Border News Agency
ရနောင်း၊ မေ ၁၂။
ထိုင်းနိုင်ငံ၊ ရနောင်းခရိုင်၊ ဘန်ရင်ဒေသမှာရှိတဲ့ မြန်မာနိုင်ငံသားတဦးပိုင်တဲ့ မှောင်ခိုလျှပ်စစ်ပစ္စည်း ဂိုဒေါင်တခုကို ထိုင်းဝန်ကြီးချုပ်အနုတင်ချန်ဗီရကူးလ်က မေ ၁၀ ရက်နေ့က ကိုယ်တိုင်သွားရောက်စစ်ဆေးခဲ့ပါတယ်။
အဲဒီဂိုဒေါင်ထဲမှာ ဘတ်သန်း ၅၀ နီးပါး တန်ဖိုးရှိတဲ့မှောင်ခိုပစ္စည်းတွေ သိမ်းဆည်းရမိခဲ့တာဖြစ်ပြီး ဝန်ကြီးချုပ်ကိုယ်တိုင် အံ့အားသင့်သွားရတဲ့အထိ ပစ္စည်းတွေကများပြားနေတာပါ။
အဲဒီ ဂိုဒေါင်အတွင်းမှာတော့ စက်ရုံသုံးမီးစက်တွေ၊ အဲယားကွန်းအလုံးပေါင်း ၂,၀၀၀ နီးပါးနဲ့ တခြားလူသုံးကုန်ပစ္စည်းအများအပြားကို တွေ့ရှိခဲ့တာဖြစ်ပြီး အခုတော့ရဲတပ်ဖွဲ့က ပစ္စည်းအားလုံးကိုချိတ်ပိတ်သိမ်းဆည်းလိုက်ပါတယ်။
ဒီကုန်ပစ္စည်းတွေကို ထိုင်းနိုင်ငံအတွင်းဖြတ်သန်းသွားမယ့် ကုန်စည်အဖြစ်ကြေညာထားပေမယ့် သတ်မှတ်ရက်ထက်ကျော်လွန်နေတာကြောင့် အခုလိုဖမ်းဆီးခံရတာဖြစ်ပါတယ်။
အဲဒီလိုစစ်ဆေးရေးအဖွဲ့တွေစစ်နေတုန်းမှာ အမည်မသိဖုန်းခေါ်ဆိုမှုတွေရောက်လာပြီး ရဲအရာရှိကြီးတွေနဲ့သိကျွမ်းတယ်ဆိုကာဂိုဒေါင်ကနေ အမြန်ထွက်သွားဖို့ ခြိမ်းခြောက်တာတွေရှိခဲ့တယ်လို့ ဝန်ကြီးချုပ်ကထုတ်ဖော်ပြောကြားခဲ့ပါတယ်။
ဒါ့အပြင်မြန်မာဘက်ကနေ ဖုန်းခေါ်ဆိုမှုတွေရှိခဲ့ပေမယ့် အဂတိလိုက်စားမှုမရှိဘဲ တာဝန်ထမ်းဆောင်ခဲ့တဲ့အရာရှိတွေကို ဝန်ကြီးချုပ်ကချီးကျူးခဲ့ပါသေးတယ်။
အခုဖမ်းမိတဲ့ပစ္စည်းတွေနဲ့ပတ်သက်ပြီး ပိုင်ရှင်တွေဘက်က အကောက်ခွန်ဆိုင်ရာအထောက်အထားတွေ လာရောက်မပြသနိုင်ရင်တော့ ပစ္စည်းအားလုံးကို နိုင်ငံတော်ပိုင်အဖြစ် သိမ်းဆည်းသွားမှာပါ။
ဒါဟာ လုံခြုံရေးဆိုင်ရာ ခြိမ်းခြောက်မှု ပုံစံသစ်တစ်ခု ဖြစ်တယ်လို့လည်း ထိုင်းအစိုးရအဖွဲ့က သုံးသပ်ထားပါတယ်။
အဲဒီ ဝန်ကြီးချုပ်ကိုယ်တိုင် ရနောင်းခရိုင် အုပ်ချုပ်ရေးမှူး၊ ရဲတပ်ဖွဲ့တာဝန်ရှိသူတွေနဲ့ ပူးပေါင်းပြီး ဒီအမှုကို အနီးကပ် ကြီးကြပ်ဆောင်ရွက်နေပါတယ်။
အဲဒီအပြင်အကောက်ခွန် အရာရှိတွေရဲ့ စုံစမ်းဖော်ထုတ်မှုကြောင့် အခုလို မှောင်ခိုဂိုဒေါင်ကြီးကို ဖော်ထုတ်နိုင်ခဲ့တာ ဖြစ်တယ်လို့လည်း သိရပါတယ်။
