Border News Agency
မြောက်ဦး၊ဇွန် ၂၇။
အာရက္ခပြည်သူတွေရဲ့ ကျန်းမာရေးကို ဒုက္ခပေးနိုင်တဲ့ဓာတုပစ္စည်းပါအလှကုန်တွေ ဈေးကွက်ထဲ မရောင်းရအောင် အာရက္ခပြည်သူ့ကျန်းမာရေးဌာန (FDA) က အလှကုန်ဆိုင်တွေကို လိုက်လံစစ်ဆေးနေပါတယ်။
အဲဒီမြောက်ဦးမြို့မဈေးထဲကအလှကုန်ဆိုင် ၂၀ ကို ဇွန်လ ၂၄ ရက်နေ့ကဝင်စစ်တဲ့အခါ သုံးစွဲဖို့မသင့်တဲ့တားမြစ်အလှကုန်ရောင်းတဲ့ဆိုင် ၉ ဆိုင်နဲ့ သက်တမ်းကုန်ပစ္စည်းရောင်းတဲ့ဆိုင် ၃ ဆိုင်ကို မိခဲ့လို့ ပစ္စည်းတွေကို ချက်ချင်းသိမ်းပြီး ဆိုင်ပိုင်ရှင်တွေကို ခံဝန်ကတိ အတင်းထိုးခိုင်းခဲ့ပါတယ်။
အဲဒီအပြင် ကျောက်တော်မြို့ရှိအလှကုန်ဆိုင် ၁၅ ဆိုင်ကို ဇွန်လ ၁၃ ရက်နေ့ကလည်းစစ်ဆေးရာမှာ တားမြစ်အလှကုန်ရောင်းတဲ့ဆိုင် ၁၀ ဆိုင်နဲ့ သက်တမ်းကုန်ဆိုင် ၁ ဆိုင်အထိ တွေ့ရှိခဲ့ပါသေးတယ်။
ဒီနှစ်ဖေဖော်ဝါရီလတုန်းက အာဆီယံဒေသတွင်းနိုင်ငံတွေမှာ သုံးစွဲဖို့ (လုံးဝ) မသင့်ဘူးလို့ တားမြစ်ထားတဲ့ ထိုင်း၊ ဖိလစ်ပိုင်၊ အင်ဒိုနီးရှား၊ မလေးရှားနဲ့ ဘရူနိုင်းနိုင်ငံထုတ် အလှကုန် ၂၉ မျိုး ရှိနေပါတယ်။
အဲဒီပစ္စည်းတွေဟာ မြန်မာပြည်ဘက်ကနေ နည်းမျိုးစုံနဲ့ ဝင်လာနိုင်လို့ ပြည်သူတွေအနေနဲ့ အထူးသတိထားကြဖို့ လိုနေတာပါ။
အဲဒီလို တားမြစ်ဓာတုပစ္စည်းပါတဲ့ အလှကုန်တွေကို ရေရှည်သုံးစွဲမိရင် အရေပြားယားယံတာ၊ ရောင်ရမ်းတာ၊ ခေါင်းကိုက်တာ၊ စိတ်ကျရောဂါ ခံစားရတာတွေအပြင် ပိုဆိုးရင် ကျောက်ကပ်ပျက်စီးတာအထိ ဖြစ်သွားနိုင်တယ်လို့ သိရပါတယ်။
