Border News Agency
မူဆယ်၊မေ ၂၉။
ရှမ်းပြည်မြောက်ပိုင်း၊မူဆယ်မြို့မှာအွန်လိုင်းလိမ်လည် လောင်းကစားမှုကျူးလွန်နေတဲ့ တရုတ်နိုင်ငံသား ၅ ဦးနဲ့ မြန်မာနိုင်ငံသား ၂၃ ဦး၊စုစုပေါင်း ၂၈ ဦးကိုလုပ်ငန်းသုံးပစ္စည်း အမြောက်အမြားနဲ့အတူလုံခြုံရေးပူးပေါင်းအဖွဲ့က မေလ ၂၈ ရက်၊ညနေပိုင်းမှာ ဖမ်းဆီးရမိခဲ့ပါတယ်။
အဲဒီ ပူးပေါင်းအဖွဲ့ဟာ မူဆယ်မြို့၊စွမ်စော်ရပ်ကွက်ထဲက နေအိမ်တလုံးကိုဝင်ရောက်စီးနင်းခဲ့တာဖြစ်ပြီးလိမ်လည်မှုတွေမှာအသုံးပြုတဲ့ ဖုန်းမျိုးစုံ ၉၆ လုံး၊All In One ကွန်ပျူတာ ၃၅ လုံး၊Laptop ၁ လုံး၊Power Station အကြီး/အသေး ၂ လုံး၊WiFi စက် ၃ လုံးနဲ့ ဘတ္ထရီဆိုင်ကယ် ၅ စီးတို့ကိုပါ သက်သေခံပစ္စည်းအဖြစ် သိမ်းဆည်းရမိခဲ့တာပါ။
အဲဒီ အွန်လိုင်းလိမ်လည်လောင်းကစားမှုမှာ ပါဝင်ပတ်သက်နေတဲ့ တရားမဝင် နိုင်ငံခြားသားတွေနဲ့ပြစ်မှုကျူးလွန်သူတွေကို လိုအပ်တဲ့ စစ်ဆေးမှုတွေ ဆက်လုပ်နေပြီး တည်ဆဲဥပဒေတွေအတိုင်းထိရောက်ပြင်းထန်စွာ အရေးယူသွားမယ်လို့ သိရပါတယ်။
