Border News Agency
စစ်တွေ၊စက်တင်ဘာ ၂၆။
ရခိုင်ကမ်းရိုးတန်းတလျှောက်ပင်လယ်ပြင်မှာ လှိုင်းအသင့်အတင့်ကနေလှိုင်းကြီးနိုင်ပြီး လှိုင်းအမြင့် ၈ ပေကနေ ၁၀ ပေခန့်အထိ မြင့်တက်လာနိုင်တာကြောင့် ပင်လယ်ပြင်ခရီးသွားလာသူတွေအနေနဲ့ အထူးသတိပြုကြဖို့ မိုးလေဝသနဲ့ဇလဗေဒညွှန်ကြားမှုဦးစီးဌာနက သတိပေးထားပါတယ်။
ဒီလိုလှိုင်းကြီးနိုင်တဲ့ မိုးလေဝသအခြေအနေဟာ စက်တင်ဘာလ ၂၆ ရက်၊နေလည်အချိန်ကနေ စက်တင်ဘာလ ၂၇ ရက်၊နေ့လည်အချိန်အထိ ဖြစ်ပေါ်နိုင်တာဖြစ်ပြီး ရခိုင်ကမ်းရိုးတန်းတလျှောက်မှာ နေရာကျဲကျဲမိုးထစ်ချုန်းရွာနိုင်ပါတယ်။
အဲဒီအပြင်ရန်ကုန်ကနေ တနင်္သာရီကမ်းရိုးတန်းတလျှောက်ပင်လယ်ပြင်မှာလည်း မိုးထစ်ချုန်းရွာပြီးလှိုင်းအမြင့် ၁၀ ပေကနေ ၁၂ ပေအထိ ရှိလာနိုင်သလို လေတိုက်နှုန်းကလည်း တနာရီကိုပင်လယ်မိုင် ၃၅ မိုင်အထိအားကောင်းနိုင်ကြောင်း ဖော်ပြထားပါတယ်။
မိုးရွာသွန်းချိန်မှာ အမြင်တာမိုင်ဝက်ခန့်အထိလျော့နည်းသွားနိုင်တာကြောင့် ပင်လယ်ပြင်ခရီးသွားလာသူတွေနဲ့ ရေလုပ်သားတွေအနေနဲ့ ရေပြင်အခြေအနေတွေကို အထူးသတိထားကြဖို့ လိုအပ်နေပါတယ်။
လက်ရှိမှာတော့ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တောင်ပိုင်းတို့မှာ မုတ်သုံလေအားကောင်းနေပြီး ကျန်ဘင်္ဂလားပင်လယ်အော်မှာတော့ မုတ်သုံလေ အားနည်းနေပါတယ်။
