Border News Agency
မြောက်ဦး၊ ဇူလိုင် ၁၀။
အာရက္ခဒေသမှာ ရေကြီးရေလျှံမှုနေပြီး လူသုံးဦးသေဆုံးသွားပြီလို့ လူသားချင်းစာနာထောက်ထားရေးနဲ့ ဖွံ့ဖြိုးရေးဆိုင်ရာပူးပေါင်းဆောင်ရွက်ရေးရုံး(HD CO)က ဇူလိုင်လ ၉ ရက်နေ့ ထုတ်ပြန်ပါတယ်။
အဲဒီကျောက်ဖြူ၊ ရမ်းဗြဲ၊ တောင်ကုတ်နဲ့ သံတွဲမြို့နယ်တွေမှာ ဇူလိုင်လ ၅ ရက်နေ့က လေဆင်နှာမောင်းတိုက်ခဲ့လို့ နေအိမ်နဲ့ အဆောက်အအုံနှစ်ရာ့လေးဆယ်ခန့် ထိခိုက်ပျက်စီးခဲ့ပြီး မိုးအဆက်မပြတ်ဆက်ရွာသွန်းကာ ရေကြီးလာတာပါ။
အဲဒီမောင်တော၊ ဘူးသီးတောင်၊ ရသေ့တောင်၊ ကျောက်တော်၊ ပုဏ္ဏားကျွန်း၊ မြောက်ဦးနဲ့ မင်းပြားမှာ လမ်း၊ တံတားတချို့ပျက်စီးတာ၊ မြေပြိုတာနဲ့ကမ်းပါးပြိုတာတွေဖြစ်နေပြီး မိုးဆက်ရွာနေလို့ ရေဘေးပိုဆိုးလာနိုင်ပါတယ်။
ရေဘေးတုံ့ပြန်ရေးတွေကို လူသားချင်းစာနာထောက်ထားရေးနဲ့ ဖွံ့ဖြိုးရေးဆိုင်ရာပူးပေါင်းဆောင်ရွက်ရေးရုံးက အရေးတကြီးပေါင်းလုပ်နေပြီး ပြည်သူတွေဘေးအန္တရာယ်လျော့ပါးစေဖို့ ရိက္ခာခြောက်သောက်သုံးရေ၊ ဆေးဝါးနဲ့ အရေးကြီးစာရွက်စာတမ်းတွေကို အနည်းဆုံးခုနှစ်ရက်စာမှဆယ့်လေးရက်စာထိ ကြိုပြင်စုဆောင်းထားကြဖို့ တိုက်တွန်းထားပါတယ်။
အဲဒီအပြင် ရေကြီးလာရင်အသုံးပြုနိုင်မယ့် ပလတ်စတစ်ပုံး၊ လှေ၊ လေအိတ်စတဲ့ ရေတွင်ပေါ်နိုင်မယ့်ပစ္စည်းတွေ ရှာဖွေစုဆောင်းထားဖို့၊ မိသားစုဝင်တွေရဲ့အချက်အလက်တွေကို ရေမဝင်နိုင်တဲ့ အိတ်ထဲထည့်ထားဖို့နဲ့ ကလေးသူငယ်၊ ကိုယ်ဝန်ဆောင်၊ မသန်စွမ်းနဲ့ သက်ကြီးရွယ်အိုတွေကို ဘေးလွတ်ရာသို့ ကြိုတင်ရွှေ့ပြောင်းပေးရန်လည်း နှိုးဆော်ထားပါတယ်။
ရေကြီးတာ၊ ကမ်းပြိုတာနဲ့ မြွေ၊ ကင်းဆိုးစတဲ့ အဆိပ်ရှိသတ္တဝါတွေရဲ့အန္တရာယ်တွေ ပြည်သူတွေကြုံရင် တိကျမှန်ကန်တဲ့ သတင်းအချက်အလက်တွေကို လူသားချင်းစာနာထောက်ထားရေးနဲ့ ဖွံ့ ဖြိုးရေးဆိုင်ရာပူးပေါင်းဆောင်ရွက်ရေးရုံး အီးမေးလ်နဲ့ တယ်လီဂရမ်အကောင့်တွေကတဆင့် ဆက်သွယ်အကြောင်းကြားနိုင်ပါတယ်။
