Border News Agency
တနင်္သာရီ၊ ဇွန် ၂။
တနင်္သာရီတိုင်း၊ တနင်္သာရီမြို့နယ်မှာ အာဏာသိမ်းစစ်တပ်ရဲ့ ဖမ်းဆီးနှိပ်စက်ခံရသူထဲမှ အမျိုးသားတဦး ထွက်ပြေးလွတ်မြောက်လာတယ်လို့ KNU မြိတ် – ထားဝယ်ခရိုင်မှ ဇွန်လ၂ရက်၊ ဒီနေ့ထုတ်ပြန်ပါတယ်။
အဲဒီမောတောင်မြို့ခံအရပ်သားတဦးကို ဇွန်လ ၁ ရက်နေ့က အာဏာသိမ်းစစ်တပ်ကမှဖမ်းဆီးပြီးနောက် ညှင်းပန်းနှိပ်စက်ကာ တော်လှန်ရေးတပ်ဖွဲ့တွေရှိနိုင်ခြေရှိတဲ့ နေရာတွေကို လမ်းပြအဖြစ် အတင်းအဓမ္မစေခိုင်းခဲ့တယ်လို့ ဆိုပါတယ်။
အဲဒီအမျိုးသားဟာ အာဏာသိမ်းစစ်တပ်ရဲ့ ဖမ်းဆီးနှိပ်စက်တာကိုခံနေရချိန်အတွင်းမှာ လမ်းပြအဖြစ်ဖမ်းခေါ်လာပြီး ညှင်းပန်းနှိပ်စက်ခံနေရတဲ့ အမျိုးသားနှစ်ဦးနဲ့အမျိုးသမီးတဦးတို့ကို ကိုယ်တိုင်မြင်တွေ့ခဲ့ရတယ်လို့ ဆိုပါတယ်။
အဲဒီအပြင် သူဟာ ဇွန်လ ၁ ရက်၊ ညနေ ၅ နာရီခွဲအချိန်မှာ အာဏာသိမ်းစစ်တပ်တပ်သားတွေဆီကနေ ထွက်ပြေးလွတ်မြောက်ခဲ့ပြီး လက်ရှိမှာတော့ သူအပါအဝင် မိသားစုဝင် ၅ ဦးဟာ လုံခြုံရာနေရာကိုရောက်ရှိနေပြီလို့ ဆိုပါတယ်။
အာဏာသိမ်းစစ်တပ်ဟာ အကြမ်းဖက်တာတွေဆက်လက်ပြုလုပ်နေပြီး အာဏာတည်မြဲရေးအတွက် အရပ်သားတွေကို ရက်ရက်စက်စက် ညှင်းပန်းနှိပ်စက်တာတွေ၊ သတ်ဖြတ်ခြင်းတာတွေကို ဆက်တိုက်ကျူးလွန်နေတယ်လို့ KNUက ဆိုပါတယ်။
ဓာတ်ပုံ – KNU မြိတ်-ထားဝယ်ခရိုင်
