Border News Agency

ပလက်ဝမြို့နယ်၊ တွီကင်းဝရွာမှာ ဖေဖော်ဝါရီ ၂၁ ရက်နေ့၊ နေ့လည် ကမီးလောင်မှုကြောင့် နေအိမ်အိမ်ဆယ်လုံးပျက်စီးတယ်လို့ သိရပါတယ်။ အဲဒီတွီကင်းဝရွာက ဦးကျော်သာဦးရဲ့အိမ်ဟာ ဖေဖော်ဝါရီ ၂၁ ရက်နေ့၊ နေ့လည် ၃ နာရီအချိန်ခန့်က ရေနွေးကျိုရာကနေ ဘေးရှိဝါးထရံကိုမီးကူးသွားပြီး မီးစလောင်သွားတယ်လို့ သိရပါတယ်။ အဲဒါကြောင့် ရွာသားတွေ ဝိုင်းဝန်းကူညီ မီးငြိမ်းသတ်ခဲ့ပေမယ့် မီးလောင်နေတဲ့အချိန်လေပြင်းတွေတိုက်နေလို့ မီးစတွေဟာ ဘေးအိမ်တွေကိုပါ ကူးစက်လောင်ကျွမ်းသွားပြီး ရွာထဲရှိအိမ်ဆယ်လုံးထိမီးလောင်ပျက်စီးသွားခဲ့ပါတယ်။ အဲဒီ မီးလောင်မှုကိုတော့ အာရက္ခပြည်သူ့တော်လှန်ရေးအစိုးရရဲ့ မီးသတ်ဌာနနဲ့ရွာသားတွေ ဝိုင်းဝန်းကူညီငြိမ်းသတ်ခဲ့မှုကြောင့် ညနေ ၅ နာရီအချိန်ခန့်မှာ မီးငြိမ်းသွားတယ်လို့ သိရပါတယ်။ မီးလောင်မှုနဲ့ပတ်သက်ပြီး မီးစလောင်ခဲ့တဲ့ အိမ်ရဲ့ကို တရားဥပဒေစိုးမိုးရေးနဲ့ ပြည်သူ့လုံခြုံရေးဌာန (DLEPS) မှ ဥပဒေလုပ်ထုံးလုပ်နည်းနဲ့အညီ အရေးယူဆောင်ရွက်နေပါတယ်။

​၇၈ ကြိမ်မြောက် ချင်းအမျိုးသားနေ့ အခမ်းအနားကို ချင်းကာကွယ်ရေးတပ်-အရှို (CDF-Asho) နဲ့အရှိုချင်းကာကွယ်ရေးတပ် (ACDF) တို့ ပူးပေါင်းပြီး CDF-Asho ရဲ့ နောက်တန်းစခန်းတခုမှာဖေဖော်ဝါရီလ၂၀ ရက်နေ့က ကျင်းပခဲ့ပါတယ်။ အဲဒီ​အခမ်းအနားမှာ ချင်းအမျိုးသားအလံတော်နဲ့ ကျဆုံးသွားတဲ အာဇာနည်သူရဲကောင်းတွေကို အလေးပြုခဲ့ကြသလို အဖွဲ့နှစ်ဖွဲ့ရဲ့ ပူးတွဲသဘောထား ထုတ်ပြန်ချက်ကိုလည်း ဖတ်ကြားခဲ့ကြပါတယ်။ အဲဒီအပြင် တက်ရောက်လာတဲ့ မဟာမိတ်တပ်ဖွဲ့ဝင်တွေကို CDF-Asho နဲ့ ACDF က ရဲဘော်၊ စစ်မေတွေက ချင်းရိုးရာဝါးညှပ်အကတွေ၊ တေးသီချင်းတွေနဲ့ ဧည့်ခံဖျော်ဖြေခဲ့ကြပါတယ်။ ​ဒီပွဲဟာ ချင်းအမျိုးသားရေးကို ရှေးရှုပြီး တော်လှန်ရေးအဖွဲ့အစည်းတွေကြား စည်းလုံးညီညွတ်မှုကို ပြသဖို့ ရည်ရွယ်ကျင်းပတာဖြစ်တယ်လို့ သိရပါတယ်။

