Border News Agency
မြောက်ဦး၊ မေ ၃၀။
ရက္ခိုင်ပြည်အချုပ်အခြာအာဏာရရှိရေး မျှော်မှန်းချက်နဲ့အတူ အာရက္ခပြည်သူ့တော်လှန်ရေးအစိုးရဟာ စစ်ရေးအပြင် ဒေသတွင်းတရားဥပဒေစိုးမိုးရေး၊ အုပ်ချုပ်ရေးနဲ့ မြို့ပြ/ကျေးလက်ဖွံ့ဖြိုးတိုးတက်ရေးလုပ်ငန်းတွေကို ပြည်သူတွေနဲ့အတူဖော်ဆောင်နေတယ်လို့ ဆိုပါတယ်။
အဲဒီလိုဖော်ဆောင်ရာမှာ မြို့ပြစည်ပင်သာယာရေးနဲ့ စနစ်တကျတိုးတက်ဖွံ့ဖြိုးရေးအတွက် ရက္ခိုင်အမျိုးသားအဖွဲ့ချုပ် (ULA) က မေလ ၂၉ ရက်နေ့က ထုတ်ပြန်ပါတယ်။
အာရက္ခဒေသက စနစ်တကျမရှိခဲ့တဲ့မြို့ပြစနစ်ကို ပြုပြင်ဖို့၊ လူဦးရေတိုးပွားလာမှုနဲ့ မြို့ပြချဲ့ထွင်မှုတွေကို စနစ်တကျစီမံခန့်ခွဲနိုင်ဖို့အတွက် မြို့ပြစီမံကိန်းလုပ်ငန်းကော်မတီတွေကိုလည်း အဆင့်ဆင့်ဖွဲ့စည်းဆောင်ရွက်နေတယ်လို့ ဆိုပါတယ်။
အဲဒီထဲမှာ ရှေးဟောင်းယဉ်ကျေးမှုအမွေအနှစ်ဖြစ်တဲ့ မြောက်ဦးမြို့ကို သန့်ရှင်းသပ်ရပ်ပြီး ရေရှည်တည်တံ့ခိုင်မြဲအောင် ထိန်းသိမ်းစောင့်ရှောက်ဖို့ မြောက်ဦးမြို့ပြတည်ဆောက်ရေးစီမံကိန်းကိုလည်း အကောင်အထည်ဖော်နေတာပါ။
အဲဒါကြောင့်ပြည်သူတွေဟာ ဒေသတည်ဆောက်ရေးလုပ်ငန်းတွေ အရှိန်အဟုန်နဲ့အောင်မြင်နိုင်ဖို့အတွက် အမျိုးသားရေးသတိ၊ တိုင်းချစ်ပြည်ချစ်စိတ်တွေနဲ့အတူ အင်တိုက်အားတိုက် ပူးပေါင်းပါဝင်ကြဖို့ ULA က တိုက်တွန်းထားပါတယ်။
အဲဒီမြို့ပြစီမံကိန်းတွေဖော်ဆောင်မယ့် မြေနေရာတချို့ဟာ မူဆလင်တွေပိုင်နေရာတွေဖြစ်သလို မူလမြေပိုင်ရှင်တချို့ဟာ မြေယာလျှော်ကြေးငွေနည်းပါးတာမို့ လက်မခံကြဘူးလို့ မြေပိုင်ရှင်တွေကဆိုကြပါတယ်။
အဲဒီမြို့ပြစီမံကိန်းတွေဟာ ဒေသခံပြည်သူတွေအပါအဝင် အများပြည်သူအကျိုးစီးပွားထက် ငွေကြေးချမ်းသာသူတွေ၊ မူးယစ်ရာဇာတွေ၊မှောင်ခိုသမားတွေသာ အခွင့်အရေးရကောင်းစားသွားကြမယ့်အရိပ်အယောင်တွေ တွေ့မြင်နေရတယ်လို့ အာရက္ခပြည်သူတွေကဆိုကြပါတယ်။
