Border News Agency
အီရန်၊ မေ ၁၇။
ဟော်မုဇ်ရေလက်ကြားပိတ်ဆို့မှုကြောင့် ကမ္ဘာ့လောင်စာဆီဈေးတွေတက်ပြီး အမေရိကန်မှာ ငွေကြေးဖောင်းပွမှုနဲ့ချေးငွေအတိုးနှုန်းတွေ စံချိန်တင်မြင့်တက်လာမှာဖြစ်လို့ အမေရိကန်ပြည်သူတွေ စီးပွားရေးပျက်ကပ်ကြုံရလိမ့်မယ်လို့ အီရန်နိုင်ငံခြားရေးဝန်ကြီးက သတိပေးလိုက်ပါတယ်။
အီရန်ဘက်က ရေလက်ကြားအချုပ်အခြာအာဏာကို သူတို့ပဲရချင်ပေမယ့် တခြားပင်လယ်ကွေ့နိုင်ငံတွေကငြင်းဆန်နေပြီး အီရန်ကတော့ သူတို့နဲ့ပူးပေါင်းတဲ့ကုန်သွယ်ရေးသင်္ဘောတွေကိုပဲ ဖြတ်သန်းခွင့်ပေးပြီး အခွန်ကောက်မယ့်စနစ်ကို မကြာခင်မိတ်ဆက်တော့မယ်လို့ ဆိုပါတယ်။
တဖက်မှာလည်းစစ်ပွဲကြောင့် အီရန်နိုင်ငံထဲမှာ ကုန်ဈေးနှုန်းတွေ ၃ ဆလောက်တက်နေပြီး အခြေခံစားသောက်ကုန် ငွေကြေးဖောင်းပွမှုဟာ ၁၁၅ ရာခိုင်နှုန်းအထိရှိနေသလို အီရန်ငွေကြေး (ရီရယ်)ဟာလည်း အမေရိကန် ၁ ဒေါ်လာကို ၁.၈ သန်းအထိ စံချိန်တင်ထိုးကျသွားပါတယ်။
စစ်ပွဲပြန်စနိုင်တယ်ဆိုတဲ့ ကောလာဟလတွေကြားထဲမှာပဲ အီရန်အစိုးရရုပ်သံလိုင်းတွေက အစီအစဉ်မှူးတွေဟာ ရုပ်သံရှိုးတွေမှာ အော်တိုမက်တစ်သေနတ်တွေကိုကိုင်ဆောင်ပြီး နိုင်ငံအတွက် အသက်ပေးဖို့အသင့်ပဲလို့ စစ်ဆော်ဩတာတွေလုပ်လာပါတယ်။
ဒါ့အပြင် ပြီးခဲ့တဲ့ဇန်နဝါရီလတုန်းက အစိုးရဆန့်ကျင်ရေးဆန္ဒပြပွဲတွေကို အမေရိကန်နဲ့ အစ္စရေးတို့ရဲ့ ခြယ်လှယ်မှုလို့ စွပ်စွဲပြီး နှိမ်နင်းခဲ့တာကြောင့် လူထောင်ချီသေဆုံးခဲ့ပါတယ်။
အဲဒါကြောင့်ခုလက်ရှိမှာလည်း အင်တာနက်တွေကို ရက်ပေါင်း ၇၀ ကျော်ကြာပိတ်ထားကာ အစိုးရဆန့်ကျင်သူတွေကို နေ့တိုင်းနီးပါး သေဒဏ်ပေးနေတယ်လို့သိရပါတယ်။
