Border News Agency
အမေရိကန်၊ ဇွန် ၂။
အမေရိကန်သမ္မတဒေါ်နယ်ထရမ့်က အစ္စရေးနဲ့ဟစ်ဇ်ဘိုလာအဖွဲ့အကြား တိုက်ပွဲတွေရပ်တန့်ဖို့ သဘောတူညီမှုရရှိခဲ့ပြီလို့ ပြောကြားခဲ့ပေမယ့် အစ္စရေးဘက်ကတော့ လက်ဘနွန်တောင်ပိုင်းက စစ်ဆင်ရေးတွေကို အစီအစဉ်အတိုင်း ဆက်လုပ်သွားမယ်လို့ တုံ့ပြန်ထားပါတယ်။
တဖက်မှာလည်း အီရန်ရဲ့ အဆင့်မြင့်ဆွေးနွေးရေးမှူး မိုဟမ္မဒ်ဘာဂါ ဂါလီဘတ်ဖ်က အစ္စရေးအနေနဲ့ လက်ဘနွန်အတွင်း စစ်ရေးအရ တိုက်ခိုက်မှုတွေကို ဆက်လက်လုပ်ဆောင်နေမယ်ဆိုရင် အမေရိကန်နဲ့လုပ်ဆောင်နေတဲ့ ငြိမ်းချမ်းရေးဆွေးနွေးပွဲတွေကို အီရန်ဘက်က ရပ်တန့်ပစ်နိုင်တယ်လို့ သတိပေးလိုက်ပါတယ်။
အီရန်နိုင်ငံခြားရေးဝန်ကြီးကလည်း အမေရိကန်နဲ့ အီရန်အကြား ရရှိထားတဲ့ အပစ်အခတ်ရပ်စဲရေး သဘောတူညီချက်ဟာ လက်ဘနွန်အရေးအပါအဝင် ဒေသတွင်းမျက်နှာစာအားလုံးနဲ့သက်ဆိုင်တာကြောင့် ချိုးဖောက်မှုတွေရှိလာရင် အမေရိကန်နဲ့အစ္စရေးတို့မှာသာ တာဝန်ရှိမှာဖြစ်တယ်လို့ ထုတ်ဖော်ပြောဆိုထားပါတယ်။
လက်ရှိမြေပြင်အခြေအနေမှာတော့ အစ္စရေးလေတပ်ဟာ လက်ဘနွန်တောင်ပိုင်းဒေသတွေကို ညတွင်းချင်းရော မနက်ပိုင်းမှာပါ ဆက်လက်ဗုံးကြဲတိုက်ခိုက်နေတာကြောင့် အရပ်သားထိခိုက်ဒဏ်ရာရမှုတွေ ရှိနေသလို၊ ဟစ်ဇ်ဘိုလာအဖွဲ့ဘက်ကလည်း အစ္စရေးစစ်စခန်းတွေနဲ့ လေကြောင်းရန်ကာကွယ်ရေးစနစ်တွေကို ဒရုန်းတွေ၊ မစ်ဆိုင်းတွေနဲ့ ပြန်လည်တိုက်ခိုက်နေတယ်လို့ ထုတ်ပြန်ထားပါတယ်။
အမေရိကန်သမ္မတထရမ့်အနေနဲ့ အစ္စရေးရဲ့ တိုက်ခိုက်မှုတွေကြောင့် အီရန်နဲ့ဆွေးနွေးပွဲပျက်ပြားသွားမှာကို စိုးရိမ်ပြီး ကြားဝင်စေ့စပ်နေပေမယ့် အစ္စရေးဝန်ကြီးချုပ်နေတန်ယာဟုကတော့ အပစ်အခတ်မရပ်စဲခင် စစ်ရေးအရ အသာစီးရဖို့ ဆက်လက်ကြိုးပမ်းနေတာကြောင့် အခု fragile ဖြစ်နေတဲ့ အပစ်ရပ်ရေးဟာ အချိန်မရွေးပြိုလဲသွားနိုင်တယ်လို့ သုံးသပ်နေကြပါတယ်။
