​Border News Agency ​ဘင်္ဂလားဒေ့ရှ်၊ ဖေဖော်ဝါရီ ၁၃။ ​ဘင်္ဂလားဒေ့ရှ်နိုင်ငံရဲ့ ၁၃ ကြိမ်မြောက် အမျိုးသားလွှတ်တော်ရွေးကောက်ပွဲမှာ အမျိုးသမီးကိုယ်စားလှယ် ၇ ဦးအနိုင်ရရှိပြီး လွှတ်တော်အမတ်အဖြစ် ရွေးချယ်ခံခဲ့ရတယ်လို့ တရားမဝင်မဲရလဒ်တွေအရ သိရပါတယ်။ ​အမတ်နေရာအများစုကို အပြတ်အသတ်အနိုင်ရပြီး အစိုးရဖွဲ့နိုင်ဖို့ သေချာနေတဲ့ Bangladesh Nationalist Party (BNP) က အမျိုးသမီးကိုယ်စားလှယ် ၆ ဦးဟာ ပါတီရဲ့ စပါးနှံတံဆိပ်နဲ့ သက်ဆိုင်ရာမဲဆန္ဒနယ်တွေမှာ အသီးသီး အနိုင်ရခဲ့ကြတာပါ။ ​အနိုင်ရရှိခဲ့တဲ့ BNP အမျိုးသမီးကိုယ်စားလှယ်တွေကတော့ Manikganj - 3 မဲဆန္ဒနယ်က Afroza Khan Rita၊ Jhalokati - 2 က Israt Sultana Elen Bhutto၊ Sylhet - 2 က Tahsina Rushdir Luna၊ Faridpur - 2 က Shama Obaid၊ Faridpur - 3 က Nayab Yusuf Kamal နဲ့ Natore - 1 က Farzana Sharmin Putul တို့ပဲ ဖြစ်ပါတယ်။ ​အဲဒီအပြင် BNP ပါတီကနေ အရင်ကထုတ်ပယ်ခံထားရတဲ့ Barrister Rumin Farhana ဟာလည်း Brahmanbaria - 2 မဲဆန္ဒနယ်ကနေ တစ်သီးပုဂ္ဂလကိုယ်စားလှယ်အဖြစ် ဝင်ရောက်ယှဉ်ပြိုင်ပြီး အနိုင်ရရှိသွားခဲ့တာကြောင့် စုစုပေါင်းအမျိုးသမီး ၇ ဦး လွှတ်တော်တက်ခွင့် ရရှိမှာဖြစ်ပါတယ်။ ​အခုထွက်ပေါ်လာတဲ့ရလဒ်တွေဟာ တနိုင်ငံလုံးအတိုင်းအတာနဲ့ မဲရေတွက်မှုတွေအပြီး ထွက်ပေါ်လာတဲ့ အကြိုရလဒ်တွေ ဖြစ်ပါတယ်။

​Border News Agency ဘင်္ဂလားဒေ့ရှ်၊ ဖေဖော်ဝါရီ ၁၃။ ​ဘင်္ဂလားဒေ့ရှ်နိုင်ငံရဲ့ ၁၃ ကြိမ်မြောက် အမျိုးသားလွှတ်တော် ရွေးကောက်ပွဲမှာ တန်ဂေးလ် (Tangail) ခရိုင်က အမတ်နေရာ ၈ ခုစလုံးကို Bangladesh Nationalist Party (BNP) ကိုယ်စားလှယ်တွေနဲ့ ပါတီဝင်တစ်သီးပုဂ္ဂလ ကိုယ်စားလှယ်တဦးက အနိုင်ရရှိသွားပါတယ်။ အဲ​ဒီရလဒ်တွေကို ဖေဖော်ဝါရီလ ၁၃ ရက်၊ ဒီနေ့မနက် ၂ နာရီ ၄၅ မိနစ်အချိန်မှာ ခရိုင်ရွေးကောက်ပွဲအရာရှိ ရှာရီဖာဟတ်ခ်က တရားဝင်ထုတ်ပြန်လိုက်တာပါ။ ​တန်ဂေးလ်ခရိုင်အတွင်းက မဲဆန္ဒနယ် ၈ ခုစလုံးမှာ BNP ပါတီက ကိုယ်စားလှယ် ၇ ဦး အနိုင်ရခဲ့ပြီး ကျန်တဲ့တနေရာမှာတော့ BNP ကပဲ တစ်သီးပုဂ္ဂလအဖြစ် ခွဲထွက်ယှဉ်ပြိုင်တဲ့ကိုယ်စားလှယ်က အနိုင်ရခဲ့တာဖြစ်ပါတယ်။ အဲဒီ တန်ဂေးလ် - ၁ မှာ Fakir Mahbub Anam၊ တန်ဂေးလ် -၂ မှာ Abdus Salam Pintu၊ တန်ဂေးလ် - ၃ မှာ တစ်သီးပုဂ္ဂလ လွတ်ဖာရာမန်ခန်းအာဇတ် (Lutfar Rahman Khan Azad)၊ တန်ဂေးလ် - ၄ မှာ Lutfar Rahman Matin တို့က နယ်မြေအလိုက်အနိုင်ရသူတွေ ဖြစ်ပါတယ်။  ​အဲဒီအပြင် တန်ဂေးလ် - ၅ (Sadar) မှာ BNP ဗဟိုပြန်ကြားရေးအတွင်းရေးမှူး Sultan Salahuddin၊ တန်ဂေးလ် - ၆ မှာ Rabiul Awal Lavlu၊ တန်ဂေးလ် - ၇ မှာ Abdul Kalam Azad နဲ့ တန်ဂေးလ် - ၈ မှာ Ahmed Azam Khan တို့က မဲအပြတ်အသတ်နဲ့အနိုင်ရရှိခဲ့တာ ဖြစ်ပါတယ်။ အဲဒီရွေးကောက်ပွဲကို ဖေဖော်ဝါရီလ ၁၂ ရက်၊ မနက် ၇ နာရီခွဲကနေ ညနေ ၄ နာရီခွဲအထိ ပြုလုပ်ခဲ့တာဖြစ်ပြီး လုံခြုံရေးအတွက် ရဲတပ်ဖွဲ့၊ စစ်တပ်နဲ့ BGB တပ်ဖွဲ့ဝင် ၁၉,၀၀၀ ကျော်ကို အသုံးပြုခဲ့ပါတယ်။ ​တန်ဂေးလ်ခရိုင်တခုလုံးမှာ မဲဆန္ဒနယ် ၈ ခုအတွက် ကိုယ်စားလှယ် ၄၇ ဦး ယှဉ်ပြိုင်ခဲ့ကြပြီး မဲပေးသူ ၆၀ ရာခိုင်နှုန်းဝန်းကျင် ရှိခဲ့တယ်လို့လည်း သိရပါတယ်။

​ထိုင်းနိုင်ငံ၊ ချင်းရိုင်းခရိုင်၊မယ်ဆိုင်မြို့မှာ ၁၀၂ ကြိမ်မြောက် ထိုင်း-မြန်မာ ဒေသဆိုင်ရာ နယ်စပ်ကော်မတီ (TBC) အစည်းအဝေးကို ဖေဖော်ဝါရီလ ၁၀ ရက်နေ့က ကျင်းပခဲ့ပါတယ်။ ​နှစ်နိုင်ငံ TBC ဥက္ကဋ္ဌတွေနဲ့ ကိုယ်စားလှယ်အဖွဲ့ဝင်တွေဟာ ထိုင်း-မြန်မာချစ်ကြည်ရေး အမှတ် ၁ တံတားပေါ်မှာ အပြန်အလှန်တွေ့ဆုံနှုတ်ဆက်ခဲ့ကြပါတယ်။ ​အဲဒီနောက် မယ်ဆိုင်မြို့ရှိ မဲခေါင်ဒေသဟိုတယ်မှာ တနာရီခွဲကြာ ဆွေးနွေးခဲ့ကြပြီး နယ်စပ်တစ်လျှောက်လုံခြုံရေး၊တရားဥပဒေစိုးမိုးရေးနဲ့ သဘာဝပတ်ဝန်းကျင်ဆိုင်ရာ ကိစ္စရပ်တွေကို အဓိကထား တိုင်ပင်ခဲ့ကြပါတယ်။ ​အထူးသဖြင့် နယ်စပ်မှုခင်းနှိမ်နင်းရေး၊ ရေဘေးစီမံခန့်ခွဲမှုနဲ့ မယ်ဆိုင်မြစ်အတွင်း ဓာတုညစ်ညမ်းမှု တားဆီးရေးတွေကိုအလေးပေးဆွေးနွေးခဲ့ကြတယ်လို့ သိရပါတယ်။ ​အဲဒီအစည်းအဝေးဟာ ဒေသန္တရအဆင့် ပူးပေါင်းဆောင်ရွက်မှုကို အဆင့်မြှင့်တင်ပြီး နယ်စပ်နေပြည်သူတွေအတွက် ဘေးကင်းလုံခြုံတဲ့ လူနေမှုပတ်ဝန်းကျင် ဖန်တီးပေးဖို့ ရည်ရွယ်တာလို့လည်းဆိုပါတယ်။

