ရက်နေ့က စစ်ဆေးရာကနေ ဖမ်းဆီးရမိခဲ့တာ ဖြစ်ပါတယ်။
အရာရှိတွေက အဲဒီကားပေါ်ပါလာတဲ့ ငါးခြောက်ဂျပ်ဖာနဲ့ အာလူးဂျပ်ဖာတွေကို ဖွင့်လှစ်စစ်ဆေးခဲ့ရာမှာ ပလတ်စတစ်အိတ်တွေနဲ့ ထုပ်ပိုးထားတဲ့ ဘတ် ၁,၀၀၀တန် ငွေစက္ကူ စုစုပေါင်း ၂၃,၀၂၃,၀၀၀ (ဘတ် ၂၃ သန်းကျော်) ကို ရှာဖွေတွေ့ရှိခဲ့တာပါ။
အဲဒီ မြန်မာအမျိုးသားဟာ အကောက်ခွန်လုပ်ထုံးလုပ်နည်းတွေကို မလုပ်ဆောင်ဘဲ ထိုင်းငွေကြေးကို ပြည်ပသို့ မှောင်ခိုထုတ်ယူဖို့ ကြိုးပမ်းခဲ့တာကြောင့် ထိုင်းနိုင်ငံရဲ့ အကောက်ခွန်အက်ဥပဒေနဲ့ ငွေလဲလှယ်မှုထိန်းချုပ်ရေးအက်ဥပဒေတွေကို ချိုးဖောက်ခဲ့တာ ဖြစ်ပါတယ်။
အဲဒီ ဖမ်းဆီးရမိတဲ့ မြန်မာနိုင်ငံသား ယာဉ်မောင်းကို ဥပဒေအရ ဆက်လက်အရေးယူဖို့နဲ့ ကွင်းဆက်တွေကို ဖော်ထုတ်နိုင်ဖို့အတွက် မယ်ဆိုင်ရဲစခန်းကို လွှဲပြောင်းထားတယ်လို့ သိရပါတယ်။