​ရှမ်းပြည်မြောက်ပိုင်း၊ တုံချိန်မြို့နယ် အားကစားရုံမှာ ကိုးကန့်တရုတ်နှစ်သစ်ကူးပွဲတော် အခမ်းအနားကို ဖေဖော်ဝါရီလ၂၀ ရက် ညနေပိုင်းက စည်ကားသိုက်မြိုက်စွာ ကျင်းပခဲ့ပါတယ်။ အဲ​ဒီအခမ်းအနားကို အထူးဒေသစစ်ဘက်နဲ့ အုပ်ချုပ်ရေးဆိုင်ရာတာဝန်ရှိသူတွေ၊ အားကစားသမားတွေနဲ့ ဒေသခံပြည်သူ ထောင်ပေါင်းများစွာ တက်ရောက်ခဲ့ကြတာပါ။ အထူးဒေသအတွင်းရှိ ပြည်သူတွေရဲ့ ယဉ်ကျေးမှုဘဝ ကြွယ်ဝလာစေဖို့၊စည်းလုံးညီညွတ်မှု အားကောင်းစေဖို့နဲ့ အားကစားကဏ္ဍ ဖွံ့ဖြိုးတိုးတက်လာဖို့ ရည်ရွယ်ပြီး ဒီပွဲတော်ကို ကျင်းပတာဖြစ်တယ်လို့ သိရပါတယ်။

​ထိုင်း-လာအိုနယ်စပ်အနီး Bueng Khong Long မြို့နယ်အတွင်းမှာ ထိုင်းအထူးခြေလျင်တပ်ရင်း ၂၁၀၈ နဲ့ ဒေသခံရဲတပ်ဖွဲ့ဝင်တွေ ပူးပေါင်းပြီးရှောင်တခင်စစ်ဆေးမှုတွေပြုလုပ်ခဲ့ရာ မူးယစ်ဆေးသုံးစွဲသူ ၂ ဦးကို ဖမ်းဆီးရမိခဲ့ပါတယ်။ အဲဒီ ​ပူးပေါင်းအဖွဲ့ဟာ လမ်းသွားလမ်းလာတွေနဲ့ယာဉ်တွေကိုစစ်ဆေးတဲ့စစ်ဆေးရေးဂိတ်တခုကို တည်ဆောက်ခဲ့ပြီး ရှောင်တခင်စစ်ဆေးရာကနေ အမျိုးသား ၂ ဦးကို မူးယစ်ဆေးဝါး၊ ဆက်စပ်ပစ္စည်းတွေနဲ့အတူ ဖမ်းမိခဲ့တာပါ။  အဲဒီ ဖမ်းမိသူတွေကို ဥပဒေအရ အရေးယူနိုင်ဖို့အတွက် သက်ဆိုင်ရာရဲစခန်းကို ပို့ဆောင်ထားပြီး ဖြစ်တယ်လို့ ထိုင်းဘုရင့်တပ်မတော်က ဖေဖော်ဝါရီလ ၂၁ ရက်၊မနေ့က ထုတ်ပြန်ထားပါတယ်။  ​အဲဒီ ဖမ်းဆီးရမိသူတွေဆီကနေတဆင့် ဒေသတွင်းကမူးယစ်ဆေးဝါးကွန်ရက်တွေကိုပါ ဆက်လက်စုံစမ်းဖော်ထုတ်သွားမှာဖြစ်ပြီး နယ်စပ်ဒေသ မူးယစ်ဆေးဝါးပြဿနာကို ရေရှည်ဖြေရှင်းနိုင်ဖို့ အခုလို စစ်ဆေးဖမ်းဆီးမှုတွေကို အရှိန်မြှင့်လုပ်ဆောင်နေတာလို့ ဆိုပါတယ်။

