Border News Agency
မောင်တော၊ မေ ၂၇။
အာရက္ခတပ်တော်(AA)ထိန်းချုပ်ထားတဲ့ မောင်တောမြို့နယ်၊ တောင်ပြိုလက်ဝဲမြို့နယ်ခွဲ၊ သင်္ဘောလှကျေးရွာရှိ ဒိုင်းနက်လူမျိုးတရာကျော်ကို အာရက္ခတပ်တော်အတင်းအဓမ္မဖမ်းဆီးထားတာမို့ ပြန်လွှတ်ပေးဖို့ ဒိုင်းနက်အဖွဲ့တွေတောင်းဆိုနေကြပါတယ်။
အဲဒီဌာနေတိုင်းရင်းသားလူနည်းစုတွေကို အာရက္ခတပ်တော်က စစ်မှုထမ်းဖို့ဖမ်းဆီးခေါ်ဆောင်ခံထားရတယ်လို့ ဒိုင်းနက်အဖွဲ့အစည်း ၁၂ ခုမှ မေလ ၂၇ ရက် ဒီနေ့မှာပူးတွဲထုတ်ပြန်ပါတယ်။
အဲဒီသင်္ဘောလှရွာမှာ မေလ ၂၃ ရက်နေ့က အာရက္ခတပ်တော်တပ်ဖွဲ့ဝင်တွေလာရောက်ပြီး အတင်းအဓမ္မစစ်သားစုဆောင်းတာမို့ ဒေသခံဌာနေတိုင်းရင်းသားလူနည်းစုတွေနဲ့ တင်းမာမှုဖြစ်ခဲ့ပါတယ်။
အဲဒီနောက်အာရက္ခတပ်တော်တပ်ဖွဲ့ဝင်တွေဟာ ကိုယ်ဝန်ဆောင်အမျိုးသမီးတွေအပါအဝင် ဒေသခံဌာနေတိုင်းရင်းသားလူနည်းစုတွေကို သေနတ်ပစ်ခတ်တာတွေ၊ ရိုက်နှက်တာတွေပြုလုပ်ခဲ့ကြတာမို့ ကိုယ်ဝန်ဆောင်အမျိုးသမီးတွေအပါအဝင် ရွာသားတချို့ဒဏ်ရာရရှိခဲ့တယ်လို့ ဆိုပါတယ်။
အဲဒီနောက် မေလ ၂၄ ရက်နေ့မှာ အိမ်ထောင်ဦးစီးတွေနဲ့သက်ကြီးရွယ်အိုတွေအပါအဝင် ဒိုင်းနက်တိုင်းရင်းသားတရွာလုံးနီးပါး လူဦးရေတရာကျော်ကို အာရက္ခတပ်တော်က အတင်းအဓမ္မဖမ်းဆီးခေါ်ဆောင်သွားခဲ့တယ်လို့ ဆိုပါတယ်။
အဲဒီအပြင်ကျေးရွာပြင်ပသို့သွားလာခွင့်နဲ့ ဆက်သွယ်ရေးတွေကို အာရက္ခတပ်တော်က တားဆီးကန့်သတ်ထားတာမို့ ကျန်ခဲ့တဲ့ကလေးငယ်တွေ၊ အမျိုးသမီးတွေ၊ သက်ကြီးရွယ်အိုတွေဟာ စားဝတ်နေရေး၊ ကျန်းမာရေးအတွက် လူသားချင်းစာနာမှုဆိုင်ရာ အကျပ်အတည်းရင်ဆိုင်နေရပြီး ရပ်ရွာအတွင်းထိတ်လန့်ပူပန်မှုတွေ ကျယ်ကျယ်ပြန့်ပြန့်ဖြစ်နေတယ်လို့ ဆိုပါတယ်။
ဒါကြောင့်ဖမ်းဆီးခံထားရတဲ့ ဒိုင်းနက်အရပ်သားအားလုံးကို အမြန်ဆုံးပြန်လွှတ်ပေးဖို့၊ ရပ်ရွာဘေးကင်းလုံခြုံရေးအာမခံဖို့၊ လူသားချင်းစာနာမှုအကူအညီတွေ ပေးခွင့်ပြုဖို့နဲ့လွတ်လပ်တဲ့ ဒေသခံသတင်းထောက်တွေကို ပွင့်လင်းမြင်သာစွာ စုံစမ်းစစ်ဆေးခွင့်ပြုဖို့ ဒိုင်းနက်အဖွဲ့အစည်းတွေက အချက်ခုနှစ်ချက်နဲ့တောင်းဆိုထားပါတယ်။
