Border News Agency
ဒါကာ၊ ဇူလိုင် ၁၄။
ရိုဟင်ဂျာဒုက္ခသည်တွေ မြန်မြန်ဆန်ဆန်နဲ့ ရေရှည်တည်တံ့ခိုင်မြဲစွာ နေရပ်ပြန်နိုင်ရေးအတွက် အမျိုးသားအဆင့် မဟာဗျူဟာရေးဆွဲဖို့ ဝန်ကြီးချုပ်တာရစ်ရာမန်ဦးဆောင်တဲ့ တဆယ့်တဦးပါ ရိုဟင်ဂျာရေးရာ အမျိုးသားမဟာဗျူဟာရေးဆွဲရေးကော်မတီကို ဘင်္ဂလားဒေ့ရှ်အစိုးရက ဇူလိုင်လ ၁၃ ရက်နေ့ဖွဲ့စည်းလိုက်ပါတယ်။
အဲဒီကော်မတီမှာ ပြည်ထဲရေးဝန်ကြီး၊ နိုင်ငံခြားရေးဝန်ကြီး၊ ဘဏ္ဍာရေးနဲ့စီမံကိန်းဝန်ကြီးဌာန၊ ကာကွယ်ရေးဝန်ကြီးဌာန၊ ရဲချုပ်အပြင် အမျိုးသားလုံခြုံရေးထောက်လှမ်းရေး၊ နယ်ခြားစောင့်တပ်နဲ့ ကမ်းခြေစောင့်တပ်က ညွှန်ကြားရေးမှူးချုပ်ပါဝင်ပါတယ်။
အဲဒီကော်မတီရဲ့အဖွဲ့ဝင် အတွင်းရေးမှူးအဖြစ် စစ်ထောက်လှမ်းရေး ညွှန်ကြားရေးမှူးချုပ်ကတာဝန်ယူပြီး သူတိုက်ရိုက်ကြီးကြပ်မှုအောက်မှာ မဟာဗျူဟာမူကြမ်းရေးဆွဲဖို့အတွက် ဘုတ်အဖွဲ့ကိုထပ်ဖွဲ့သွားမှာပါ။
အဲဒီဘုတ်အဖွဲ့ဟာ လာမယ့်ရက်ပေါင်းကိုးဆယ်အတွင်း ရိုဟင်ဂျာရေးရာ အမျိုးသားမဟာဗျူဟာကို အပြီးသတ်ရေးဆွဲကာ အမျိုးသားကော်မတီကိုတင်ပြရမှာဖြစ်ပြီး ဒုက္ခသည်ကယ်ဆယ်ရေးနဲ့ နေရပ်ပြန်ပို့ရေးကော်မရှင်နာအပါအဝင် အရာရှိငါးဦးလည်း ကော်မတီကို ကူညီပေးသွားမှာဖြစ်ပါတယ်။
အဲဒီမဟာဗျူဟာဟာ ရိုဟင်ဂျာနေရပ်ပြန်ပို့ရေးမှာ သက်ဆိုင်ရာဝန်ကြီးဌာနတွေနဲ့ လုံခြုံရေးအဖွဲ့အစည်းတွေရဲ့အခန်းကဏ္ဍ၊ တာဝန်ယူရမယ့်အပိုင်းတွေကို အသေးစိတ်သတ်မှတ်ပေးမှာဖြစ်ပြီး အေဂျင်စီအချင်းချင်းပူးပေါင်းဆောင်ရွက်မှုကိုလည်း ကြီးကြပ်ပေးသွားမယ်လို့ဆိုပါတယ်။
