Border News Agency
ရသေ့တောင်၊ နိုဝင်ဘာ ၆။
တရားဥပဒေစိုးမိုးရေးနဲ့ ပြည်သူ့လုံခြုံရေးဌာန (DLEPS) မှာတာဝန်ထမ်းဆောင်ဖို့ရောက်လာတဲ့ အသက်မပြည့်သေးသူ လူငယ်လေးဦးကို ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) က နိုဝင်ဘာလ ၅ ရက်နေ့မှာ မိသားစုတွေဆီ ပြန်လွှတ်ပေးလိုက်ပါတယ်။
ရသေ့တောင်မြို့နယ်က အသက်ဆယ့်သုံး နှစ်အရွယ်မောင်စည်သူအောင်၊ အသက်ဆယ့်လေးနှစ်အရွယ် မောင်ချစ်မြတ်ဇော်၊အသက် ဆယ့်ငါးနှစ်အရွယ် မောင်မောင်ဝင်းစိုးနဲ့ မောင်ဟိန်းထက်ဇော်တို့ကို မိသားစုဆီပြန်အပ်လိုက်တာဖြစ်ပါတယ်။
သူတို့ လေးဦးဟာ နိုဝင်ဘာလ ၄ ရက်နေ့မှာ တာဝန်ထမ်းဆောင်ဖို့ ရောက်လာတာကြောင့် တာဝန်ရှိသူတွေကယာယီ လက်ခံစစ်ဆေးခဲ့ပြီးနောက် အသက်မပြည့်သေးတာကို အတည်ပြုနိုင်ခဲ့တာကြောင့် မိသားစုတွေကို ခေါ်ယူကာ ပြန်လည်လွှဲပြောင်းပေးခဲ့တာပါ။
အာရက္ခတပ်တော်ဟာ အသက်မပြည့်သေးသူ ကလေးသူငယ်တွေ၊ကျောင်းသားတွေနဲ့ ကျန်းမာရေးမကောင်းသူတွေကို စစ်မှုထမ်းဖို့လက်မခံဘူးလို့လည်းဆိုပါတယ်။
ပြီးခဲ့တဲ့ အောက်တိုဘာလ ၂၈ ရက်နေ့ကလည်း မြောက်ဦးမြို့နယ်က အသက်မပြည့်သေးဘဲ စစ်မှုထမ်းဖို့ ရောက်လာတဲ့ လူငယ်နှစ်ဦးကို မိသားစုတွေဆီ ULA/AA က ပြန်လည်လွှဲပြောင်းပေးခဲ့ပါသေးတယ်။
အာဏာသိမ်းစစ်တပ်ရဲ့ လက်နက်ကြီးနဲ့ လေကြောင်းတိုက်ခိုက်မှုတွေကြောင့် ဒေသခံပြည်သူတွေ စိုးရိမ်ထိတ်လန့်နေရသလို လူငယ်အချို့ဟာလည်း အကာအကွယ်ရဖို့နဲ့ ဒေသကာကွယ်ရေးမှာ ပါဝင်လိုတဲ့စိတ်နဲ့ အာရက္ခတပ်တော်(AA)ဆီသဘောဆန္ဒအလျောက် လာရောက်ပူးပေါင်းမှုတွေ ရှိနေတာဖြစ်ပါတယ်။
