Border News Agency
ထားဝယ်၊ မတ် ၃။
တနင်္သာရီတိုင်း၊ ထားဝယ်မြို့နယ်အတွင်း ခရီးသွားပြည်သူတွေဆီကနေ ငွေကြေးကောက်ခံနေတဲ့ စစ်ကော်မရှင်တပ်သားတွေကို ဝင်ရောက်တိုက်ခိုက်ခဲ့ရာ ၃ ဦး သေဆုံးခဲ့တယ်လို့ ဒူရကစစ်ကြောင်းက မတ်လ ၃ ရက်၊ ဒီနေ့ထုတ်ပြန်ပါတယ်။
အဲဒီတိုက်ခိုက်မှုကို ဓဝယ်အမျိုးသားလွတ်မြောက်ရေးတပ်တော်(DNLA)၊ ဒူရကစစ်ကြောင်းက မတ်လ ၁ ရက်နေ့ မနက် ၆ နာရီဝန်းကျင်မှာ လုပ်ဆောင်ခဲ့တာဖြစ်ပြီး၊ ထားဝယ်နည်းပညာတက္ကသိုလ်ရှေ့မှာဂိတ်ချပြီး ငွေတောင်းနေချိန်ဝင်ရောက်ပစ်ခတ်ခဲ့တာလို့ဆိုပါတယ်။
အဲဒီမိနစ် ၃၀ ခန့်ကြာမြင့်တဲ့တိုက်ပွဲအတွင်း စစ်ကော်မရှင်တပ်သား ၃ ဦး သေဆုံးတဲ့အပြင် MA1 သေနတ် ၂ လက်၊ G3 သေနတ် ၁ လက်၊ လက်ပစ်ဗုံး ၁ လုံးနဲ့ ကျည်ဆန်အချို့ကိုလည်း သိမ်းဆည်းရမိခဲ့တယ်လို့ ဆိုပါတယ်။
ဒူရကစစ်ကြောင်းကတော့ လက်ရှိမှာစစ်ရေးအရှိန်မြှင့်တင်နေတာကြောင့် ပြည်သူတွေအနေနဲ့ စစ်ရေးသတိရှိကြဖို့နဲ့ လေကြောင်းအန္တရာယ်ကာကွယ်ရေး သတင်းအချက်အလက်တွေကို လိုက်နာကြဖို့တိုက်တွန်းထားပါတယ်။
ဒါ့အပြင် စစ်ကော်မရှင်တပ်ဖွဲ့ဝင်တွေနဲ့ ရဲတပ်ဖွဲ့ဝင်တွေအနေနဲ့လည်း ပြည်သူ့ရင်ခွင်ကို အမြန်ဆုံးခိုလှုံပူးပေါင်းကြဖို့ သတိပေးထားပါတယ်။