​အာရက္ခတပ်တော် ထိန်းချုပ်ထားတဲ့ ကျောက်တော်မြို့နယ်မှာ ယာဉ်တိုက်မှုတွေ လျော့နည်းစေဖို့အတွက် တရားဥပဒေစိုးမိုးရေးနဲ့ ပြည်သူ့လုံခြုံရေးဌာန (DLEPS) က ယာဉ်အန္တရာယ်သတိပေး လက်ကမ်းစာစောင်တွေ လိုက်လံဖြန့်ဝေနေပါတယ်။ ဒီလုပ်ငန်းစဉ်ကို DLEPS တပ်ဖွဲ့ဝင်တွေနဲ့ ULA/AA အဖွဲ့ဝင်တွေ ပူးပေါင်းပြီး မြို့ပေါ်က လမ်းဆုံလမ်းခွတွေ၊ဈေးတွေနဲ့ ကားဂိတ်၊ ဆိပ်ကမ်းတွေမှာ အသိပညာပေး ဗီနိုင်းတွေစိုက်ထူတာ၊ စာစောင်ဝေတာတွေ လုပ်ဆောင်နေတာပါ။ ​အဓိကကတော့ အာရက္ခပြည်သူ့တော်လှန်ရေးအစိုးရက ထုတ်ပြန်ထားတဲ့ ယာဉ်စည်းကမ်း ၁၀ချက်နဲ့ လမ်းအသုံးပြုသူတွေ လိုက်နာရမယ့် စည်းကမ်း ၁၉ ချက်ကို ပြည်သူတွေ သိရှိလိုက်နာဖို့အတွက် ကြပ်မတ်စစ်ဆေးနေတာ ဖြစ်ပါတယ်။ ​အာရက္ခတပ်တော်ကထိန်းချုပ်ထားတဲ့ မြို့နယ်တွေမှာ အာရက္ခပြည်သူတွေဘေးကင်းလုံခြုံစေဖို့အတွက် လမ်းမတွေပေါ်မှာ ယာဉ်ကြောရှင်းလင်းတာနဲ့ အသိပညာပေးတာတွေကို အခုလို ဆက်တိုက်လုပ်ဆောင်နေတာဖြစ်ပါတယ်။

​တိုင်းရင်းသားလက်နက်ကိုင်အဖွဲ့တွေအနေနဲ့ တနိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA)လမ်းကြောင်းအတိုင်း မလာဘူးဆိုရင် နယ်စပ်ဒေသ တည်ငြိမ်ရေးနဲ့ ဖွံ့ဖြိုးရေးကို ထိခိုက်စေလိမ့်မယ်လို့ စစ်ခေါင်းဆောင်ကဆိုပါတယ်။ ဖေဖော်ဝါရီလ ၁၂ ရက်၊မနေ့ကကျရောက်တဲ့ ၇၉ နှစ်မြောက် ပြည်ထောင်စုနေ့မှာ စစ်ခေါင်းဆောင်မင်းအောင်လှိုင်က သဝဏ်လွှာပေးပို့ခဲ့ပြီး သတိပေးလိုက်တာပါ။ ​စစ်ခေါင်းဆောင်က နိုင်ငံရေးပြဿနာကို လက်နက်ကိုင်နည်းလမ်းနဲ့ ဖြေရှင်းတာဟာ တိုင်းပြည်အတွက် နစ်နာမှုတွေပဲ ရှိမှာဖြစ်လို့ NCA ပါအချက်အလက်တွေနဲ့အညီ နိုင်ငံရေးစားပွဲဝိုင်းမှာ ဆွေးနွေးကြဖို့ တိုက်တွန်းထားတာပါ။ ဒါပေမယ့် မြေပြင်မှာတော့ စစ်ကော်မရှင်တပ်နဲ့ တိုင်းရင်းသားလက်နက်ကိုင်အဖွဲ့တွေအကြား တိုက်ပွဲတွေဟာ တကျော့ပြန် ပြင်းထန်နေဆဲ ဖြစ်ပါတယ်။ ​ပြည်သူတွေနဲ့တိုင်းရင်းသားအဖွဲ့အစည်းအချို့ကတော့ စစ်ကော်မရှင်တပ်ရဲ့ NCA စကားဟာ ဟန်ပြသက်သက်သာဖြစ်ပြီး လက်တွေ့မှာတော့ လေကြောင်းတိုက်ခိုက်မှုတွေနဲ့ လက်နက်ကြီးသုံး ပစ်ခတ်မှုတွေကြောင့် ဒေသခံပြည်သူတွေ နေ့စဉ်နဲ့အမျှ ထွက်ပြေးတိမ်းရှောင်နေရတာကို ထောက်ပြဝေဖန်နေကြပါတယ်။ ​အထူးသဖြင့် နယ်စပ်ဒေသတွေမှာ ကုန်သွယ်မှုလမ်းကြောင်းတွေ ပိတ်ဆို့နေပြီးလမ်းတံတားတွေ ပျက်စီးနေတာဟာ အကြမ်းဖက်မှုတွေကြောင့်လို့ စစ်ခေါင်းဆောင်က ဆိုပေမယ့် ပြည်သူတွေကတော့ ဒါဟာ စစ်ကော်မရှင်တပ်ရဲ့ စစ်ရေးဗျူဟာတွေကြောင့်ဖြစ်ပြီး လူမှုစီးပွားဘဝတွေ လုံးဝပျက်စီးနေရပြီလို့ တုံ့ပြန်နေကြတာပါ။ ​နိုင်ငံတကာကလည်း စစ်ကော်မရှင်တပ်က ဖိတ်ခေါ်နေတဲ့ ငြိမ်းချမ်းရေးဟာ အားလုံးပါဝင်နိုင်တဲ့ ပုံစံမျိုးမဟုတ်ဘဲ သူတို့အာဏာတည်မြဲရေးအတွက်သာ ရည်ရွယ်နေတာကြောင့် NCA ဟာ လက်ရှိပဋိပက္ခကို ဖြေရှင်းနိုင်မယ့် အဓိကသော့ချက် မဟုတ်တော့ဘူးလို့ သုံးသပ်မှုတွေ ရှိနေပါတယ်။ ​အဲဒီအပြင် တိုင်းရင်းသားလက်နက်ကိုင် အဖွဲ့အစည်းအများစုကလည်း စစ်ကော်မရှင်တပ် အာဏာသိမ်းပြီးကတည်းက NCA ရဲ့ အနှစ်သာရတွေ ပျက်စီးသွားပြီလို့ ယူဆထားကြပါတယ်။  အဲဒါကြောင့် စစ်မှန်တဲ့ဖက်ဒရယ်ဒီမိုကရေစီအတွက်ဆိုရင် စစ်အာဏာရှင်စနစ်အပြီးတိုင်ချုပ်ငြိမ်းဖို့ကသာ ပထမဦးစားပေးဖြစ်တယ်လို့ ပြည်သူတွေနဲ့ နိုင်ငံရေးလေ့လာသူတွေကဆိုကြပါတယ်။

Border News Agency  မကွေး၊ ဖေဖော်ဝါရီ ၁၂။ ​ဒီနေ့ကျရောက်တဲ့ ၇၉ နှစ်မြောက် ပင်လုံစာချုပ်ချုပ်ဆိုတဲ့နေ့အတွက် အမျိုးသားညီညွတ်ရေးအစိုးရ (NUG) ကသဝဏ်လွှာတစောင် ပေးပို့လိုက်ပါတယ်။ အဲဒီထဲမှာ အာဏာရှင်စနစ်ကိုအမြစ်ပြတ်တိုက်ထုတ်ပြီး ဖက်ဒရယ်ဒီမိုကရေစီ ပြည်ထောင်စုသစ်တည်ဆောက်ရေးအတွက် "ပင်လုံစိတ်ဓာတ်" နဲ့ အရှိန်အဟုန်မြှင့် တော်လှန်ကြဖို့ တိုက်တွန်းထားတာဖြစ်ပါတယ်။ ၁၉၄၇ ခုနှစ်က ဗိုလ်ချုပ်အောင်ဆန်းနဲ့ တိုင်းရင်းသားခေါင်းဆောင်တွေဟာ တန်းတူညီမျှရေး၊ ကိုယ်ပိုင်ပြဋ္ဌာန်းခွင့်နဲ့ ဒီမိုကရေစီရေးကိုအခြေခံတဲ့ ပင်လုံစိတ်ဓာတ်နဲ့ လွတ်လပ်ရေးကို စည်းစည်းလုံးလုံး အရယူခဲ့ကြတယ်လို့ ဆိုပါတယ်။ ​ဒါပေမယ့် လွတ်လပ်ရေးရပြီးကတည်းက အစိုးရအဆက်ဆက်နဲ့အထူးသဖြင့် စစ်အာဏာရှင်တွေဟာ ပင်လုံကတိကဝတ်တွေနဲ့ ပင်လုံစိတ်ဓာတ်ကို လက်တွေ့အကောင်အထည်ဖော်ဖို့ ပျက်ကွက်ခဲ့ကြတယ်လို့ ဆိုပါတယ်။ အဲဒီလို ပျက်ကွက်ခဲ့တာတွေကြောင့်ပဲ ပြည်တွင်းစစ်မီးတွေနဲ့ နိုင်ငံရေးမတည်ငြိမ်မှုတွေဖြစ်ပွားပြီး တိုင်းပြည်ဟာဒီနေ့အထိ ဘက်ပေါင်းစုံက ဆုတ်ယုတ်နေရတာဖြစ်တယ်လို့ ဆိုပါတယ်။ ​ဒီအချိန်ဟာ အကြမ်းဖက်စစ်အုပ်စုရဲ့ လူမဆန်တဲ့ဖိနှိပ်မှုတွေကို တိုင်းရင်းသားညီအစ်ကို မောင်နှမအားလုံးက တစည်းတလုံးတည်း တော်လှန်နေကြတဲ့အချိန်ဖြစ်တယ်လို့ NUG က ဆိုပါတယ်။ နွေဦးတော်လှန်ရေးမှာပါဝင်နေကြတဲ့ နိုင်ငံရေးအင်အားစုတွေ၊ တိုင်းရင်းသားအဖွဲ့အစည်းတွေနဲ့ ပြည်သူတရပ်လုံးဟာ ဖက်ဒရယ်ဒီမိုကရေစီ ရည်မှန်းချက်တွေအတွက် သမိုင်းပေးတာဝန်ကို ထမ်းဆောင်နေကြတာလို့လည်း ဆိုပါတယ်။ ​NUG အနေနဲ့ တော်လှန်ရေးအင်အားစုတွေနဲ့အတူယုံကြည်မှု၊ လေးစားမှုတွေနဲ့လက်တွဲဆောင်ရွက်နေပြီး စစ်အာဏာရှင်စနစ်တင်မကဘဲ အာဏာရှင်စနစ်မှန်သမျှ အပြီးတိုင်ချုပ်ငြိမ်းရေးကို အလေးအနက်လုပ်ဆောင်သွားမယ်လို့  ဆိုပါတယ်။ အဲဒီအပြင် လူမျိုးကြီးဝါဒနဲ့ကျဉ်းမြောင်းတဲ့ လူမျိုးရေးဝါဒတွေကိုပါ တိုက်ဖျက်သွားမှာဖြစ်တယ်လို့ ဆိုပါတယ်။ ​ပြည်သူတွေ လိုလားတောင့်တနေတဲ့ ဖက်ဒရယ်ဒီမိုကရေစီ ပြည်ထောင်စုသစ်ကြီးကို တည်ဆောက်နိုင်ဖို့အတွက် စစ်ရေးရော နိုင်ငံရေးအရပါ ဟန်ချက်ညီညီနဲ့ ဆက်လက်တိုက်ပွဲဝင်သွားကြဖို့လည်း တိုက်တွန်းနှိုးဆော်ထားပါတယ်။

