Border News Agency
စစ်တွေ၊ သြဂုတ် ၁၃။
စစ်တွေခရိုင်အတွင်းရှိ စစ်ဘေးရှောင်ပြည်သူတွေထဲက မျက်လုံးဝေဒနာရှင်တွေကို အာရက္ခပြည်သူ့ကျန်းမာရေးဌာနက တတိယအကြိမ်အဖြစ် ဩဂုတ်လပထမအပတ်မှာ အခမဲ့ခွဲစိတ်ကုသပေးခဲ့ပါတယ်။
အဲဒီကုသပေးမှုမှာ စစ်ရှောင်မျက်စိဝေဒနာရှင် ခြောက်ရာ့ခုနှစ်ဆယ်ရှစ်ဦးကို စမ်းသပ်ကုသပေးခဲ့ပြီး မျက်လုံးခွဲစိတ်ဖို့လိုအပ်သူ တရာ့ငါးဆယ်နှစ်ဦးထဲက ငါးဆယ်ရှစ်ဦးကို ခွဲစိတ်ကုသပေးခဲ့သလို မျက်မှန်တပ်ဖို့လိုအပ်သူကိုးဆယ်ခြောက်ဦးကိုလည်း မျက်မှန်တပ်ပေးသွားမှာဖြစ်ပါတယ်။
ကုသမှုခဲ့ယူချိန်မှာ ခွဲစိတ်စရိတ်အပါအဝင် စားစရိတ်၊ဆေးဝါးစရိတ်နဲ့ သွားလာစရိတ်အားလုံးကို အာရက္ခပြည်သူ့ကျန်းမာရေးဌာနက အစအဆုံး အခမဲ့တာဝန်ယူဆောင်ရွက်ပေးခဲ့တာဖြစ်ပါတယ်။
အာရက္ခပြည်သူ့ကျန်းမာရေးဌာနအနေနဲ့ ပြီးခဲ့တဲ့ဧပြီလနဲ့ မေလတွေမှာလည်း ပထမအကြိမ်နဲ့ ဒုတိယအကြိမ်အဖြစ် စစ်ရှောင်တွေကို အခမဲ့ခွဲစိတ်ကုသပေးခဲ့ပါတယ်။