​ရန်ကုန်တိုင်း၊ လှည်းကူးမြို့နယ်က ဆင်ဖုန် မြောက် ကျေးရွာအနီးမှာရှိတဲ့ လယ်ကွင်းတခုမှာ ဖေဖော်ဝါရီလ ၂၁ ရက်၊မနက်ပိုင်းက ရှေ့ထွက်မိုင်း ၆ လုံးကို ရှာဖွေတွေ့ရှိခဲ့တယ်လို့ စစ်ကော်မရှင်တပ် ထုတ်ပြန်ပါတယ်။ အဲ​ဒီဖြစ်စဉ်ဟာ ဒေသခံတွေရဲ့ သတင်းပေးချက်အရ နယ်မြေခံလုံခြုံရေးအဖွဲ့ဝင်တွေက သွားရောက်စစ်ဆေးရာကနေ ပေါ်ပေါက်ခဲ့တာဖြစ်ပြီး လယ်ကွင်းထဲမှာ အသင့်ထောင်ထားတဲ့ အနေအထားနဲ့ရှိနေတဲ့ PC ပိုက် အပြာရောင် နဲ့ ပြုလုပ်ထားတဲ့ ရှေ့ထွက်မိုင်း ၆ လုံးကို တွေ့ရှိခဲ့တာလို့ ဆိုပါတယ်။ အဲဒီတွေ့ရှိတဲ့ မိုင်းတွေကိုတော့ လုံခြုံရေးအဖွဲ့ဝင်တွေက အန္တရာယ်မရှိအောင် စနစ်တကျ သက်မဲ့ပြုလုပ် သိမ်းဆည်းခဲ့တယ်လို့ ဆိုပါတယ်။ ​အဲဒီ ဒီမိုင်းတွေဟာ CRPH၊ NUG နဲ့ PDF အဖွဲ့ဝင်တွေက အများပြည်သူဆိုင်ရာ အဆောက်အအုံတွေနဲ့ လမ်းတံတားတွေကို တိုက်ခိုက်ဖို့အတွက် ပြင်ဆင်ထားတာဖြစ်တယ်လို့ စွပ်စွဲပြောဆိုထားပါတယ်။ အဲဒါကြောင့် မိုင်းတွေတွေ့တဲ့ နေရာတဝိုက်ကို နယ်မြေရှင်းလင်းတာနဲ့စုံစမ်းစစ်ဆေးတာတွေ ဆက်လုပ်နေတယ်လို့ဆိုပါတယ်။

​ထိုင်းနိုင်ငံက အိမ်ရှင်အဖြစ် ကျင်းပမယ့် Cobra Gold 2026 စစ်ရေးလေ့ကျင့်မှုမှာ ပါဝင်ဖို့အတွက် ဖေဖော်ဝါရီလ၂၀ ရက်က ဆာတာဟစ်ရေတပ်စခန်းကို ရောက်ရှိလာတဲ့ အမေရိကန်တပ်မတော်ရဲ့ စစ်လက်နက်ပစ္စည်းတွေကို လေ့ကျင့်ရေးနယ်မြေတွေဆီ စတင်သယ်ယူနေပြီ ဖြစ်ပါတယ်။ အဲဒီ စစ်လက်နက်တွေထဲမှာ နာမည်ကျော် AH-64E Apache တိုက်ခိုက်ရေးရဟတ်ယာဉ်တွေ၊ M777 အမြောက်ကြီးတွေအပြင် သံချပ်ကာလူနာတင်ယာဉ်နဲ့ ဘီးတပ်သံချပ်ကာယာဉ် အမျိုးမျိုး ပါဝင်နေတာပါ။ အဲဒီအပြင် တခြားစစ်ဘက်သုံး ထောက်ပံ့ရေးယာဉ်တွေနဲ့ဆက်သွယ်ရေးကိရိယာ အမြောက်အမြားကိုလည်း လေ့ကျင့်ရေးကွင်းတွေဆီကို ဆက်လက်ပို့ဆောင်နေတယ်လို့ သိရပါတယ်။ ​ဒီနှစ် Cobra Gold စစ်ရေးလေ့ကျင့်မှုဟာ ထိုင်းနဲ့ အမေရိကန်အပြင် တခြားမဟာမိတ်နိုင်ငံတွေလည်း ပါဝင်မယ့် နိုင်ငံစုံစစ်ရေးလေ့ကျင့်မှုကြီး ဖြစ်ပါတယ်။ ဒီလေ့ကျင့်မှုမှာ စစ်ရေးဆိုင်ရာ ပူးပေါင်းဆောင်ရွက်မှုတွေတင်မကဘဲ လူသားချင်းစာနာထောက်ထားမှုနဲ့ သဘာဝဘေးအန္တရာယ် ကူညီကယ်ဆယ်ရေး လေ့ကျင့်ခန်းတွေကိုပါ ထည့်သွင်းပြုလုပ်သွားဖို့ ရှိနေတယ်လို့ သိရပါတယ်။ 

