Border News Agency
အီရန်၊ စက်တင်ဘာ ၆။
အီရန်အစ္စလာမ္မစ်တော်လှန်ရေးအစောင့်တပ် (IRGC)က အမေရိကန်ရေတပ် စစ်သင်္ဘောနှစ်စင်းကို ဒုံးကျည်တွေနဲ့ ပစ်ခတ်တိုက်ခိုက်ခဲ့ပြီးနောက် အမေရိကန်တပ်ဖွဲ့တွေက အီရန်ရေနံတင်သင်္ဘောသုံးစင်းကို ပြန်လည်တိုက်ခိုက်ဖျက်ဆီးလိုက်တယ်လို့ အမေရိကန် ဗဟိုစစ်ဌာနချုပ်က စက်တင်ဘာလ ၅ ရက်နေ့မှာထုတ်ပြန်ပါတယ်။
အီရန်ရဲ့ တိုက်ခိုက်မှုကို ဒေသတွင်းကင်းလှည့်နေတဲ့ အမေရိကန်လေယာဉ်တင်သင်္ဘောနဲ့ ဖျက်သင်္ဘောကဘေးကင်းစွာရှောင်ရှားနိုင်ခဲ့ပြီး ထိခိုက်ဒဏ်ရာရသူမရှိကြောင်း အမေရိကန်ဘက်ကပြောပေမယ့်အီရန်က အမေရိကန်စစ်သင်္ဘောတွေထိခိုက်ပျက်စီးပြီး ဆုတ်ခွာသွားခဲ့ရတယ်လို့ ဆိုပါတယ်။
အဲဒီတိုက်ခိုက်မှုအပြီး အမေရိကန်စစ်တပ်ကတုံ့ပြန်တဲ့အနေနဲ့ IRGCနဲ့ လက်နက်ကိုင်အုပ်စုတွေကို ငွေကြေး ထောက်ပံ့ပေးနေတဲ့မှောင်ခိုကွန်ရက်ပါ အီရန်ရေနံတင်သင်္ဘောသုံးစင်းကိုတိုက်ခိုက်ခဲ့ရာ နှစ်စင်းမှာ သုံးမရအောင်ပျက်စီးသွားပြီး ကုန်ပစ္စည်းမပါသေးတဲ့တတိယတစင်းမှာလည်း လုံးဝ ဖျက်ဆီးခံလိုက်ရတာဖြစ်ပါတယ်။
အမေရိကန်စစ်ဌာနချုပ်ရဲ့အကြီးအကဲ ရေတပ်ဗိုလ်ချုပ်ကြီး ဘရက်ဒ် ကူပါက အမေရိကန်တပ်ဖွဲ့တွေကို ကာကွယ်တုံ့ပြန်ဖို့နှောင့်နှေးမှာမဟုတ်ဘဲလိုအပ်ရင် အီရန်ရဲ့ရေနံတင် သင်္ဘောအုပ်စုတခုလုံးကို ဖျက်ဆီးသွားမယ်လို့ သတိပေးပြောကြားခဲ့ပါတယ်။
လက်ရှိမှာနှစ်ဖက် စစ်ရေးတင်းမာမှုတွေ ပိုမိုမြင့်တက်လာနေပြီး အီရန်ဘက်ကလည်း အမေရိကန်ရဲ့ ရေနံတင်သင်္ဘောတိုက်ခိုက်မှုကို တုံ့ပြန်တဲ့အနေနဲ့ အမေရိကန်နဲ့ဆက်နွှယ်တဲ့သင်္ဘောတွေကို ပြန်လည် တိုက်ခိုက်သွားမယ်လို့ကြေညာထားပါတယ်။
