Border News Agency
စစ်ကိုင်း၊ မေ ၃၀။
အမျိုးသားညီညွတ်ရေးအစိုးရ (NUG)၊ လျှပ်စစ်၊ စွမ်းအင်နဲ့ ဆောက်လုပ်ရေးဝန်ကြီးဌာနအနေနဲ့ မြန်မာနိုင်ငံရဲ့ သဘာဝသယံဇာတ ရင်းမြစ်တွေကရတဲ့ ဘဏ္ဍာငွေတွေကို စီမံခန့်ခွဲရာမှာ ပြည်သူအားလုံး ပွင့်လင်းမြင်သာစွာသိရှိနိုင်ဖို့အတွက် လိုအပ်တဲ့အချက်အလက်တွေကို အဆင့်ဆင့်ထုတ်ပြန်ပေးသွားမယ်လို့ မေလ ၂၉ ရက်နေ့က ထုတ်ပြန်ပါတယ်။
မြန်မာနိုင်ငံကထွက်တဲ့ ရေနံနဲ့ သဘာဝဓာတ်ငွေ့လို အဖိုးတန်သယံဇာတတွေကရတဲ့ဝင်ငွေတွေဟာ ပြည်သူတွေပိုင်တဲ့ ငွေကြေးတွေဖြစ်ပေမယ့် အရင်ခေတ်အဆက်ဆက်က အမှောင်ချဖုံးကွယ်ခံခဲ့ရသလို အထူးသဖြင့် အာဏာသိမ်းစစ်တပ်လက်ထက်မှာတော့ ဒီဝင်ငွေတွေဟာ ပြည်သူတွေကို ရက်ရက်စက်စက် လေကြောင်းတိုက်ခိုက်ဖို့နဲ့ အကြမ်းဖက်ဖို့အတွက် အဓိကအသုံးပြုတဲ့ ဘဏ္ဍာရေးအသက်သွေးကြော ဖြစ်သွားခဲ့ရတာလို့ ဆိုပါတယ်။
အဲဒါကြောင့် NUG အနေနဲ့ EITI၊ OCDS နဲ့ OGP လို နိုင်ငံတကာစံနှုန်းတွေအတိုင်း တိတိကျကျလိုက်နာပြီး သယံဇာတကဏ္ဍနဲ့ ပတ်သက်တဲ့ စီမံခန့်ခွဲမှုစာချုပ်တွေ၊စီမံကိန်းသုံးသပ်ချက်တွေ၊ ဝင်ငွေနဲ့ ပေးချေမှုတွေအပြင် နောက်ကွယ်ကနေ အမှန်တကယ် အကျိုးအမြတ်ရနေသူတွေရဲ့ စစ်မှန်တဲ့ပိုင်ဆိုင်မှုခွဲဝေမှုစာရင်းအင်းတွေကိုပါ ပြည့်စုံသွားတဲ့အထိ တစိုက်မတ်မတ်ချပြပေးသွားမယ်လို့ ဆိုပါတယ်။
အဲဒီလုပ်ငန်းစဉ်မှာ ပါဝင်ပတ်သက်နေတဲ့ကုမ္ပဏီတွေနဲ့ ဘဏ္ဍာငွေထောက်ပံ့သူတွေအနေနဲ့ NUG ဝန်ကြီးဌာနရဲ့ အီးမေးလ်ဖြစ်တဲ့ moee@nugmyanmar.org ကတဆင့် ဆက်သွယ်ပြီး ပူးပေါင်းဆောင်ရွက်ကြဖို့ကိုလည်း အသိပေးထားတာပါ။
ဒါ့အပြင် ပြည်တွင်းပြည်ပမှာရှိတဲ့ မြန်မာပြည်သူတွေ၊ အရပ်ဘက်အဖွဲ့အစည်းတွေနဲ့ မီဒီယာတွေအနေနဲ့လည်း နိုင်ငံတော်ရဲ့သယံဇာတတွေကို ပွင့်လင်းမြင်သာတဲ့ အုပ်ချုပ်မှုစနစ်နဲ့ စီမံခန့်ခွဲနိုင်ဖို့ အတူတူဝိုင်းဝန်းစောင့်ကြည့် ပါဝင်ပေးကြဖို့ တိုက်တွန်းနှိုးဆော်ထားပါတယ်။