​ထိုင်း-ကမ္ဘောဒီးယားနယ်စပ်မှာ တောမီးလောင်ကျွမ်းမှု ပြင်းထန်နေတာကြောင့် ကမ္ဘောဒီးယားဒေသခံတွေဟာ မိူင်ပရာဝီဟီးယား (Preah Vihear) မြို့နယ်ထဲက ဘုန်းကြီးကျောင်းတကျောင်းမှာ ဖေဖော်ဝါရီလ ၂၁ ရက်နေ့ကစပြီးယာယီလာရောက်ခိုလှုံနေကြရပါတယ်။ အဲဒီ ​ပလင်သမ် (Pleng Thom) နဲ့ ချအမ်း (Cha-em) လူနေရပ်ကွက်တွေမှာ တောမီးက အရှိန်အဟုန်နဲ့ ကူးစက်နေတာကြောင့် ဒေသခံတပ်ဖွဲ့တွေက အရေးပေါ် ဖယ်ရှားခိုင်းခဲ့တာပါ။ ပြီးခဲ့တဲ့ရက်ပိုင်းကလည်း ဒီရပ်ကွက်တွေမှာ တောမီးလောင်ကျွမ်းခဲ့တာကြောင့် အခုတကြိမ်မှာတော့ ဘေးကင်းလုံခြုံဖို့အတွက် ဝတ်ဖိုးငန်ဘုန်းကြီးကျောင်းဆီကို ရွာသားတွေရောက်ရှိလာနေကြတာ ဖြစ်ပါတယ်။ ဒီအိုးအိမ်စွန့်ခွာမှုဟာ အရှိန်အဟုန်နဲ့ကူးစက်နေတဲ့ တောမီးအန္တရာယ်ကြောင့်သာဖြစ်ပြီး တခြားနယ်စပ်ပြဿနာတွေကြောင့် မဟုတ်ဘူးလို့ သိရပါတယ်။ အဲဒီ ရွာသားတွေဟာ အထုပ်အပိုးကိုယ်စီနဲ့ ဘုန်းကြီးကျောင်းဝင်းထဲမှာ ခိုလှုံနေကြရပြီး မီးငြှိမ်းသတ်နိုင်မယ့် အခြေအနေကို စောင့်ကြည့်နေကြပါတယ်။ ​အခုလောင်ကျွမ်းနေတဲ့ တောမီးဟာ နယ်စပ်တလျှောက်ကို ကူးစက်နေတာကြောင့် ဒေသခံတွေရော နယ်စပ်စောင့်တပ်ဖွဲ့ဝင်တွေပါ စိုးရိမ်ပူပန်နေကြရပြီး မီးငြှိမ်းသတ်နိုင်ဖို့ ဆက်လက်ကြိုးစားနေကြဆဲ ဖြစ်တယ်လို့သိရပါတယ်။

အာရက္ခတပ်တော် ထိန်းချုပ်နယ်မြေမှာလူနေထိုင်မှု နည်းပါးနေသေးတာကြောင့် အခြေခံအိမ်ဆောက်ပစ္စည်းတွေဖြစ်တဲ့ ဝါးနဲ့ဓနိဝယ်လိုအားတွေ သိသိသာသာ ကျဆင်းနေပါတယ်။ ​အရင်ကဆိုရင် တခြားဒေသတွေကနေ ဝါးတွေအမြောက်အမြား ဝင်ရောက်ခဲ့ပေမယ့် အခုတော့ နီးစပ်ရာဒေသထွက်ဝါးတချို့ပဲ ဝင်နေပြီးဝယ်မယ့်သူမရှိသလောက် အရောင်းအဝယ်နည်းပါးနေတာပါ။ ​အဲဒီအပြင် သွားလာရေး အခက်အခဲတွေရှိနေသလို ဒေသခံတွေကလည်းအိမ်အသစ်ဆောက်ဖို့ထက် တခြားအရေးကြီးတဲ့ စားဝတ်နေရေးကိုပဲ ဦးစားပေးနေကြရလို့ အိမ်ဆောက်ပစ္စည်းဈေးကွက် ငြိမ်နေတာ ဖြစ်ပါတယ်။ ​ကုန်သည်တွေဘက်မှာလည်း ဝယ်လိုအားမရှိတာကြောင့် ပစ္စည်းတွေသိုလှောင်ထားရတာကြာလာရင် ပျက်စီးဆုံးရှုံးမှာကို စိုးရိမ်နေကြပါတယ်။ ဒါကြောင့် နယ်မြေအတွင်းလူပြန်လည်အခြေချမှုတွေများလာမှပဲ ဒီဈေးကွက်က ပြန်ကောင်းလာနိုင်မယ်လို့လည်း ကုန်သည်တွေကခန့်မှန်းနေကြပါတယ်။

​အာရက္ခတပ်တော်(AA)ထိန်းချုပ်ထားတဲ့ သံတွဲနဲ့တောင်ကုတ်ခရိုင်မှာ ဖေဖော်ဝါရီလ ၂၁ ရက်နေ့ကကျင်းပတဲ့ ၇၈ ကြိမ်မြောက် ချင်းအမျိုးသားနေ့ အခမ်းအနားကို ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) က တာဝန်ရှိသူတွေ တက်ရောက်ဂုဏ်ပြုခဲ့ကြပါတယ်။ အဲဒီပွဲအတွင်းမှာ ချင်းရိုးရာအကတွေအပြင်ရက္ခိုင်ရိုးရာအကတွေနဲ့ပါစည်ကားသိုက်မြိုက်စွာ ဖျော်ဖြေခဲ့ကြတာပါ။ ​ULA/AA ဘက်က တာဝန်ရှိသူတွေက ချင်းလူမျိုးတွေရဲ့ ယဉ်ကျေးမှုနဲ့ အမျိုးသားအခွင့်အရေးတွေကို အသိအမှတ်ပြုကြောင်း ဂုဏ်ပြုစကားပြောကြားခဲ့သလို အခမ်းအနားအတွက် ငွေကြေးထောက်ပံ့မှုတွေပါ ပြုလုပ်ခဲ့ပါတယ်။ အဲဒီအပြင် အနာဂတ်အာရက္ခတိုင်းပြည် တည်ဆောက်ရေးအတွက် ညီနောင်လူမျိုးစုတွေအကြား ပိုမိုလက်တွဲဆောင်ရွက်သွားမယ်လို့လည်း ဆိုပါတယ်။ အဲဒီ ​ချင်းအမျိုးသားနေ့ အထိမ်းအမှတ်အဖြစ် ဘောလုံးပွဲ၊ လွန်ဆွဲပွဲတွေနဲ့ ပျော်ပွဲရွှင်ပွဲတွေကိုပါ ထည့်သွင်းကျင်းပခဲ့ပြီး ချင်းရိုးရာခေါင်ရည်၊အစားအစာတွေနဲ့လည်း ဧည့်ခံကျွေးမွေးခဲ့ကြပါတယ်။ ဒီနှစ်မှာတော့ ချင်းအမျိုးသားနေ့ကို သံတွဲ၊ တောင်ကုတ်တင်မကဘဲ အာရက္ခတပြည်လုံးမှာရှိတဲ့ မြို့နယ်အသီးသီးမှာ အကြီးကျယ် ကျင်းပခဲ့ကြတာ ဖြစ်ပါတယ်။

