Border News Agency
ကျောက်တော်၊ စက်တင်ဘာ ၆။
အာရက္ခတပ်တော်(AA)ထိန်းချုပ်ထားတဲ့ ကျောက်တော်မြို့နယ်မှာ အသက်ဆယ့်လေးနှစ်အရွယ် မိန်းကလေးငယ်တဦးကို လိင်ပိုင်းဆိုင်ရာအကြမ်းဖက်မှုကျူးလွန်ခဲ့တဲ့ အသက်ငါးဆယ်ငါးနှစ်အရွယ် ဦးမောင်အေးလှကို မြောက်ဦးအထူးတရားရုံးကအလုပ်ကြမ်းနဲ့ ထောင်ဒဏ်နှစ်သုံးဆယ်ချမှတ်လိုက်ပါတယ်။
အဲဒီအမှုကို မြောက်ဦးအထူးတရားရုံးက စက်တင်ဘာလ ၅ ရက်နေ့မှာစစ်ဆေးပြီးနောက် တရားခံဦးမောင်အေးလှကို ရာဇသတ်ကြီး ဥပဒေပုဒ်မ-၃၇၆ အရ အလုပ်ကြမ်းနဲ့ ထောင်ဒဏ်နှစ်ဆယ်နှစ်၊ ပုဒ်မ-၃၇၇ အရ အလုပ်ကြမ်းနဲ့ ထောင်ဒဏ်ဆယ်နှစ်သီးခြားစီကျခံဖို့ အမိန့်ချမှတ်ခဲ့တာဖြစ်ပါတယ်။
အဲဒီဦးမောင်အေးလှဟာ ကျောက်တော်မြို့နယ်၊သိန်းတန်ကျေးရွာက ဖြစ်ပြီး ပြီးခဲ့တဲ့ဧပြီလ ၇ ရက်နေ့က ရမ်းချောင်းအတွင်းရှိ သူ့ရဲ့ ဥယျာဉ်ခြံမှာ အစောင့်လုပ်ကိုင်တဲ့ မိသားစုကအသက်ဆယ့်လေးနှစ်အရွယ် သမီးဖြစ်သူကို ဆိုလာပြားသွားယူဖို့ ခေါ်ဆောင်သွားပြီးလမ်းခရီးရှိယာယီတဲအတွင်း အတင်းအဓမ္မပြုကျင့်ခဲ့တာဖြစ်ပါတယ်။
အဲဒီအပြင်မိန်းကလေးငယ်ရဲ့ အသက်ရှစ်နှစ်အရွယ်ညီမငယ်အပေါ်မှာလည်း မဖွယ်မရာပြုလုပ်ခိုင်းခဲ့ကြောင်း နစ်နာသူရဲ့မိခင်ဖြစ်သူနဲ့အတူ မေလ ၁၅ ရက်နေ့မှာ သက်ဆိုင်ရာတရားဥပဒေစိုးမိုးရေးနဲ့ ပြည်သူ့လုံခြုံရေးဌာနမှာ အမှုဖွင့်တိုင်ကြားခဲ့တာဖြစ်ပါတယ်။
အဲဒီဦးမောင်အေးလှကို ဒီလပ်တာဝန်ရှိသူတွေစုံစမ်းထောက်လှမ်းခဲ့ရာ ဇူလိုင်လ ၃၀ ရက်နေ့မှာ သူ့ရဲ့ နေအိမ်မှာဖမ်းစစ်စဉ် ပြစ်မှုကျူးလွန်ကြောင်း ဝန်ခံထွက်ဆိုခဲ့တာမို့ ဩဂုတ်လ ၂၈ ရက်နေ့တရားစွဲခဲ့ပါတယ်။
