Border News Agency
ထိုင်း၊မေ ၁၂။
ထိုင်း-မြန်မာနယ်စပ် ချင်းမိုင်ခရိုင်၊မယ်အေးမြို့နယ်ထဲမှာ မူးယစ်ဆေးဝါးအများအပြားကို ထိုင်းအထူးတပ်ဖွဲ့က မေလ ၁၀ ရက်၊ညပိုင်းမှာ သိမ်းဆည်းရမိခဲ့တယ်လို့ ထိုင်းတော်ဝင်တပ်ဖွဲ့က ထုတ်ပြန်ပါတယ်။
အဲဒီ အင်အား ၅ ဦးကနေ ၁၀ ဦးလောက်ရှိတဲ့ အဖွဲ့တစ်ဖွဲ့ဟာ တောလမ်းအတိုင်း မူးယစ်ဆေးဝါးတွေ သယ်ဆောင်လာတာကို နယ်စပ်ကင်းလှည့်တပ်ဖွဲ့က စစ်ဆေးဖော်ထုတ်နိုင်ခဲ့တာပါ။
အဲဒီနယ်မြေကို ပြန်လည်စစ်ဆေးတဲ့အခါမှာကျောပိုးအိတ်ပုံစံ ပြုလုပ်ထားတဲ့ ဆေးအိတ် ၇ အိတ်ကို ရှာတွေ့ခဲ့တယ်လို့ဆိုပါတယ်။
အဲဒီအိတ်တွေထဲမှာ စိတ်ကြွဆေးပြား၁ သန်းကျော်နဲ့အတူ အလေးချိန် ၁၂.၈ ကီလိုဂရမ်ရှိတဲ့ ဘိန်းစိမ်းတွေကိုပါ သိမ်းဆည်းရမိခဲ့တယ်လို့ ဆိုပါတယ်။
အခင်းဖြစ်ပွားရာနေရာမှာ မူးယစ်ဆေးဝါးတွေတင်မကဘဲ လုပ်သေနတ် ၁လက်နဲ့ လက်နက်ကြီးကျည်ခွံ ၄ ခုကိုလည်း တွေ့ရှိခဲ့တယ်လို့ ထိုင်းအာဏာပိုင်တွေက ဆိုပါတယ်။
အဲဒီပစ္စည်းတွေကို မူးယစ်မှောင်ခိုအဖွဲ့က တောလမ်းအတိုင်း သယ်ဆောင်လာချိန်မှာ ထိုင်းစစ်တပ်နဲ့ တိုးပြီး ကျန်ရစ်ခဲ့တာပါ။
အခုဖမ်းမိတဲ့ မူးယစ်ဆေးဝါးတွေနဲ့ ပတ်သက်ပြီး ထိုင်းအထူးတပ်ဖွဲ့ တာဝန်ရှိသူတွေက အခင်းဖြစ်ရာနေရာကို ကိုယ်တိုင်သွားရောက် စစ်ဆေးခဲ့သလို မီဒီယာတွေကိုလည်း အသေးစိတ် ရှင်းလင်းပြောကြားခဲ့ပါတယ်။
အဲဒီ သိမ်းဆည်းရမိတဲ့ သက်သေခံပစ္စည်းအားလုံးကိုတော့ ဥပဒေအရ အရေးယူနိုင်ဖို့ မယ်အေးရဲစခန်းကို လွှဲပြောင်းပေးလိုက်ပြီလို့ဆိုပါတယ်။
ထိုင်းစစ်တပ်က နယ်စပ်တလျှောက်မှာ မူးယစ်ဆေးဝါး မှောင်ခိုကူးတာတွေကို တားဆီးဖို့ ကင်းလှည့်စစ်ဆေးတာတွေကို ပိုပြီးတိုးမြှင့် လုပ်ဆောင်နေပါတယ်။
အဲဒီ ထွက်ပြေးလွတ်မြောက်သွားတဲ့ အဖွဲ့ဝင်တွေကိုလည်း ဖမ်းမိနိုင်ဖို့အတွက် နယ်မြေခံ ရဲတပ်ဖွဲ့တွေနဲ့ ပူးပေါင်းပြီး ဆက်လက်စုံစမ်းနေတယ်လို့လည်းဆိုပါတယ်။
