Border News Agency
မောင်တော၊ ဩဂုတ် ၁၅။
ရခိုင်ပြည်မှနေရပ်စွန့်ခွာသူတွေကို ပြန်လည်လက်ခံရေးအတွက် ပြည်နယ်အတွင်းလုံခြုံရေးအခြေအနေ တိုးတက်ကောင်းမွန်လာမှညှိနှိုင်းပြီး ပြန်လက်ခံသွားမယ်လို့ အာဏာသိမ်းစစ်တပ်ရဲ့ နိုင်ငံခြားရေးဝန်ကြီးဌာနက ဩဂုတ်လ ၁၅ ရက်နေ့မှာ ထုတ်ပြန်ပါတယ်။
ဘင်္ဂလားဒေ့ရှ်ဘက်ကပေးပို့လာတဲ့ လူဦးရေရှစ်သောင်းကျော်ထဲက ငါးသောင်းခွဲကျော်ကိုစိစစ်ခဲ့ရာ ရခိုင်မှာအမှန်တကယ် နေထိုင်ခဲ့သူ သုံးသောင်းကျော်၊အကြမ်းဖက်မှုမှာ ပါဝင်သူလေးထောင်ကျော်နဲ့ နေထိုင်ကြောင်း အထောက်အထားမတွေ့ရသူတ သောင်းသုံးထောင်ကျော်ရှိတယ်လို့ဆိုပါတယ်။
အရင်အစိုးရတွေလက်ထက်မှာလည်း စိစစ်ရေးလုပ်ငန်းစဉ်တွေနဲ့ ပြန်လက်ခံခဲ့ဖူးပြီး ခုအခါရှေ့ပြေးစမ်းသပ်စီမံကိန်းတွေနဲ့ ပြန်လက်ခံနိုင်အောင် တွေ့ဆုံညှိနှိုင်းမှုတွေ ပြင်ဆင်ခဲ့တယ်လို့လည်းဆိုပါတယ်။
နေရပ်စွန့်ခွာသူတွေပြန်လည်လက်ခံရေးဟာ နှစ်နိုင်ငံကြားဖြေရှင်းရမယ့်ကိစ္စဖြစ်ပြီး နိုင်ငံတကာပြဿနာအဖြစ် ပုံဖော်နေတာကို စိတ်မသက်မသာဖြစ်ရကြောင်းနဲ့ စိစစ်ပြီးသူတွေကို လုံခြုံသိက္ခာရှိစွာပြန်လာနိုင်ဖို့ ဘင်္ဂလားဒေ့ရှ်နဲ့ မိတ်ဆွေနိုင်ငံတွေကို ပူးပေါင်းသွားမယ်လို့ဆိုပါတယ်။
အဲဒီအပြင် နေရပ်စွန့်ခွာသူစိစစ်ပြီးသူတွေကို ရခိုင်ပြည်ရဲ့ လုံခြုံရေးအခြေအနေတိုးတက်ကောင်းမွန်လာရင် မြန်မာနိုင်ငံဘက်က ညှိနှိုင်းပြီးပြန်လည်လက်ခံသွားမယ်လို့လည်းပါတယ်။
