Border News Agency
အိုက်ဇောလ်၊ မေ ၂၇။
အိန္ဒိယ – ဘင်္ဂလားဒေ့ရှ်နယ်စပ်အနီး မီဇိုရမ်ပြည်နယ်အတွင်း တရားမဝင်လက်နက်မှောင်ခိုပြုလုပ်နေတဲ့ ဘင်္ဂလားဒေ့ရှ်နိုင်ငံသားလက်နက်ကိုင်သုံးဦးကို လက်နက်ခဲယမ်းအများအပြားနဲ့အတူ မေလ ၂၄ ရက်နေ့က အိန္ဒိယနယ်ခြားစောင့်တပ်ဖွဲ့ (BSF)နဲ့ ရဲပူးပေါင်းအဖွဲ့က ဖမ်းဆီးရမိခဲ့ပါတယ်။
သူတို့ဟာ ဘင်္ဂလားဒေ့ရှ်လက်နက်ကိုင်အဖွဲ့ဖြစ်တဲ့ United People’s Democratic Front-Prasit (UPDF-P) အဖွဲ့ဝင်တွေလို့ သံသယရှိရသူ အာပွန်ချက်ခ်မာ၊ နီဟာရမ်ဂျန်ချက်ခ်မာနဲ့ မိုနီကာဘာရီချက်ခ်မာဖြစ်တယ်လို့ ဆိုပါတယ်။
သူတို့ကို အိုက်ဇောလ်ခရိုင်မှာဖမ်းဆီးတာဖြစ်ပြီး ဒါမ်ပါကျားထိန်းသိမ်းရေးနယ်မြေကိုဖြတ်ကာ တောလမ်းအတိုင်း ဘင်္ဂလားဒေ့ရှ်နိုင်ငံထဲခိုးဝင်ဖို့ ကြိုးပမ်းခဲ့ကြတာမို့ ဆိုင်းရန်းရဲစခန်းမှာ ထိန်းသိမ်းစစ်ဆေးနေတယ်လို့ဆိုပါတယ်။
သူတို့ရဲ့ထွက်ဆိုချက်အရ ဒါမ်ပါကျားထိန်းသိမ်းရေးစင်္ကြံ တောနက်ကြီးအတွင်းရှာဖွေခဲ့ရာ ဖမ်းဆီးခံရတဲ့နေရာနဲ့ ၈ ကီလိုမီတာအကွာမှာ ဝှက်ထားတဲ့ AK- 47 ကျည်ဆံ ၁,၇၉၉ တောင့်ကို ပထမအကြိမရှာတွေ့ခဲ့ပါတယ်။
အဲဒီအပြင်ဆိုက်သာ့ခ်ကျေးရွာ တောတွင်းတနေရာကနေ AK-47 ရိုင်ဖယ်သေနတ် ၂ လက်၊ ကျည်အိမ် ၂ ခုနဲ့ ကျည်ဆံ ၁၂ တောင့်တို့ကိုဒုတိယအကြိမ်ထပ်သိမ်းရခဲ့တာပါ။
သူတို့ထွက်ဆိုချက်အရ အိုက်ဇောလ်မှာနေထိုင်တဲ့ ဒေါက်တာပရီတီချက်ခ်မာဆိုသူက လက်နက်တွေကို ဘင်္ဂလားဒေ့ရှ်သို့ယူဆောင်နိုင်ရေး ကူညီပေးဖို့ ညွှန်ကြားခဲ့တာလို့ဆိုပါတယ်။
သူတို့မှာရိက္ခာခြောက်တွေအပြင် လက်နက်တွေ ရာသီဥတုဒဏ်ခံနိုင်အောင် ထုပ်ပိုးဖို့ပြင်ဆင်ထားတဲ့ ပစ္စည်းတွေကိုပါ တွေ့ရှိခဲ့ရပါတယ်။
အဲဒီဘင်္ဂလားဒေ့ရှ်အခြေစိုက်လက်နက်ကိုင်အဖွဲ့တွေဖြစ်တဲ့ UPDF-P နဲ့ PCJSS တို့ဟာ သွားလာရခက်ခဲတဲ့ ဒါမ်ပါကျားထိန်းသိမ်းရေးနယ်မြေကို စခန်းချရာနဲ့ လျှို့ဝှက်ဆက်သွယ်ရေးလမ်းကြောင်းအဖြစ် သုံးလာကြတာလို့ဆိုပါတယ်။
