Border News Agency
ထိုင်း၊ သြဂုတ် ၁၃။
ထိုင်းနိုင်ငံ၊နခွန်စဝမ်ခရိုင်၊တာကလီမြို့နယ်၊အမှတ် ၁၁ အဝေးပြေးလမ်းမပေါ်မှာ ကားနှစ်စီးနဲ့တရားမဝင် ဝင်ရောက်လာတဲ့မြန်မာလုပ်သား တဆယ့်လေးဦးကိုဖမ်းဆီးခဲ့တယ်လို့ ပြစ်မှုနှိမ်နင်းရေး ရဲတပ်ဖွဲ့ (CIB) က သြဂုတ်လ ၁၃ ရက်၊ဒီနေ့ထုတ်ပြန်ပါတယ်။
အဲဒီလမ်းမပေါ်မှာ သြဂုတ်လ ၁၂ ရက်၊ညအချိန်မှာ အရှိန်ပြင်းစွာ မောင်းနှင်လာတဲ့ကားနှစ်စီးကို တားဆီးစစ်ဆေးရာမှယာဉ်မောင်းတွေနဲ့အတူ တရားမဝင် ဝင်ရောက်လာတဲ့ မြန်မာလုပ်သားတဆယ့်လေးဦးကို စစ်ဆေးတွေ့ရှိခဲ့ရတာပါ။
ယာဉ်မောင်းတွေဟာ အလုပ်သမား တဦးကို ပို့ဆောင်ခ ဘတ်ကိုးရာကနေ တထောင်ငါးရာအထိ ရရှိခဲ့တယ်လို့ ဝန်ခံထားကြပြီး မြန်မာလုပ်သားတွေကလည်း ထိုင်းနိုင်ငံအတွင်း အလုပ်လုပ်ကိုင်ဖို့အတွက် နယ်စပ်ကနေဝင်ရောက်လာခဲ့ကာ ပွဲစားခ ဘတ် နှစ်သောင်းစီပေးခဲ့ရတယ်လို့ ထွက်ဆိုထားကြပါတယ်။
ဖမ်းဆီးရမိသူတွေအားလုံးကို ဥပဒေအတိုင်း ဆက်လက်အရေးယူဆောင်ရွက်နိုင်ဖို့ စီစဉ်နေတယ်လို့ CIB က အသိပေးထားပါတယ်။
