Border News Agency
အိန္ဒိယ၊ မေ ၂၅။
အိန္ဒိယနိုင်ငံ၊ မီဇိုရမ်ပြည်နယ်၊ လောင်တလိုင် ခရိုင်အတွင်းမှာ စက်သုံးဆီတွေကို သတ်မှတ်ဈေးထက်ပိုရောင်းတာ၊တရားမဝင်သယ်ယူတာနဲ့ အိမ်နီးချင်းမြန်မာနိုင်ငံအပါအဝင် အခြားနေရာတွေကို ခိုးထုတ်ရောင်းချတာမျိုး မလုပ်ဖို့ အမိန့်ထုတ်လိုက်ပါတယ်။
အဲဒီအမိန့်ကို လောင်တလိုင်ခရိုင် ရာဇဝတ်တရားသူကြီး (District Magistrate) Donny Lalruatsanga က ရာဇဝတ်ကျင့်ထုံးဥပဒေ Bharatiya Nagarik Suraksha Sanhita, 2023 (BNSS) ရဲ့ ပုဒ်မ ၁၆၃ အရ အာဏာကုန်သုံးပြီး မေလ ၂၂ ရက်နေ့စွဲနဲ့ ထုတ်ပြန်ခဲ့တာဖြစ်ပါတယ်။
အဲဒီလောင်တလိုင်ခရိုင်အတွင်းရှိ စက်သုံးဆီဆိုင်အားလုံးအနေနဲ့ အစိုးရကသတ်မှတ်ထားတဲ့နှုန်းထားထက် ပိုပြီး မှောင်ခိုဈေးနဲ့ ဓာတ်ဆီ၊ ဒီဇယ်ဆီတွေကို မရောင်းချဖို့တားမြစ်ထားပါတယ်။
ဒါ့အပြင်ခရိုင်အတွင်းရှိ ဆီဆိုင်တွေအနေနဲ့ အများပြည်သူနဲ့ လိုင်စင်မရှိတဲ့သာမန်အဝယ်သမားတွေကို တရက်ကို ဓာတ်ဆီ ၃၀ လီတာနဲ့ ဒီဇယ်ဆီ ၁,၀၀၀ လီတာသာ အများဆုံးကန့်သတ်ရောင်းချပေးရမှာ ဖြစ်ပါတယ်။
စက်သုံးဆီ (ဓာတ်ဆီနဲ့ဒီဇယ်) တွေကိုအိမ်နီးချင်းနိုင်ငံဖြစ်တဲ့ မြန်မာနိုင်ငံနဲ့ အခြားဒေသတွေဆီကုန်သွယ်မှုဆိုင်ရာ ကိစ္စရပ်အဖြစ် တရားမဝင်ရောင်းချတာ၊ တဆင့်ပြန်လည် ဖြန့်ဖြူးတာတွေကိုလည်း လုံးဝပိတ်ပင်တားမြစ်ထားပါတယ်။
အဲဒီအပြင်လောင်တလိုင်ခရိုင်အတွင်း တရားမဝင်စက်သုံးဆီဝယ်ယူတာနဲ့ သယ်ယူပို့ဆောင်တာတွေကိုပါ အပြည့်အဝ တားမြစ်ပိတ်ပင်ထားပါတယ်။
အဲဒီတားမြစ်မိန့်တွေကိုမလိုက်နာဘဲ ဖောက်ဖျက်ကျူးလွန်သူတွေကိုတော့ အိန္ဒိယရာဇသတ်ကြီးဥပဒေ Bharatiya Nyaya Sanhita (BNS) ရဲ့ ပုဒ်မ ၂၂၃ အရ ပြစ်ဒဏ်ချမှတ် အရေးယူသွားမှာ ဖြစ်ပါတယ်။
ခုထုတ်ပြန်လိုက်တဲ့အမိန့်ဟာ လောင်တလိုင်ခရိုင်တခုလုံးကို လွှမ်းခြုံမှာဖြစ်ပြီး ထုတ်ပြန်တဲ့နေ့ကစလို့ နောက်ထပ် ၂ ပတ်အထိ အတည်ဖြစ်တယ်လို့ သိရပါတယ်။
