Border News Agency
ထိုင်း၊ ဇူလိုင် ၁။
ထိုင်းနိုင်ငံကနေမြန်မာနိုင်ငံဘက်ကို သယ်ထုတ်ဖို့ကြိုးပမ်းခဲ့တဲ့ ငွေသား ဘတ် ၂၃ သန်းကို အခြေခံပြီးထိုင်းအာဏာပိုင်တွေက နူချန်အမည်ရှိနိုင်ငံဖြတ်ကျော် မူးယစ်ဆေးဝါးကွန်ရက်ကို ဆက်စပ်နေရာ ၈ ခုမှာ တပြိုင်နက် ဝင်ရောက်စီးနင်းဖြိုခွင်းလိုက်ပါတယ်။
အဲဒီစစ်ဆင်ရေးအတွင်း ဘတ် ၃၄ ဒသမ ၃ သန်းကျော်တန်ဖိုးရှိတဲ့ဒစ်ဂျစ်တယ်ငွေကြေး၊ ဘဏ်စာရင်း ၁၁ ခု၊ ရွှေ၊ကား ၃ စီးနဲ့ မြေကွက်ပိုင်ဆိုင်မှုစာချုပ် ၁၄ ခုတို့ကို သိမ်းဆည်း၊ ချိတ်ပိတ်နိုင်ခဲ့တယ်လို့ ထိုင်းမူးယစ်ဆေးဝါးထိန်းချုပ်ရေးဘုတ်အဖွဲ့ရုံး (ONCB) က ဇွန်လ ၂၉ ရက်နေ့မှာ သတင်းထုတ်ပြန်ပါတယ်။
အဲဒီမယ်ဆိုင်-တာချီလိတ် နယ်စပ်ဂိတ်မှာဇွန်လ ၂၃ ရက်နေ့ကဘတ် ၂၃ သန်းနဲ့အတူ မြန်မာအမျိုးသားတဦး ဖမ်းဆီးရမိရာကနေ ငွေကြေးလမ်းကြောင်းကို ခြေရာခံပြီး အခုလိုကွန်ရက်တခုလုံးကို ဖော်ထုတ်နိုင်ခဲ့တာပါ။
အဲဒီမူးယစ်ကွန်ရက်ဟာ အာဏာပိုင်တွေရဲ့ မျက်စိကိုလွှဲဖို့ ဒစ်ဂျစ်တယ်ငွေကြေးတွေကို ထိုင်းဘဏ်စာရင်းတွေကတဆင့် ငွေသားအဖြစ်ပြောင်းလဲထုတ်ယူပြီး မြန်မာနိုင်ငံဘက်ကို ခိုးထုတ်တဲ့နည်းလမ်းနဲ့ ငွေကြေးခဝါချနေတာဖြစ်ပါတယ်။
အဲဒီနူချန်ကွန်ရက်ခေါင်းဆောင်ကိုတော့ ပြီးခဲ့တဲ့ ဧပြီလ ၇ ရက်နေ့ကတည်းက ဖမ်းဆီးထားတာဖြစ်ပြီး အရင်စစ်ဆင်ရေးတွေမှာလည်း ဘတ် ၇၅ သန်းကျော် ဖမ်းဆီးရမိခဲ့သလို အခုအမှုမှာ ပါဝင်ပတ်သက်သူအားလုံးကို ဆက်လက်ဖော်ထုတ်သွားမယ်လို့ ထိုင်းအာဏာပိုင်တွေက ဆိုပါတယ်။
