Border News Agency
အိန္ဒိယ၊ မတ်လ ၃။
အိန္ဒိယ-မြန်မာနယ်စပ် မီဇိုရမ်ပြည်နယ်အတွင်း ရူပီးကုဋေနဲ့ချီ တန်ဖိုးရှိတဲ့ မက်အဖက်တမင်းနဲ့ ဟီးရိုးအင်း အမြောက်အမြားကို ဖမ်းဆီးရမိခဲ့တယ်လို့ မီဇိုရမ်ရဲတပ်ဖွဲ့က မတ်လ ၂ ရက်၊ မနေ့ကထုတ်ပြန်ပါတယ်။
အဲဒီ မီဇိုရမ်ပြည်နယ်မှာ ဇိုရမ်ရဲတပ်ဖွဲ့က မူးယစ်ဆေးဝါး တားဆီးနှိမ်နင်းရေးကိုအရှိန်အဟုန်မြှင့်ဆောင်ရွက်နေစဉ်အတွင်း ဖေဖော်ဝါရီလကုန်ပိုင်းကနေ မတ်လ ၁ ရက်နေ့အထိ ရက်ပိုင်းအတွင်းမှာတင်ဖမ်းဆီးရမိခဲတာလို့ဆိုပါတယ်။
မဏိပူရပြည်နယ်၊ အင်ဖာမြို့ဘက်ကနေ မောင်းနှင်လာတဲ့ ကုန်တင်ကားတစီးကို မတ်လ ၁ ရက်နေ့က စိုက်တောလ် ရဲတပ်ဖွဲ့က တားဆီးစစ်ဆေးရာမှာ ကာလတန်ဖိုး ရူပီး ၂ ကုဋေ ၇၀ သိန်းကျော် တန်ဖိုးရှိတဲ့ မက်အဖက်တမင်း ၃ ဒသမ ၃ ကီလိုဂရမ် ကို ဖမ်းဆီးရမိခဲ့တယ်လို့ ဆိုပါတယ်။
ဒီအမှုမှာ အာသံပြည်နယ်သား နှစ်ဦးကို ကားနဲ့အတူ ဖမ်းဆီးအရေးယူထားတယ်လို့ ဆိုပါတယ်။
အဲဒီအပြင် ဖေဖော်ဝါရီလ ၂၇ ရက်နေ့ကလည်း ဇိုခေါသျှားနယ်စပ်လမ်းပေါ်မှာ စွန့်ပစ်ထားတဲ့ကျောပိုးအိတ်တလုံးအတွင်းကနေ ရူပီး ၄ ကုဋေကျော် တန်ဖိုးရှိ မက်အဖက်တမင်း ၅ ကီလိုကျော် ကို ရဲတပ်ဖွဲ့နဲ့ အာသံရိုင်ဖယ်တပ်ဖွဲ့တို့ ပူးပေါင်းသိမ်းဆည်းရမိခဲ့တယ်လို့ဆိုပါတယ်။
အဲဒီနေ့မှာပဲ ဒေါင်တလန့် စစ်ဆေးရေးဂိတ်မှာ TATA Sumo ကားတစီးပေါ်ကနေ မက်အဖက်တမင်း ၅ ဒသမ ၉ ကီလို နဲ့ ဟီးရိုးအင်း ၆၈ ဂရမ် ကို ထပ်မံဖမ်းဆီးရမိခဲ့တာပါ။
ဒေါင်တလန့်အမှုမှာ ကနဦး လူ ၃ ဦးကို ဖမ်းဆီးခဲ့ပြီးနောက် ကွင်းဆက်အရ ထွက်ပြေးတိမ်းရှောင်နေသူတဦးကိုလည်း ဖေဖော်ဝါရီလ ၂၈ ရက်နေ့မှာ ထပ်မံဖမ်းဆီးနိုင်ခဲ့တယ်လို့ဆိုပါတယ်။
အဲဒီတရားခံဆီကနေ ရူပီးကုဋေချီတန်ဖိုးရှိတဲ့ မက်အဖက်တမင်း ၃ ကီလို ကို ထပ်မံသိမ်းဆည်းရမိခဲ့တာကြောင့် ဒီတပတ်အတွင်း ဖမ်းဆီးရမိမှုတွေထဲမှာ အများဆုံး ဖြစ်လာခဲ့ပါတယ်။
အဲဒီအပြင် ဖေဖော်ဝါရီလ ၂၄ ရက်နေ့ကလည်း အိုက်ဇောမြို့ပေါ်မှာ တရုတ်လက်ဖက်ခြောက်ထုပ်တွေထဲ ဝှက်လာတဲ့ Crystal Meth ၂ ကီလိုကျော် (ကာလတန်ဖိုး ရူပီး ၁ ကုဋေ ၆၀ သိန်းကျော်) ကို လူနှစ်ဦးနဲ့အတူ ဖမ်းဆီးရမိခဲ့တယ်လို့ ဆိုပါတယ်။
အဲဒီ ဖမ်းဆီးရမိသူအားလုံးကို မူးယစ်ဆေးဝါးဥပဒေ (ND&PS Act) နဲ့ အမှုဖွင့်ပြီး ကွင်းဆက်တရားခံတွေကို ဆက်လက်စုံစမ်းနေတယ်လို့ သိရပါတယ်။
