Border News Agency
ဘူးသီးတောင်၊ ဇူလိုင် ၁။
အာရက္ခတပ်တော်(AA)ထိန်းချုပ်ထားတဲ့ ဘူးသီးတောင်မြို့နယ်ရှိ အမှတ် ၁၅ စစ်ဆင်ရေးကွပ်ကဲမှုဌာနချုပ်ဟောင်းကို ဇူလိုင်လ ၁ ရက်၊ ဒီနေ့မနက်ဆယ်နာရီကျော်အချိန်က အာဏာသိမ်းစစ်တပ်လေကြောင်းတိုက်ခိုက်ခဲ့ပါတယ်။
အဲဒီအမှတ် ၁၅ စစ်ဆင်ရေးကွပ်ကဲမှုဌာနချုပ်ဟောင်းကို ပြီးခဲ့တဲ့ ၂၀၂၄ ခုနှစ်၊ မေလကတည်းက အာရက္ခတပ်တော်သိမ်းပိုက်ထိန်းချုပ်ထားပါတယ်။
အဲဒီနေရာကို အာဏာသိမ်းစစ်တပ်လေယာဥ်အုပ်က ဗုံးအလုံးရေသုံးဆယ်ခန့်ကြဲချတိုက်ခိုက်ခဲ့တာဖြစ်ပြီး ဘူးသီးတောင်မြို့ပေါ်ထိတုန်ခါမှုတွေဖြစ်သွားခဲ့ပါတယ်။
“လေယာဥ်တွေကတစီးပြီးတစီးလာကြဲသွားတာပါ။ ပေါက်ကွဲသံတွေ၊ ဆူညံသံတွေကြားရပါတယ်။ မြို့ကလူတွေက တော့စိုးရိမ်နေကြတာပါ။”ဘူးသီးတောင်မြို့ခံတဦးက Border News Agency ကို ပြောပါတယ်။
အဲဒီအမှတ် ၁၅ စစ်ဆင်ရေးကွပ်ကဲမှုဌာနချုပ်ဟောင်းအနီးအနားမှာ လူနေကျေးရွာတချို့ရှိပေမယ့် ထိခိုက်ပျက်စီးမှုအခြေအနေအသေးစိတ်ကိုမသိရသေးဘူးလို့ဆိုကြပါတယ်။
အာဏာသိမ်းစစ်တပ်ဟာ လေယာဥ်အုပ်စုလိုက်လာပြီး အစုလိုက်အပြုံလိုက်ဗုံးအလုံးရေအများအပြားကြဲချတိုက်ခိုက်တာတွေပြုလုပ်လာနေပါတယ်။
အဲဒါကြောင့်အရပ်သားပြည်သူတွေ သေဆုံးဒဏ်ရာရနေကြသလို လူနေအိမ်တွေ၊ အရပ်ဖက်နေရာတွေလည်း ပျက်စီးနေပါတယ်။
