Border News Agency
ကျောက်ဖြူ၊ဇွန် ၂။
ကျောက်ဖြူမြို့နယ်၊စနဲမြို့အနီးမှာ အာဏာသိမ်းစစ်တပ်နဲ့ အာရက္ခတပ်တော် (AA) တို့အကြား ပြီးခဲ့တဲ့မေလ ၂၈ ရက်နေ့ကနေ ၃၀ ရက်နေ့အထိ သုံးရက်ကြာ တိုက်ပွဲတွေ ပြင်းထန်စွာ ဖြစ်ပွားခဲ့တယ်လို့ သိရပါတယ်။
အဲဒီတိုက်ပွဲဟာ စနဲမြို့ဘက်ကို အာဏာသိမ်းစစ်တပ်ကလေကြောင်း၊ရေကြောင်းနဲ့ ဒရုန်းပစ်ကူတွေသုံးပြီး အင်အားအလုံးအရင်းနဲ့ ထိုးစစ်ဆင်လာတာကြောင့် ဖြစ်ပွားခဲ့တာပါ။
အဲဒီတိုက်ပွဲအတွင်း အာဏာသိမ်းစစ်တပ်တပ်ဖွဲ့ဝင် ၄၀ ထက်မနည်း သေဆုံးကာ သူတို့ရဲ့ ရုပ်အလောင်းအချို့နဲ့ လက်နက်ခဲယမ်းတွေကို သိမ်းဆည်းရမိခဲ့တယ်လို့ အာရက္ခမင်းသမီးမီဒီယာမှာ ဖော်ပြထားပါတယ်။
အဲဒီ ထိုးစစ်ဆင်မှုမှာ အာဏာသိမ်းစစ်တပ်ရဲ့ တပ်မ ၁၁လက်အောက်ခံ ခမရ ၂၁၂၊ ခမရ ၂၁၃ နဲ့ ခမရ ၂၁၉တပ်ရင်းတွေက ထုတ်နှုတ်အင်အား ၄၀၀ ကျော်နဲ့ နည်းဗျူဟာတခုဖွဲ့ကာ တောင်မော်ဦး ရေတပ်စခန်းဘက်ကနေ စစ်ကြောင်းထိုးလာတာ ဖြစ်တယ်လို့ သိရပါတယ်။
မြေပြင်အခြေအနေမှာတော့ အာရက္ခတပ်တော် (AA) ဘက်က ခုခံစစ်နဲ့ တန်ပြန်ထိုးစစ်တွေကြောင့် အာဏာသိမ်းစစ်တပ် စစ်ကြောင်းတွေ ရှေ့ဆက်မတိုးနိုင်ဘဲ စစ်ဦးကျိုးကာ ပြန်လည်ဆုတ်ခွာနေရတယ်လို့ သိရပါတယ်။
