ပလက်ဝမြို့နယ်၊ တွီကင်းဝရွာမှာ ဖေဖော်ဝါရီ ၂၁ ရက်နေ့၊ နေ့လည် ကမီးလောင်မှုကြောင့် နေအိမ်အိမ်ဆယ်လုံးပျက်စီးတယ်လို့ သိရပါတယ်။
အဲဒီတွီကင်းဝရွာက ဦးကျော်သာဦးရဲ့အိမ်ဟာ ဖေဖော်ဝါရီ ၂၁ ရက်နေ့၊ နေ့လည် ၃ နာရီအချိန်ခန့်က ရေနွေးကျိုရာကနေ ဘေးရှိဝါးထရံကိုမီးကူးသွားပြီး မီးစလောင်သွားတယ်လို့ သိရပါတယ်။
အဲဒါကြောင့် ရွာသားတွေ ဝိုင်းဝန်းကူညီ မီးငြိမ်းသတ်ခဲ့ပေမယ့် မီးလောင်နေတဲ့အချိန်လေပြင်းတွေတိုက်နေလို့ မီးစတွေဟာ ဘေးအိမ်တွေကိုပါ ကူးစက်လောင်ကျွမ်းသွားပြီး ရွာထဲရှိအိမ်ဆယ်လုံးထိမီးလောင်ပျက်စီးသွားခဲ့ပါတယ်။
အဲဒီ မီးလောင်မှုကိုတော့ အာရက္ခပြည်သူ့တော်လှန်ရေးအစိုးရရဲ့ မီးသတ်ဌာနနဲ့ရွာသားတွေ ဝိုင်းဝန်းကူညီငြိမ်းသတ်ခဲ့မှုကြောင့် ညနေ ၅ နာရီအချိန်ခန့်မှာ မီးငြိမ်းသွားတယ်လို့ သိရပါတယ်။
မီးလောင်မှုနဲ့ပတ်သက်ပြီး မီးစလောင်ခဲ့တဲ့ အိမ်ရဲ့ကို တရားဥပဒေစိုးမိုးရေးနဲ့ ပြည်သူ့လုံခြုံရေးဌာန (DLEPS) မှ ဥပဒေလုပ်ထုံးလုပ်နည်းနဲ့အညီ အရေးယူဆောင်ရွက်နေပါတယ်။