​ထိုင်းနိုင်ငံ၊ မုဒ္ဒါဟန်ခရိုင် (Mukdahan) ရှိ နယ်ခြားစောင့်ရဲတပ်ဖွဲ့ တပ်ရင်း ၂၃၄ နဲ့ ဒေသန္တရအုပ်ချုပ်ရေးအဖွဲ့တွေဟာ ဖေဖော်ဝါရီလ ၂၀ ရက်နေ့မှာ ဒွန်တန်မြို့နယ်အတွင်းရှိကားအစိတ်အပိုင်းဖြုတ်ရောင်းနေတဲ့နေရာတခုကို ဝင်ရောက်စီးနင်းခဲ့ပြီး ပိုင်ရှင်မဲ့ကားတွေနဲ့အတူ အပိုပစ္စည်းအများအပြားကို သိမ်းဆည်းရမိခဲ့ပါတယ်။ အဲ​ဒီစီးနင်းမှုအတွင်းမှာ သက်သေခံပစ္စည်းတွေအဖြစ် ယသောသွန်လိုင်စင်နံပါတ် ບບ-၃၂၉၁ ပါ Toyota Revo အဖြူရောင် နဲ့ ဘန်ကောက်လိုင်စင်နံပါတ် ၂ခသ-၄၁၈၂ ပါ Toyota Revo မီးခိုးရောင်ကားအကြွင်းအကျန်တွေအပြင် ကားသော့တွေကိုပါ သိမ်းဆည်းရမိခဲ့တာဖြစ်ပါတယ်။ ​အဲဒီအပြင် ကားကိုယ်ထည်အကြွင်းအကျန် ၂ ခုနဲ့ အိတ်ဇောပိုက် ၂ ခုတို့ကိုပါ ရှာဖွေတွေ့ရှိခဲ့ပြီး ကားကိုယ်ထည်နံပါတ်တွေဖြစ်တဲ့MR0JBBCC90182582 နဲ့ MR0CBBCD70041738 တို့ ဖြစ်ကြပါတယ်။ ​ပြီးခဲ့တဲ့ ဖေဖော်ဝါရီလ ၁၉ ရက်၊မနက် ၁၁ နာရီခန့်မှာ ဒွန်တန်မြို့နယ်၊ ဖိုးဆိုင်းတိုက်နယ်၊ ဘန်နာဖိုးကျေးရွာရှိ ရော်ဘာခြံတခုအတွင်း မသင်္ကာဖွယ်ရာ လူတစုက ကားကိုယ်ထည်တွေဖြုတ်ရောင်းနေတယ်ဆိုတဲ့ သတင်းပေးချက်အရ တာဝန်ရှိသူတွေက ပူးပေါင်းစစ်ဆေးခဲ့တာလို့ သိရပါတယ်။ ​အဲဒီနေရာကို သွားရောက်စစ်ဆေးချိန်မှာတော့ ကားတွေကိုအစိတ်အပိုင်းဖြုတ်ထားတဲ့ အကြွင်းအကျန်တွေကိုသာ တွေ့ရှိခဲ့ရပြီး၊ ရော်ဘာခြံပိုင်ရှင်အပါအဝင် ဘယ်သူ့ကိုမှ မတွေ့ရှိခဲ့ရပါဘူး။ အဲ​ဒါကြောင့် သက်ဆိုင်ရာတာဝန်ရှိသူတွေက သက်သေခံပစ္စည်းအားလုံးကို သိမ်းဆည်းကာ ဒွန်တန်ရဲစခန်းဆီကို ပို့ဆောင်ခဲ့ပါတယ်။ ​အဲဒီ ရဲတပ်ဖွဲ့အနေနဲ့ ရော်ဘာခြံပိုင်ရှင်ကို ခေါ်ယူစစ်ဆေးဖို့ စုံစမ်းနေပြီး ခိုးယူလာတဲ့ကားတွေ ဟုတ်၊မဟုတ်နဲ့ ကားပိုင်ရှင်အစစ်အမှန်ကို ဖော်ထုတ်နိုင်ဖို့ ဆက်လက်ဆောင်ရွက်နေပါတယ်။