Border News Agency  နေပြည်တော်၊​ ဖေဖော်ဝါရီ ၁၂။ ​ဒီနေ့ကျရောက်တဲ့ ၇၉ နှစ်မြောက်ပြည်ထောင်စုနေ့မှာ စစ်ခေါင်းဆောင်မင်းအောင်လှိုင်က ရွေးကောက်ပွဲကျင်းပပြီး အနိုင်ရပါတီကိုအာဏာလွှဲပေးမယ်လို့ သဝဏ်လွှာပေးပို့ ပြောကြားလိုက်ပါတယ်။ ဒါပေမယ့် ဒီပြောကြားချက်ဟာ လက်တွေ့မြေပြင်မှာတော့ ပြည်သူလူထုရဲ့ ပြင်းပြင်းထန်ထန်ငြင်းပယ်မှုကို ရင်ဆိုင်နေရတာပါ။ ​မြေပြင်ကပြည်သူတွေကတော့ စစ်ကော်မရှင်တပ်ရဲ့ ရွေးကောက်ပွဲဟာ အာဏာသက်တမ်းတိုးဖို့ကြိုးပမ်းတဲ့ "ဟန်ပြပွဲ" သာဖြစ်တယ်လို့ ရှုမြင်နေကြပြီး လုံးဝလက်မခံဘူးလို့ တုံ့ပြန်နေကြပါတယ်။ နိုင်ငံတစ်ဝှမ်းမှာ စစ်မီးတွေတောက်လောင်နေပြီး နေရပ်စွန့်ခွာထွက်ပြေးနေရသူသန်းနဲ့ချီရှိနေချိန်မှာ ရွေးကောက်ပွဲအကြောင်း ပြောနေတာဟာ လက်တွေ့မကျဘူးလို့လည်း ဝေဖန်နေကြပါတယ်။  ​အဲဒီအပြင် စစ်ကော်မရှင်ကကောက်ယူနေတဲ့ သန်းခေါင်စာရင်းနဲ့ မဲစာရင်းပြုစုမှုတွေကိုလည်း ပြည်သူတွေက ပူးပေါင်းပါဝင်တာမရှိဘဲ ဆန့်ကျင်နေကြပါတယ်။ ဒါဟာ ပြည်သူ့ဆန္ဒကိုထင်ဟပ်ဖို့ထက် တော်လှန်ရေးအင်အားစုတွေကို ထောက်လှမ်းဖို့နဲ့ ဖိနှိပ်ဖို့အတွက်သာဖြစ်တယ်လို့  ပြည်တွင်းအဖွဲ့အစည်းတွေက ထောက်ပြထားပါတယ်။ ​နိုင်ငံတကာအသိုင်းအဝိုင်းကလည်း စစ်ကော်မရှင်ရဲ့ ရွေးကောက်ပွဲဟာ အတိုက်အခံတွေ ပါဝင်ခွင့်မရှိတဲ့အတွက် တရားဝင်မှုမရှိဘူးလို့ အခိုင်အမာပြောဆိုထားပါတယ်။ ကုလသမဂ္ဂအပါအဝင် ကမ္ဘာ့နိုင်ငံတွေကစစ်မှန်တဲ့ နိုင်ငံရေးဆွေးနွေးမှုမရှိဘဲ ပြုလုပ်မယ့်ရွေးကောက်ပွဲဟာ ပဋိပက္ခကို ပိုပြီးကြီးထွားစေလိမ့်မယ်လို့ သတိပေးထားပါတယ်။ ​စစ်ခေါင်းဆောင်က ငြိမ်းချမ်းရေးနဲ့ဖက်ဒရယ်အကြောင်း သဝဏ်လွှာထဲမှာထည့်သွင်းပြောဆိုခဲ့ပေမယ့် ပြည်သူတွေကတော့ နေ့စဉ်နဲ့အမျှ လေကြောင်းရန်နဲ့ လက်နက်ကြီးရန်တွေကို စိုးရိမ်နေရတဲ့အတွက် ဒီကတိစကားတွေအပေါ် ယုံကြည်မှု လုံးဝမရှိတော့တဲ့ အခြေအနေဖြစ်ပါတယ်။ ​အထူးသဖြင့် ကုန်ဈေးနှုန်းအဆမတန်ကြီးမြင့်မှုနဲ့ အလုပ်အကိုင်ရှားပါးမှုဒဏ်ကို ပြင်းပြင်းထန်ထန်ခံစားနေရတဲ့ ပြည်သူတွေအတွက်တော့ စစ်ကော်မရှင်ရဲ့ ရွေးကောက်ပွဲကတိဟာ သူတို့ရဲ့အခြေခံလူမှုစီးပွားပြဿနာတွေကို ဖြေရှင်းပေးနိုင်မှာမဟုတ်ဘူးလို့ သုံးသပ်နေကြပါတယ်။