Border News Agency
နေပြည်တော်၊ ​ဧပြီ ၁၇။

​စစ်ကော်မရှင်တပ်က မြန်မာနှစ်ဆန်းတရက်နေ့မှာ အကျဉ်းသား ၄,၃၀၀ ကျော်ကို လွတ်ငြိမ်းခွင့်ပေးတယ်လို့ ကြေညာထားပေမယ့် တကယ်တမ်း လွတ်မြောက်လာသူတွေထဲမှာ နိုင်ငံရေးအကျဉ်းသား ပါဝင်မှုဟာ အလွန်နည်းပါးနေတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်ပါတယ်။

​PPNM ရဲ့ ဒီနေ့နေ့လည်ပိုင်းအထိ ရရှိထားတဲ့ အချက်အလက်တွေအရ အကျဉ်းထောင် ၁၉ ခုကနေ လွတ်မြောက်လာသူ ၅၈၀ ကျော် ရှိပြီဖြစ်ပေမယ့် အဲဒီထဲမှာ အတည်ပြုနိုင်တဲ့ နိုင်ငံရေးအကျဉ်းသားက ၁၆၅ ဦးပဲ ရှိပါသေးတယ်။

ဒါဟာ အကျဉ်းသားလွှတ်ပေးတဲ့ အချိုးအစားအရ ကြည့်ရင် အတော်လေး နည်းနေတာ ဖြစ်တယ်လို့ ဆိုပါတယ်။

​အဲဒီသာယာဝတီ၊ အိုဘို၊ မြောင်းမြ၊ ကလေးနဲ့ အင်းစိန်အကျဉ်းထောင်တွေအပါအဝင် ထောင်အသီးသီးကနေ နိုင်ငံရေးအကျဉ်းသားတချို့ လွတ်လာတာကို အတည်ပြုနိုင်ထားပြီး ကျန်ရှိနေသူတွေရဲ့ အချက်အလက်တွေကိုလည်း PPNM ဘက်က ဆက်လက်စိစစ်နေဆဲလို့ဆိုပါတယ်။

​ဒီနေ့မှာ သမ္မတဦးဝင်းမြင့် လွတ်မြောက်လာပေမယ့် ဒေါ်အောင်ဆန်းစုကြည်အပါအဝင် တခြားသော နိုင်ငံရေးခေါင်းဆောင်တွေနဲ့ နိုင်ငံရေးအကျဉ်းသား ထောင်နဲ့ချီပြီး ဆက်လက်ဖမ်းဆီးခံထားရဆဲ ဖြစ်ပါတယ်။

နိုင်ငံရေးအကျဉ်းသားအားလုံး ခြွင်းချက်မရှိ လွတ်မြောက်ဖို့ လိုအပ်နေသေးတယ်လို့ PPNM က ထောက်ပြထားပါတယ်။